Polowaa
24 Paŋala wanaa dɛnɛ wɔɔŋnda le,
Nduyɛ tosa naaŋaŋndo a nda le.+
2 Kanifuule yiyaŋ lasɔŋgɔɔ koni huŋ nda o lakɔl ni,
Nduyɛ sɔɔŋ kpundɔŋ nda dimi ni.
5 Wana taasioo, kpaayaa pila o nɔ ni.+
Nduyɛ, mi kɔl kaloo tosa mbo chɔɔlu kpaayaa sɔla.
6 Tol nɛi chɔmaa sɔviɔɔ* kɔɔli te a kuɛ pɛ o chɔuwo.+
Nduyɛ te wanaa silaa wa pɛ tau, mi batiuwaa sɔlaŋ.+
7 Diɔmndo nɔla mbo sɔla taasi kpeekpeiyo le,+
Nduyɛ o nɔ nyɛ o nyɛ le dimi o dio kpaki chioo le.
8 Wana o wana tuunuŋ pɛ sɔɔŋ wɔɔŋndoŋ o kɔl,
Ndu nda veelu ni aa masaa le kɛɛsiaala dɛnɛ wɔɔŋndaŋ.+
9 Tuula idiɔmndaŋ, o hakioo niŋ la yaa wana ni.
Nduyɛ, waŋnda tul wana mam waŋnda wo leyɛ.+
11 Piŋi wanaa nda cho kɔlaŋ diyɔɔ wa,
Nduyɛ ma chiindiaa wanaa nda cho kɔlaŋ bololaŋ kiolɔɔ wa.+
12 Kɛ te la dimi pɛ aa: “Ŋ sina a hei okɔɔ le,”
Baa o cho Mɛlɛka yaasiaa kɔltaŋ ndo le sina nyɛ cho leniŋ ndo le?+
A tonya, wana mɛɛndaŋ nya wo cho sina,
Nduyɛ o cho wana o wana paawa* a mɛɛ kuɛɛla ndɔlaŋ la cho yɛ.+
13 Po nuu, dio liaaŋ kanifuule ma naŋ.
Lɛma fula o waa maliɔɔ niŋndaŋ, yeelaa pila ma yeela ni.
14 Lende koni taasioo bɛɛ cho nyɛ kɛndɛ le num ni.+
Te a saaluŋ ndu pɛ, keŋ cho tosa ma nɔ chila kɛndɛlaŋ,
Nduyɛ tiindaŋ numndo tembu niŋ te.+
15 Viaŋnuŋ o chiɛi wana cho sakpo wo ikɛi le ndu dɛnɛ wɔɔŋndo tosal lo le,
Nduyɛ tɛɛmbuu fondaŋ ndɔ pɛŋgiaa le.
16 Wana cho sakpo wo del bɛɛ bɛmbɔɔ le ŋɔmmɛu, o nɔla vɛlɛ mbo chɛŋ.+
Kɛ mi nyɛpalaa tosa mi wana dɛnɛ wɔɔŋndo del.+
17 Te yaamɔɔnɔ numndo del pɛ, duaunuŋ nyaale le.
Nduyɛ te o boŋ pɛ, naŋ kɔl le keŋ te.+
19 Tambu kɔl* le wanaa dɛnɛ wɔɔŋnda le,
Nduyɛ paŋala wanaa dɛnɛ wɔɔŋnda le.
20 Kanifuule, wanaa dɛnɛ wɔɔŋnda nɔ tiindaŋ le chilaŋ te.+
Nduyɛ, lambui ndaa cho nyumndo pɔli.+
22 Kanifuule, kpundɔɔ cho nda komal o lepilɛ niŋ kpe.+
Nɛɛnɛ sina yɛ nyɛpalaa wanaa ŋiɔɔŋnda* haa tusi niŋ nda choo wo?+
23 Sɔɔŋ wanaa taasiaa dimi woŋ cho vɛlɛ muŋ ni:
O bɛnda mi wana sim waŋndo kɔɔli o yamɛi kiolɔɔ niŋ te.+
24 Wana o wana dimul pɛ wana dɛnɛ wɔɔŋndo aa: “Wana sakpoo ŋ cho ni,”+
Waŋnda cho num mɛna, nduyɛ ma dimi sɔɔŋ wɔɔŋndoŋ a num okɔɔ.
25 Kɛ wanaa miŋgi ndu o nɛi ya, sɔɔŋ cho lakɔ nyɛkɛndɛi a nda.+
Nduyɛ, salalaŋ la cho wa nda choo.+
26 Wana muli o nɛi sakpoo choo wo, waŋnda cho ndu bɛɛleŋ ke.*+
27 Chiiyɔ fɛlɛŋ wali ŋ nɔ o bɛɛ wo, nduyɛ ma tosa chiɛi numnde.
Okoŋ kɔɔli, a taŋgul niko chiɛi* numndo.
28 Timbul wana nya chiɛɛliaŋ ndo lesei le, te a sina nyɛ yɔŋnuŋndo le.+
Nduyɛ, soliŋ sondo numndo kpeku le acheleŋnda huiyo le.+
29 Dimi nuaa aa: “I cho ndu tosal nyɛ o tosal la wo” le,
Ɔɔ “I cho ndu maa miŋgul le nyɛ o tosal la wo” le.+
30 Mɛɛ ya keeku o chiɛi wana siɛlɛiyo niŋ,+
O kpele makilepii wana nɔ kɔl kalu bɔɔ le wo niŋ,
31 Mi cha mi billo mial chiɛi a kpeloo hoo kpou.
Mi yɔɔŋ bɛɛ kumbu lɛŋndeŋ kpu,
Nduyɛ kpaki lapou balu chiɛi a kpeloo hoo wo bɛɛ wa o kombɛi.+
32 Mɛɛ ya chii sɔɔŋ muŋ mɛɛndaŋ, mi yiyaŋ yiŋgoloŋ a muŋ okɔɔ.
Nduyɛ nyɛ ya pɛɛku leniŋndo cho hoo ni:*
33 Hiniŋ ma siɛndiŋ nyɛɛmbɔ,
Nduyɛ ma kafala balaŋ le pɛŋgioo nyɛɛmbɔ.
34 Lende koni bala fondolaŋ la cho num komal ni maa viinɔ,
Nduyɛ mi kuɛi tol num choo mɛɛ wana yekpandioo tual nuaa waŋndo choo yɛ.+