Masaa Tasiaa

13 Mi Chɛhowa soli wana Mɛlɛka pilɛ+ Chuda, mbo viam ndu Bɛtɛl a yooŋgoo. Nduyɛ, o komal Chɛlobowam isisi o bandu luamaa lasalaa+ le salalaŋ lomɔɔ. 2 Okoŋ, mbo dimul bandu luamaa lasalaa yooŋgu Chɛhowa ke ndu wo choo choo kpeleŋ aa: “Oo bandu luamaa lasalaa, num bandu luamaa lasalaa hoo! Nyɛ Chɛhowa dimi wo cho hoo ni: ‘Poo cho hunɔɔ violɔŋ o yuŋgu Deeve wo niŋ ma ke ndu diolaŋ aa Choosaya!+ Wanaa soliaa lasalaa soli salalaŋ o fondaŋnda filioŋndaŋ o num choo wa, o cho hunɔɔ nda salaa soli o num choo, nduyɛ mbo lom paala waŋnda chieeya o num choo.’”+ 3 O paale leŋ choo, mbo chɔm kaamaa wa yɔŋnɔŋndo. Mbo dimi aa: “Kaamaa hoo nɔ le yɔŋnɔŋndo ni le chɔmndo maa Chɛhowa dimi hei ni: Bandu luamaa lasalaa hoo cho tɛnda kpala, nduyɛ mi pulta* cho lechoo laŋ la saŋnuŋ.”

4 Mɛɛ Masaa Chɛlobowam tuei dɔɔ nyɛ wana Mɛlɛka tonyaa dimi a bandu luamaa lasalaa Bɛtɛl okɔɔ wo, o lo isisi o bandu luamaa lasalaa mbo yulu baa, mbo dimi aa: “La bii ndu!”+ Kɛ o foofo koŋ choo, mi ba o yulu koŋ ndo vesa,* nduyɛ ndoo nɔla lɛ ndu tuwɔɔ le.+ 5 Okoŋ, mi bandu luamaa lasalaa tɛnda kpala, nduyɛ mi pulta wa lechoo laŋ la saŋnuŋ, a mɛɛ wana Mɛlɛka tonyaa dimi yɛ. Mi kaama Chɛhowa ndoo dimi le yɔŋnɔŋndo wo yɔŋnuŋ.

6 Mi masaa dimul wana Mɛlɛka tonyaa aa: “Yandii, nyɔɔlu Chɛhowa Mɛlɛka numndo le mbo tuiinuŋ ya inyiɛɛ, nduyɛ ma piɛi le ya le mi ba nuu miiŋgu maa paandu.”+ Okoŋ, mi wana Mɛlɛka tonyaa nyɔɔlu Chɛhowa le mbo tuiinuŋ masaa inyiɛɛ, nduyɛ mi ba ndɔɔ miiŋgu maa paandu. 7 Mi masaa dimul wana Mɛlɛka tonyaa aa: “Ŋ kɔ o bɛɛ ma de nyɛdiaa, nduyɛ mi ke num fandaa.” 8 Kɛ mi wana Mɛlɛka tonyaa dimul masaa aa: “O yɔŋ bɛɛ ma piɔu chiɛi numndo tɛɛŋ ma ke ya kpeŋgei i pilɛ, i cho lakɔ a num mi de nyɛdiaa* ɔɔ mi kol mamɛŋ o fondaa hoo le. 9 Kanifuule, mi Chɛhowa dimul la aa: ‘A nɔ ma de nyɛdiaa ɔɔ ma kol mamɛŋ te. Nduyɛ, a nɔ ma miiŋgu o nɛi ŋ hiŋ ndo le.’” 10 Okoŋ, mbo keeku a nɛi cheleŋ le miiŋgoo. O miiŋgu lɛ a nɛi o keeku le hunɔɔ Bɛtɛl lo le.

