Sam
Le wana sim lachi le chondei yo. Chondii Deeve ve.
139 Oo Chɛhowa, a mɛɛndaŋ ya nyɛkɛndɛi nduyɛ a sina ya.+
2 Te I chal pɛ nduyɛ mi chɛŋ, a sina.+
A sina yiyaŋnda nilaŋ.+
3 Ma mɛɛndaŋ ya te I kuɛ pɛ kelaa, nduyɛ te I hini pɛ.
A sina nɛila nilaŋ kpou.+
4 Oo Chɛhowa, tuupa mi kumbi sondoo le suɛi,
A chii niŋ sina nyɛ ya yeema le dimioo wo.+
5 A cho ya o balaa silɔ,
Nduyɛ ma handu ya ba numndo choo.
6 I nɔla mi bii hei bila le,
Kanifuule I kendu bɔɔ bila biyɔɔ.+
7 Kuɛɛnɛ ya viaŋnuŋ yɛ nyina numndo chi ya le?
Nduyɛ, kuɛɛnɛ ya nyaanuŋ yɛ mi veŋnuŋ a chi ya le?
8 Te o yɔŋ pɛ mi hel choo choo, a cho loŋ.
Nduyɛ te I bɛɛndiaa pɛ kpele nuu o Sɛiyo* niŋ, mbɔ loŋ bɛɛ a cho loŋ.+
9 O yɔŋ bɛɛ mi nɔ kumbaŋndaŋ mi chɛŋ o hueiye niŋ mɛɛ paaleŋ le keleŋa nuaa fula idii yɛ,
Mi kɔ chal pɔɔli o pee mɛŋma ihɛllo kpeŋgei i pilɛi,
10 Loŋ bɛɛ ba numndo cho wa ya choo,
Nduyɛ ma saa ya a ba num kɛndɔɔ.+
11 Te I dimi pɛ aa: “O kpeekpei niŋ, nyumndaŋ ma cho ya kumbɔɔ kpu!”
Okoŋ, nyumma balu ya waŋ ma simnuŋ nyɛ teŋgaa.
12 Hali nyumndaŋ bɛɛ, ma ve niŋ kpiŋgbi le num te.
Nyɛ teŋgaa cho wa ichɔl maa ipala.+
Teŋgeŋ ve niŋ nyumndaŋ a nyɛ teŋgaa tɛɛŋ le num te.+
14 I cho num saŋgala, kanifuule a toosiaa ya o nɛi kɔndɔfili niŋ.+
Walta numndaŋ la cho bɔɔ walta kɔndɔfili bɛndu.+
I sina hei walaŋ.
15 Teleŋ ya wa o fondaŋ sɔɔsɔɔ wo kala nuu o dembe,
Nduyɛ mi dialuŋ nuŋ wa chiŋa chiŋiaa wo,
Paala nilaŋ la ve num la viaŋnaŋ te.+
16 Ma cha ya teleŋ ya kilaŋ kala nuu o dembe wo.
Faluŋ nuŋ kpou ŋ wa ŋ poonyiaa o yau numndo niŋ.
Ma poonyiaa paale falii kɛ kɛ nɔ mi i toosiaŋ nde,
Tuupa mi i kɛ kɛ wa.
17 Oo Mɛlɛka, yiyaŋnda numndaŋ la cho bɔɔ nyɛ sɔvɛ le ya!+
Nduyɛ sɔɔŋ ŋ yiyaŋ choo woŋ cho tau tau!+
18 Te I kindiŋ pɛ le muŋ chɔmndo, I nɔla le, kanifuule ŋ hiou siooŋnde o peelo.+
Te I tendu pɛ, I wa wɔ tuŋ a num latulu.*+
19 Oo Mɛlɛka, te num oo diu pɛ wanaa dɛnɛ wɔɔŋnda,+
Wanaa kaala sɔŋgɔlaŋ nda wa ya faŋaŋ kɔɔli.
20 Wanaa dimi sɔɔŋ wɔɔŋndoŋ a num okɔɔ,
Nduyɛ ma chua diola numndaŋ nyɛ fondoo fuu wa, nda cho yaamɔɔwaa numnda ni.+
21 Oo Chɛhowa, I tul wanaa tul num leyɛ wa leyɛ,+
Nduyɛ mi chua wanaa simul numnda maa nyɛ fondoo fuu nda cho ni.+
22 I tul nda bɔɔ leyɛ.+
A simnuŋ yaamɔɔwaa niaa kpeekpei.
23 Oo Mɛlɛka, mɛɛndaŋ ya, ma sina kɔl nuu.+
Yaasiaa ya nyɛkɛndɛi, ma sina nyɛ cho tosaa mi wa buulaŋndo wo.+