Chemisi
5 Nya wanaa sulaa, la yaŋ ya nilaŋ. La chaŋ, mi la koŋul choo choo kpeleŋ le nyɛpalaa tual niŋ nya choo wo.+ 2 Sulta nyalaŋ la sɛ. Kaaŋguaa chii nyɛla chuɛɛnaŋnda nyalaŋ sɔm fo.+ 3 Kooliŋ nyaŋ a kaniŋ nyaŋ humboŋ sɔwa. Sɔwa koŋ cho nya seileŋ timbul ni, okoŋ mbo tɛɛmbuu nya. Nyɛm nya chuuŋgiaa woŋ cho wa maa leyiŋ o palɛi mɛɛlɛi niŋ.+ 4 La tofawɔ! Waŋ walaa kuulul nya chiɔɔŋ nyaŋ nda cho chaŋndo kpeekpei, kanifuule la kɛɛ le nda paawaa.* Nduyɛ chaŋ waŋ walla haa cho le malaa wo fuuluu choo choo di o Chɛhowa* lo, Mɛlɛka puaa chɔuwa.*+ 5 La cho yoomoo tueiyɔɔ yeela o lɛŋndeŋ ndeŋ choo, nduyɛ le nyɛ nɛŋi nya kɔltaŋ ndo kinɛi nya buulaŋ ni. Kɔlta nyalaŋ la cho ko mɛɛ visiaa chelul le paale nda cho nda diyɔɔ leŋ yɛ.+ 6 La cho wanaa sakpuaa yamaŋ kilullo, nduyɛ mi la wa nda diu diu wo. Le sabu koŋ o kɛɛ nya ni.
7 Lelaŋ puaapiliaa, la biunuŋ haaa mi paale Masanɔɔ cho miiŋgu naŋ ndeŋ le fuuluu.+ Mi wana wali ichiɔɔ lo biuwɔŋndo haaa mi piɔɔ lesial tasoo a piɔɔ lesial mɛɛlaa sia, le mi tɔlɔɔ ndɔɔ kom.+ 8 Nya bɛɛ la biunuŋ,+ nduyɛ mi la kɛsi kɔlta nyalaŋ, kanifuule boondii Masanɔɔ cho wa nanuŋ nde cho niŋ kpɛɛluŋ.+
9 Puaapiliaa, ŋɔɔchiaŋ wa nya tɛɛŋ vellaa velle le, yɔŋii nda kilul nya yamɛi.+ La tofawɔ! Wana kialaa ŋyamaa cho isisi o dio. 10 Puaapiliaa, la tol tamaselii wanaa ndaa suaa o diola Chɛhowa*+ laŋ niŋnda kɔɔli. Ma saŋga o nɛila bɔɔbɔɔ niŋ,+ kɛ ma biunuŋ.+ 11 Ŋ dimi maa wanaa biunuŋ nda cho a kɔl kɛndɛ.+ La tuei a biuwɔŋ Choobu wo okɔɔ,+ nduyɛ mi la cha mɛɛ Chɛhowa* dɔu ndu sala yɛ.+ Kanifuule, wana inyiɛɛyo a wana ikɛndɔɔ Chɛhowa* cho ni.+
12 Puaapiliaa, i hiou kpou ve, la mɛnaŋ a choo choo, ɔɔ a lɛŋndeŋ, ɔɔ a nyɛ o nyɛ cheleŋ te. Kɛ “Ei” nyaa wa ei, mi “Ɛ ɛ” nyaa wa ɛ ɛ,+ yɔŋii nda huŋ kilul nya yamɛi.
13 Wana cho pa nya tɛɛŋ mbo wa o saŋgaa niŋ? O nɔ mbo wa piɛileŋ.+ Wana cho pa nya tɛɛŋ mbo wa a kɔl kɛndɛ? O soli chondoŋ le Mɛlɛka saŋgalaa.+ 14 Wana cho pa nya tɛɛŋ mbo wa a naa? O veelu bɛnduaa kundaa+ ma piɛi le ndu, ma sui ndu chuɛiyaŋ+ o diola Chɛhowa* laŋ niŋ. 15 Piɛile yɔŋguŋ ndeŋ a laalaŋndo leŋ, le nɔla mi le siŋgi wana naa koŋ. Okoŋ, mi Chɛhowa* tosa mbo chɛŋ o peloŋ choo. Nduyɛ te ndoo tosa pɛ hakilaŋ, o sɔla malɔɔ hakioo.
16 Lelaŋ, la chɔɔmaŋ hakila nyalaŋ vellaa velle,+ nduyɛ mi la piɛi le nyapila vellaa velle, le halikpeŋ mi la seŋgu. Nyɔɔlu wana sakpoo nyɔɔlu Mɛlɛka o piɛileŋ niŋndo nɔ kpaayaa.+ 17 Wanachioo Ilaicha wa ni maa naa. Kɛ mɛɛ o piɛi a kɔl ndɔɔ kpou maa piɔɔ sia le, le wɔsilaŋ la yaa a paŋgoŋ ŋɔmpum, piɔɔ se o lɛŋnde leŋ niŋ te.+ 18 Okoŋ kɔɔli, mbo piɛi vɛlɛ, mi piɔɔ sia, nduyɛ mi lɛŋndeŋ le yɔŋgu kɔmndeŋ.+
19 Puaapiliaa niaa, wana o wana wa pɛ nya tɛɛŋ mbo mal tonyaa, kɛ mi wana cheleŋ miŋgi ndu o nɛi, 20 la sina pɛŋgu maa wana o wana miŋgi pɛ wana dɛnɛ wɔɔŋndo o nɛi,+ mɛɛ o piŋi wana koŋ. Nduyɛ mi Mɛlɛka mal wana dɛnɛ wɔɔŋ koŋ le hakila o tosa laŋ.+