Koloniko Diiŋ Ndɔɔ

9 Mɛɛ masa laandoo o lɛŋnde Siɛba leŋ niŋ+ tuei a Sɔlɔmɔŋ okɔɔ, mbo chaŋ mbo kua Chulusalɛm le Sɔlɔmɔŋ tofaa a nyunala kala kalalaŋ.* Mɛɛ o wa kɔlaŋ, mi waŋnda faŋga bɛndoo liila ndu. Nduyɛ nyɔɔmiaa wa kɔlaŋ a chuɛima baasam ndaŋ, kooliiyoŋ tau tau,+ vɛlɛ a pouta baa kalalaŋ. Mbo luɛi naa Sɔlɔmɔŋ chua, mbo dimul ndu nyɛ o nyɛ wa ndu o kɔl.+ 2 Okoŋ, mi Sɔlɔmɔŋ mulul ndu nyunala ndɔlaŋ kpou. Nyɛ o nyɛ ve o kala* mi Sɔlɔmɔŋ bumba ndu tɛɛsial te.

3 Mɛɛ masa laandoo le Siɛba che taasi Sɔlɔmɔŋ ndo,+ chiɛi o taŋgul lo,+ 4 nyɛdiaa wa o tibii* ndɔɔ choo wo,+ mɛɛ buɛiyaa nduaa ndaa challɛ, wanaa ndaa piɔu nyɛdiaa o tibiiyo choo wa a chuɛɛnɔŋ ndaa, wanaa nduaa ndaa tala muɛiyaŋ nda a chuɛɛnɔŋ ndaa, a salala luamaala ndoo soli teleŋ o teleŋ o chiɛi Chɛhowa wo niŋndaŋ,+ mi yoomuaŋ ma fula ndu po. 5 Okoŋ mbo dimul masaa aa: “Kona ya tuei o lɛŋnde nileŋ niŋ a batiuwaa numndo vɛlɛ a taasi numndo okɔɔ wo, tonya o cho ni. 6 Kɛ yaa laalaŋ a kona ya tueiyo le, mɛɛ mi yapila huŋ chɔ a lehɔl pɛɛŋ.+ Nduyɛ pɛŋ, nyɛɛmbɔ koni nda doonuŋ ya kona ni.+ Taasi num bɛndoo hiou nyɛ ya tueiyo poloŋ.+ 7 Kɔl kɛndɔɔ cho le wanaa numnda, nduyɛ kɔl kɛndɔɔ cho le buɛiyaa numnda, a cho num isisi lachi teleŋ o teleŋ ma wa nilaŋ yaŋɔɔ o taasi numndo wa! 8 Maa Chɛhowa Mɛlɛka numndo, o hini kɔl a num mbo kɛsi num o kpeŋgbei* ndɔ lemasaa choo le ma wa masaa le Chɛhowa Mɛlɛka numndo wo sɔla saŋgalaa fɔ! Le mɛɛ Mɛlɛka numndo kaala Isɔluɛiya+ nduyɛ mbo yeema le ma wa le fɛɛŋ a fɛɛŋ yɛ, le saboo hoo o hɛli num ni le ma wa nda choo masa, ma dimi sɔɔŋ o nɛi tonyaa choo a o nɛi sakpoo choo.”

9 Okoŋ, mbo ke Masaa Sɔlɔmɔŋ kooliiyoŋ talɛŋndoŋ 120.*+ Mbo ke ndu vɛlɛ chuɛima baasam ndaŋ tau tau, a pouta baa kala laŋ. Chɔŋ niŋ a teleŋ koŋ, Masaa Sɔlɔmɔŋ sɔla lɛ chuɛima baasam ndaŋ mi ma sulaŋ a chuɛima masa laandoo le Siɛba ke ndu waŋ te.+

10 Nduyɛ, mi buɛiyaa Hiluam nda a buɛiyaa Sɔlɔmɔŋ nda ndaa chuu Sɔlɔmɔŋ kooliiyoŋ fulaa Ofii.+ Mi ndaa chuu ndu vɛlɛ yɔmii alikɔm nde a pouta baa kalalaŋ.+ 11 Mi masaa toosiaa naa helaa a yɔmii alikɔm nde le chiɛi Chɛhowa wo+ a le chiɛi lemasaa.+ Mbo toosiaa vɛlɛ towalaŋ a nyɛm chaaŋ iyooŋ le wanaa soliaa ŋchonduaa.+ Kani bɛɛ ndaa chi wɔ yɔmii kɛndɛi waa lende o Chuda niŋ te.

