Luku

9 Okoŋ, mi Chiisu veelu kiilaa 12 nda naapilɛ, mbo ke nda kpaayaa le nyinaa wɔɔŋnda+ kpou touwɔɔ a naalaŋ siŋgioo.+ 2 Mbo viam nda le waŋnda yooŋgu kɛndɔɔ dimullo a Masale Mɛlɛkaleŋ okɔɔ, a nda siŋgioo. 3 Mbo dimul nda aa: “La chua nyɛ o nyɛ le. La chua tinda le. La chua bɔlɔɔ le nyɛdiaa dɔwɔɔ leniŋ te. La chua beedii* ɔɔ ikani* le, kɛlɛŋgaa mi la chua domalaŋ la tiɔɔŋ.+ 4 Kɛ chiɛi o chiɛi nya luɛi pɛ, la lo loŋ haaa mi la faŋaŋ o fondaŋ koŋ.+ 5 Te wana o wana chɛl nya le, la wa faŋaŋndo o chiɛi koŋ ɔɔ o chiee koŋ niŋ pɛ, la koŋ chundu cho nya o ŋpelu wo, mbo wa seileŋ le nda.”+ 6 Okoŋ, ma kua o sɔndɔkɔltaŋ yooŋgu kɛndɔɔ dimioo vɛlɛ a waŋnda siŋgioo ba o ba fee.+

7 Mi Hɛlɔɔ,* masa ibuŋgaa tuɛi nyɛ o nyɛ wa yɔŋnɔŋ ndo. Nduyɛ mi kɔllo laasiaŋ ndu kpou, kanifuule waŋnda apum wa dimioo maa Chɔŋ miiŋgu yoomu ni.+ 8 Acheleŋnda wa dimioo maa Ilaicha miiŋgu yoomu ni, nduyɛ apum maa wanaa masindiaa ndaa suaa le Mɛlɛka wa o pilɛ.+ 9 Mi Hɛlɔɔ dimi aa: “Ya vem waŋnda ni ma kialu Chɔŋ bolleŋ.+ A nɛɛnɛ okɔɔ ya cho yɛ niko sɔɔŋ muŋ tueiyɔɔ?” Le hei, o wa kindiŋndo le Chiisu chɔɔ.+

10 Mɛɛ kiilaa Chiisu wa miiŋgu, ma doonuŋ ndu kona a nyɛ o nyɛ nda tosa.+ Okoŋ, mbo faŋa nda waŋnda tɛɛŋ ma kuaŋnuŋ o chiee bɛndoo niŋ diolaŋ aa Bɛtisaida.+ 11 Kɛ mɛɛ faŋgaa sina a ndi okɔɔ, ma tual ndu kɔɔli. Mbo bii nda nyɛkɛndɛi. Mbo kandu nda yooŋgu kɛndɔɔ dimullo a Masale Mɛlɛkaleŋ okɔɔ, nduyɛ mbo siŋgi wanaa wa a naalaŋ nda.+ 12 Mɛɛ paaleŋ le hiŋ le delɔɔ, mi kiilaa 12 nda huŋ ma dimul ndu aa: “Dimul waŋnda ma kuɛ o sɔndɔkɔltaŋ a o chieeŋ cho naa ikɛi yoŋ, ma kɔ nuuviaa yiyalaŋ a nyɛdiaa, kanifuule o fondaŋ yololiɔɔ naŋ cho ni.”+ 13 Kɛ mbo dimul nda aa: “La ke nda nyɛdiaa ma de.”+ Ma dimi aa: “Nyɛdiaa cheleŋ bɛɛ naa o ba, mɛɛ beedii kpuŋgbaŋ ŋuɛɛnoo hoo a suwaa ŋiɔɔŋnda haa. Mɛɛ dɔɔ miŋ kɔ piondu nyɛdiaa le waŋnda haa kpou.” 14 Waŋ piaanduaa wa loŋ le 5,000. Kɛ mbo dimul buɛiyaa nduaa aa: “La kɛsi waŋnda a kundalaŋ. Kunda kɛ kɛ ŋwaŋ 50.” 15 Okoŋ ma tosa lende. Mi waŋnda kpou chal. 16 Mbo chua beedii kpuŋgbaŋ ŋuɛɛnu koŋ a suwaa ŋiɔɔŋ nda, mbo heelu hɔlla choo choo, mbo piɛi. Mbo yimi yimi, okoŋ mbo ke buɛiyaa nduaa le ma piɔu waŋnda. 17 Mi nda kpou dia ma pum cha. Ma chuuŋgiaa o biŋgi biŋgi nda dema wo, mbo pia kambɛilaŋ 12.+