11 Fal pilɛ wa Bɛtɛl, ndu bɛɛ wana suaa le Mɛlɛka wo o wa ni. Mɛɛ puaa nduaa miiŋgu o bɛɛ, ma dounuŋ ndu kona a nyɛ o nyɛ wana Mɛlɛka tonyaa tosa paale leŋ Bɛtɛl, vɛlɛ a nyɛ o dimul masaa wo okɔɔ. Mɛɛ nda chii finya nda kona dounɔŋ, 12 mi finya nda nyuna nda aa: “A nɛi kuɛɛ o kuɛ yɛ?” Mi puaa nduaa chɔm ndu nɛi wana Mɛlɛka tonya fula Chuda wo o kuɛ wo. 13 Mbo dimul niko puaa nduaa aa: “La bɛɛndial la naa chalaa sofɛlɛ nuu o kɔɔ.” Okoŋ ma bɛɛndial ndu naa chalaa sofɛlɛ ndɔɔ o kɔɔ, mbo hel lechoo.

14 Mbo tual wana Mɛlɛka tonyaa hoo kɔɔli, nduyɛ mbo komal ndu ichali o yɔm bɛndoo bɛŋgu. Okoŋ mbo nyuna ndu aa: “Num cho wana Mɛlɛka tonya fula Chuda wo ni?”+ Mi poo mulul ndu aa: “Ei, ya ni.” 15 Mi fallo dimul ndu aa: “Ŋ miiŋgu chiee ma kɔ dio nyɛdiaa.” 16 Kɛ mbo dimul ndu aa: “I cho miiŋgu a num latulu le, nduyɛ I nɔ mi de nyɛdiaa ɔɔ mi kol mamɛŋ o fondaa hoo le. 17 Kanifuule mi Chɛhowa dimul la aa, ‘A nɔ ma de nyɛdiaa ɔɔ ma kol mamɛŋ loŋ te. Nduyɛ, a nɔ ma miiŋgu o nɛi ŋ hiŋ ndo le.’” 18 Okoŋ mi fallo dimul ndu aa: “Ya bɛɛ wana suaa le Mɛlɛka wo ya cho ni maa num. Nduyɛ maalikɛinɔɔ Chɛhowa vem ni mbo dimul la aa, ‘Kɔ ma kɔ huŋ a ndu o numndo chiɛiniŋ le mbo de nyɛdiaa nduyɛ mbo kol mɛŋndaŋ.’” (Kɛ choolaŋ o dimul ndu ni.) 19 Okoŋ mbo miiŋgu a ndu latulu le mbo de nyɛdiaa nduyɛ mbo kol mɛŋndaŋ o ndu lo chiɛiniŋ.

20 Mɛɛ nda wa ichali o tibiiyo,* mi Chɛhowa ke fal suaa hoo le Mɛlɛka mbo tosa mi poo miiŋgu pila wo yooŋgoo. 21 Nduyɛ, mbo dimul wana Mɛlɛka tonya fula hoo Chuda wo choo choo kpeleŋ aa, “Nyɛ Chɛhowa dimi wo cho hoo ni: ‘Le mɛɛ ŋ kɛɛ ya Chɛhowa diomndo tueiyɔɔ, ma kɛɛ le tosaa nyɛ ya Chɛhowa Mɛlɛka numndo dimul numndo yɛ, 22 okoŋ ma miiŋgu le nyɛdiaa dioo nduyɛ ma kol mɛŋndaŋ o fondaŋ ya dimul num aa, “Dia nyɛdiaa ɔɔ ma kol mamɛŋ te” wo, dialuŋ num vilɛiyoŋ kue o fondaŋ nda kumbu finyaa num aa mamaa+ wo le.’”

23 Mɛɛ wana Mɛlɛka tonyaa hoo chii nyɛdiaa dio nduyɛ mbo kol, mi fal suaa hoo le Mɛlɛka wo bɛɛndial ndu* naa chalaa sofɛlɔɔ o kɔɔ le mbo kuɛ. 24 Okoŋ mbo chaŋ mbo kuaŋnuŋ, kɛ mi kpɔkuŋndo* fulal ndu o nɛi nduyɛ mbo dii ndu.+ Dialuŋ ndɔŋ vilɛiyoŋ wa ŋ yambaa o nɛi, mi sofɛlɔɔ sim ikɛi. Nduyɛ, kpɔkuŋ koŋ bɛɛ wa isisi o dialuŋ vilɛi kalaŋ ikɛi. 25 Puaa pum wa hiouwɔɔ ma cha dialuŋ vilɛiyoŋ muŋ o nɛi, a kpɔkuŋndo isisi muŋ ikɛi. Mɛɛ nda fuuluu o chiee fal suaa hoo le Mɛlɛka wo o wa wo, ma dimul waŋnda a ndi okɔɔ.