12 Mi Masaa Sɔlɔmɔŋ bɛɛ ke masa laandoo le Siɛba nyɛ o nyɛ ndoo yeema nduyɛ mbo nyuna le ndu, mbo hiau bɛɛ nyɛm ndoo chuu Sɔlɔmɔŋ ndoŋ. Okoŋ kɔɔli, mbo mal mbo miiŋgu o lɛŋnde ndɔleŋ niŋ a buɛiyaa nduaa latulu.+

13 Kooliŋ Masaa Sɔlɔmɔŋ ndoo sɔla o wɔsioo niŋndoŋ, lusul ndɔɔ ndoo wa talɛŋndoŋ 666.+ 14 O fulawɔ o muŋ kɔɔli, yulaa bɛnduaa, yulaa pɔmbuaa, masaa Aluabuiya kpou, a masaa ŋbuŋgaa o lɛŋndeŋ niŋ wa Sɔlɔmɔŋ kooliiyoŋ a kaniŋ humboŋ chuuwo.+

15 Mi Masaa Sɔlɔmɔŋ toosiaa boola puaa chɔuwa 200 a kooliiŋ muuliaŋ ndoŋ.+ (Nduyɛ kooliŋ muuliaŋ ndoŋ siɛkɛlloŋ 600* o soliŋ kpeku ni le boo kɛ kɛ toosiaa.)+ 16 Mbo toosiaa vɛlɛ boola pɔmbɔla chɔulaŋ 300* a kooliŋ muuliaŋ ndoŋ. (Nduyɛ boo kɛ kɛ, kooliiyoŋ mainɛiyoŋ ŋgaa* nda soliŋ kpeku ni le ndu toosiaa.) Okoŋ, mi masaa kɔ kɛsi nyɔɔŋ muŋ o Chiɛi Bundɔɔ Lebanɔŋ.+

17 Mi masaa toosiaa vɛlɛ kpeŋgbei lemasa tɔɔma bɛndoo a chiŋuŋ kamaa, okoŋ mbo kumbu ndu a koolii kɛndɛ kɛndɛi.+ 18 Biŋndaŋ la wa la ŋɔmpum le helɔɔ o kpeŋgbei lemasaa hoo. Nduyɛ, naa kɛsiaa ŋpeluaa nda toosiaa a kooliiye wo wa o holaa o kpeŋgbeiyo hoo. Ndoo nɔ vɛlɛ fondaa o kpeŋguŋ muuŋ ndoŋ le balaŋ kɛsioo. Kpɔkuŋnda* a ŋiɔɔŋ+ wa isisi o kpeŋgoŋ vellaa velle, naa nda toosiaa le balaŋ kɛsioo wa. 19 Kpɔkuŋnda 12+ wa o biŋnda ŋɔmpumnda wa le helɔɔ laŋ choo. Biŋ kɛ kɛ, kpɔkuŋndo o pilɛ wa kpeŋgei i pilɛ, o pilɔɔ wa kpeŋgei i pilɛi. Masale kɛ kɛ lee toosiaa wɔ kpeŋgbei lemasa waa nuaa le. 20 Taalala kolaala Masaa Sɔlɔmɔŋ ndaŋ kpou, a kooliiye ndaa toosiaa laŋ ni. Nduyɛ nyɛm laanduŋ wa o Chiɛi Bundɔɔ Lebanɔŋ ndoŋ bɛɛ, a koolii kɛndɛ kɛndɛi ndaa toosiaa muŋ ni. A toosiaa nyɛ o nyɛ a kanii humbuei le. Kanifuule o palɛi Sɔlɔmɔŋ nde niŋ, ndaa chi kanii humbuei nyɛ o nyɛ le.+ 21 Mi dɛndɛla mamɛŋnda Masaa Sɔlɔmɔŋ ndaŋ laa kuɛ Taasi,+ latulu a buɛiyaa Hiluam nda.+ Le pilɛ o wɔsilaŋ la yaa bɛŋgu, mi dɛndɛlaŋ ndaŋ laa hiŋ la piaa cha a kooliiyoŋ, kaniŋ humboŋ, chiŋuŋ kamaa,+ tɔkpuaa, vɛlɛ a youwaa bɛnduaa kɛndɛ kɛndiaa.

