Kɔliŋtiaŋ Tasoo

12 Puaapiliaa, I yeema mi la nɔ sinapɛŋgoo a kela nyina Mɛlɛkaa+ yɔŋgu laŋ okɔɔ. 2 La sina maa tuupa mi la simnuŋ wanaa laalaŋnda,* waŋnda wa nya nyindɔɔ le piɔmnda sooluuwo.+ Nduyɛ nyɛ o nyɛ ndaa yeema pɛ, ndu nyaa tosa ni. 3 Lelaŋ, I yeema mi la sina maa wana o wana nyina Mɛlɛkaa wa pɛ choo, o dimi diomnde wɔɔŋndeŋ a Chiisu le. Nduyɛ te o cho mi nyina diandaa wa waŋndo choo le, o nɔla mbo dimi maa Chiisu le cho Masanɔɔ le.+

4 Kelaŋ la cho suulaŋ yɛ yɛ, kɛ nyina pilɔɔ kpe yɔŋgu laŋ ni.+ 5 Nduyɛ walta Mɛlɛka laŋ la cho suulaŋ yɛ yɛ,+ kɛ le Masanɔ pilɔɔ kpe la cho ni. 6 Sɔɔŋ bɔɔbɔɔ cho le tosaa, kɛ Mɛlɛka pilɔɔ kpe nyindu waŋnda ni le muŋ kpou tosaa.+ 7 Nyɛ nyina diandaa mala nda le tosaa wo cho kpendekele, nduyɛ le tɔnɔ acheleŋnda Mɛlɛka ke nda ndu ni.+ 8 Waŋndo opum, mi nyina diandaa tosa mbo dimi sɔɔŋ taasioŋ. Opum, mi nyina pilɛ koŋ tosa mbo dimi sɔɔŋ waŋnda sina le woŋ. 9 Opum, mi nyina diandaa tosa mbo nɔ laalaŋndo.+ Opum, mi nyina pilɛ koŋ tosa mbo siŋgi waŋnda.+ 10 Opum mbo sɔla kioo le walta kɔndɔfiltaŋ tosaa,+ opum le waŋnda yooŋgu Mɛlɛkaa dimullo, opum le sɔɔŋ nyina diandaa dimi woŋ sinaa pɛŋgu,+ opum le sɔɔŋ maŋgalaŋ yɛ yiɔɔŋ dimioo,+ opum yɛ, le sɔɔŋ maŋgalaŋ hivioo.+ 11 Kɛ nyina diandaa pilɔɔ kpe tosa sɔɔŋ muŋ kpou ni. Nduyɛ mɛɛ o yeema yɛ, lende o ke muŋ wana o wana ni.

12 Dialuŋ wanachioo nɔ faloŋ tau. Mi che bɛɛ dialloŋ nɔ faloŋ tau, kɛ muŋ kpou dialle i pilɛ kpe ŋ cho ni.+ Lende koni Kiliti bɛɛ cho ni. 13 Kanifuule, Chuunɔ ni, Kilikiinɔ ni, chɛ ni, ɔɔ wana baŋaŋ ni, naa kpou sɔla yiŋɔɔ a nyina diandaa pilɛ koŋ kpe, miŋ simnuŋ dialle i pilɛ. Nduyɛ naa kpou miŋ sɔla nyina diandaa pilɛ koŋ.

14 O cho falei ndii pilɛ le cho o dialuŋ wanachioo niŋ te, kɛ faloŋ tau.+ 15 Te pelei dimi pɛ aa, “O cho ya le cho baa le, lelaŋ i cho o dialloŋ choo le,” keŋ kuuna ndi waa o dialloŋ choo le. 16 Te nileŋ le dimi pɛ aa, “O cho ya le cho hɔlteŋ te, lelaŋ i cho o dialloŋ choo le,” keŋ kuuna leŋ waa o dialloŋ choo le. 17 Te dialloŋ kpou muŋ wa pɛ hɔlteŋ, vɛɛnɛ ŋ wa yɛ wa tueiyɔɔ? Te dialloŋ kpou muŋ wa pɛ nileŋ, vɛɛnɛ ŋ wa yɛ wa nyɔɔ tueiyɔɔ chuŋ? 18 Lelaŋ, mi Mɛlɛka handu falii kɛ kɛ o fonda ndɔɔ o dialloŋ niŋ mɛɛ ndupila hɛnaŋ yɛ.

19 Te muŋ kpou muŋ wa pɛ falei ndii pilɛ, kuɛɛnɛ dialloŋ wa yɛ wa? 20 Lelaŋ, faloŋ cho tau, kɛ dialle ndii pilɛ kpe cho ni. 21 Hɔlteŋ le dimul baa aa, “I heuba a num te” le. Bolleŋ bɛɛ le dimul pelei aa, “I heuba a num te” le. 22 Kɛ faluŋ naŋ yiyaŋ maa ŋ nɔ mayoomu o dialloŋ niŋ te woŋ, muŋ bɛɛ cho ŋ sɔvɛ. 23 Nduyɛ, faluŋ naŋ yiyaŋ maa ŋ cho ŋ sɔvɛ tau o dialloŋ niŋ te woŋ, muŋ naŋ hiau bɛɛleŋ ke.+ 24 Kɛ faluŋ naŋ le nuaa woŋ, ŋ yeema nyɛ o nyɛ le muŋ kumbɔɔ le. Mɛlɛka toosiaa dialloŋ ni, nduyɛ mbo ke faluŋ niŋ le nua le woŋ bɛɛleŋ tau mbo hiau faluŋ naŋ le nuaa woŋ, 25 le halikpeŋ piɔuviaŋ ve o dialloŋ niŋ te, kɛ miŋ maandiaŋ vellaa velle.+ 26 Te falei i pilɛ saŋga pɛ, faluŋ tɔɔŋ kpou saŋga a ndi latulu.+ Nduyɛ te falei i pilɛ sɔla pɛ saŋgalaa, faluŋ tɔɔŋ kpou dɔɔnuŋ nyaale a ndi latulu.+

27 Nya cho dialuŋ Kiliti woŋ ni,+ nduyɛ nya pilɛŋ pilɛŋnda cho faloŋ le dialuŋ ndɔŋ ni.+ 28 Mɛlɛka pila hɛli wanaa cho o kundaa niŋnda ni. Kunda tasoo, kiilaa.+ O diiŋ ndɔɔ, wanaa suaa le Mɛlɛka wa.+ O yaa ndɔɔ, wanaa pɛɛkaa.+ Okoŋ kɔɔli, mbo hɛli haa le walta kɔndɔfiltaŋ tosaa.+ Haa le siŋgioo,+ haa le walta mala waŋnda laŋ tosaa, haa le nɛi chɔmaa yɔŋgoo,+ haa le sɔɔŋ maŋgalaŋ yɛ yiɔɔŋ dimioo.+ 29 Baa nda kpou cho kiilaa ni? Baa nda kpou cho wanaa suaa le Mɛlɛka wa ni? Baa nda kpou cho wanaa pɛɛkaa ni? Baa nda kpou tosa walta kɔndɔfiltaŋ ni? 30 Baa nda kpou nɔ kioo le siŋgioo ni? Baa nda kpou dimi sɔɔŋ maŋgalaŋ yɛ yiɔɔŋ ni?+ Baa nda kpou hivi sɔɔŋ maŋgalaŋ ni?+ 31 Lelaŋ, la hiou lachi a kindiŋndo le kela hiou wa la sɔvɛ laŋ sɔlaa.+ Nduyɛ nyɛ hiou wa o sɔvɛ kpou wo ya cho nya hoo hunɔɔ chɔm ni.+