26 Mɛɛ wana suaa le Mɛlɛka wo, o tosa mi poo hoo miiŋgu chiee pila wo tuei a ndi okɔɔ, mbo dimi aa: “Wana Mɛlɛka tonyaa ni. Kiɔɔ o kɛɛ le nyɛ Chɛhowa dimul ndu wo tosaa ni.+ Lelaŋ Chɛhowa mal ndu kpɔkuŋndo o ba ni mbo sɛɛsiaa ndu, nduyɛ mbo dii ndu a mɛɛ Chɛhowa dimul ndu yɛ.”+ 27 Okoŋ mbo dimul puaa nduaa aa: “La bɛɛndial la naa chalaa sofɛlɔɔ o kɔɔ.” Mi puaa nduaa bɛɛndial ndu naa chalaa. 28 Mbo kua mbo kɔ saaluŋ dialuŋ vilɛiyoŋ muŋ o nɛiyo daŋgala, nduyɛ sofɛlɔɔ a kpɔkuŋndo wa isisi o muŋ ikɛi. Kɛ kpɔkuŋndo di dialuŋ vilɛi muŋ te, nduyɛ o dii vɛlɛ sofɛlɔɔ le. 29 Mi wana suaa hoo le Mɛlɛka wo chua dialuŋ vilɛi wana Mɛlɛka tonyaa, mbo heelu muŋ o sofɛlɔɔ choo. Mbo huŋ a muŋ o ndu lo chiee le mbo chaŋ ndu nduyɛ mbo kumbu ndu. 30 Mbo yambu dialuŋ ndɔŋ vilɛiyoŋ o sɛi o toosiaa le ndupila wo niŋ. Okoŋ ma wa ndu chaŋndo choo aa: “Kpokoo ya pɔmbɔŋ ndo, a kɔndu dɛnɛ fɔ!” 31 Mɛɛ o chii ndu kumbɔɔ, mbo dimul puaa nduaa aa: “Te I vi pɛ, la kumbu ya o sɛi ya kumbu hoo wana Mɛlɛka tonyaa wo niŋ. La yambu paala nilaŋ o paala ndɔlaŋ ikɛi.+ 32 Nyɛ o nyɛ Chɛhowa vem ndu mbo dimi a bandu luamaa lasalaa Bɛtɛl okɔɔ, o nɔ le peelɔŋndo. Nduyɛ, nyɛ o dimi a chiɛila lasooluula cho o fondaŋnda filioŋndaŋ+ o chiooŋ Sameeliaa niŋ okɔɔ laŋ bɛɛ, o nɔ le peelɔŋndo.”+

33 Mi che bɛɛ mi sɔɔŋ muŋ kpou yɔŋnuŋ, Masaa Chɛlobowam siŋgaŋ mbo mal dɛnɛ wɔɔŋ o wa choo wo le. Kɛ, mbo hiau lachi a wanaa soliaa lasalaa hɛlioo waŋnda tɛɛŋ,+ le salalaŋ solioo o fondaŋnda filioŋndaŋ. Wana o wana ndoo yeema dɔɔ pɛ le simnɔŋndo wana soliaa lasalaa, o siiŋguu ndu wana soliaa lasalaa. Okoŋ o dimi aa: “Ndu bɛɛ bɛnda mbo wa wana soliaa lasalaa le fondaŋnda filioŋndaŋ.”+ 34 Haki yuŋgu Chɛlobowam ndo+ luei hoo balaŋ leniŋ ndo tosa ni ma sɔla tambei, nduyɛ ma nyum pɔli o lɛŋndeŋ choo.+