22 Masaa Sɔlɔmɔŋ ndoo sul, nduyɛ ndoo nɔ taasioo mbo hiau masaa wa o lɛŋndeŋ choo wa kpou.+ 23 Nduyɛ masaa o lɛŋndeŋ choo kpou wa hunɔɔ naa Sɔlɔmɔŋ chua, le ma tuei taasi Mɛlɛka tonyaa dɔu ndu o kɔl lo.+ 24 Nda kpou, te o kɛ kɛ ndoo wa pɛ hunɔɔ, mi ndoo hiŋ a nyɛ o ba le ndu kioo. Mi ndaa chuu ndu nyɛm nda toosiaa a kaniŋ humboŋ ndoŋ, nyɛm nda toosiaa a kooliiyoŋ ndoŋ, nyɛla chuɛɛnaŋ ndaŋ,+ nyɛm chɔuwoŋ, chuɛima baasam ndaŋ, suaa, a chɔluaa yɛyii muuliaŋnda.* Nduyɛ, nuaa ndaa tosa iwɔsi o iwɔsi ni. 25 Sɔlɔmɔŋ ndoo nɔ fondaŋnda ndoo kɛsi suaa nduaa laŋ 4,000, nyɛm nyaanaŋ suaa naŋndoŋ, vɛlɛ a suaa* 12,000.+ Mbo kɛsi nyɛm nyaanaŋndoŋ muŋ ŋ tiŋ o chieeŋ o taŋgul le muŋ ndoŋ, nduyɛ mbo kɛsi ŋ tiŋ ndupila ikɛi Chulusalɛm.+ 26 Masaa wa chɔŋ o Pee Bɛndoo* kɔ o lɛŋnde Filitiaa leŋ niŋ haaa o pɛŋgulaŋ Ichipi wa kpou, ndu wa nda choo masa ni.+ 27 Mi masaa tosa mi kaniŋ humboŋ hɔba Chulusalɛm mɛɛ poutaŋ la wa nuaa yɛ. Nduyɛ yɔmii sida ve bɛɛ, i waŋnuŋ i hɔbɛi maa yɔmii sikamɔɔ ve o tanda Siɛfila wo niŋ.+ 28 Mi waŋnda ndaa chɛŋ a suaa Ichipi a o lɛŋii cheleŋnde niŋ kpou, ma chuu Sɔlɔmɔŋ.+

29 Sɔɔŋ cheleŋ cho a Masaa Sɔlɔmɔŋ okɔɔ woŋ,+ chɔŋ o kandɔŋndo haaa o mɛɛlulaŋ, ŋ cho ŋ poonyiaa o yau Netaŋ+ wana ndoo suaa le Mɛlɛka wo poonyiaa wo niŋ, a o huuluŋ Ahicha+ Silɔnaitiinɔɔ dimi woŋ niŋ, nduyɛ miŋ wa vɛlɛ ŋ poonyiaa o yilaŋuŋ Idɔɔ+ wana suaa le Mɛlɛka wo dimi a Chɛlobowam,+ po Nebati wo okɔɔ woŋ niŋ. 30 Le wɔsilaŋ 40, Sɔlɔmɔŋ wa o masaleŋ choo Chulusalɛm Isɔluɛiya kpou choo. 31 Okoŋ kɔɔli, mi Sɔlɔmɔŋ wu,* ma kumbu ndu o Chiee Deeve finya ndɔ wo niŋ.+ Nduyɛ, mi Luihobowam po ndɔ miiŋgu o masaleŋ choo o foofo ndɔɔ.+