18 Okoŋ kɔɔli mɛɛ o wa piɛileŋ, mi buɛiyaa nduaa huŋ naa ndu chua, mbo nyuna nda aa: “Yɛɛ waŋnda cho yɛ dimioo a wana ya cho wo okɔɔ?”+ 19 Ma mulul ndu aa: “Apum cho dimioo aa Chɔŋ Wana Yiŋaa ŋ cho ni. Apum aa Ilaicha. Apum aa wana ndoo suaa sindɛ le Mɛlɛka wo opum miiŋgu yoomu ni.”+ 20 Mbo nyuna nda aa: “Kɛ nya yɛ, vɛɛ nya dimi yɛ? Wana maavɛɛ ya cho yɛ?” Mi Pitɛ muli aa: “Num cho Kiliti ni, wana Mɛlɛka pɔya wo.”+ 21 Okoŋ mbo sila nda o kala kala maa a dimul wana o wana a ndi okɔɔ le.+ 22 Mbo dimul nda aa: “Po wanachioo nɔ le saŋgaa sɔlaa tau, nduyɛ mi laŋgbaa kalla, masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda kɛɛ ndu, okoŋ ma dii ndu.+ Kɛ mbo miiŋgu yoomu o paale yaa ndɔleŋ choo.”+

23 Okoŋ mbo dimul nda kpou aa: “Wana o wana yeema pɛ mbo simnuŋ buɛi ni, o nɔ mbo kɛɛ ndupila,*+ nduyɛ lepaa o lepaa mbo chua yɔm ndɔ imɔnɔɔ,* mbo tol la kɔɔli.+ 24 Wana o wana kindiŋ pɛ le yoomu ndɔɔ piŋioo, o cho ndu hiɔlɔŋ. Kɛ wana o wana chɛl pɛ mi yoomu ndɔɔ hɛluŋ ndu le sabu nuu, o cho ndu piŋi.+ 25 Te waŋndo sɔla pɛ nyɔɔŋ o chieeŋndo niŋ kpou, kɛ nduyɛ mi yoomu ndɔɔ hɛluŋ ndu ɔɔ mi nyɛm muŋ laasiaŋ, tɔnɔ yɛɛ wa yɛ o keŋ niŋ?+ 26 Wana o wana yɔŋ pɛ siɔmbulaŋ le ya a diomnda nilaŋ, Po wanachioo bɛɛ te o hiŋ pɛ o biilu ndɔɔ niŋ, biilu Finya ndɔ wo, a maalikɛiyaa diandaa, o cho siɔmbulaŋ yɔŋ le ndu.+ 27 A tonya mi dimul nya, waŋnda apum cho nya tɛɛŋ, a vi niŋ kposoŋ te haaa ma che Masale Mɛlɛkaleŋ.”+

28 Mɛɛ palɛi hiou i ŋɔmaa o sɔɔŋ o dimi muŋ ndoŋ kɔɔli, mbo chua Pitɛ, Chɔŋ, a Chemisi ma hel nda ndaa o pembei choo le piɛileŋ.+ 29 Mɛɛ o wa piɛileŋ, mi hɔlaa nduaa siŋgaŋ, nduyɛ mi nyɛla wa ndu lekɔɔ laŋ la yɔŋnuŋ la humbu fo fo. 30 O lepilɛ niŋ kpe, mi puaa fula a ŋiɔɔŋ ma wa suukaŋndo a ndu. Muuse nda Ilaicha. 31 Paŋgeloo wa nda o balaa silɔ, nduyɛ a wa suukaŋndo a piɔm Chiisu ndoo nɔ le sɔlaa Chulusalɛm ndo okɔɔ.+ 32 A boondii keŋ, Pitɛ nda chaaŋaa nduaa waŋnuŋ o luaŋ yikpi. Kɛ mɛɛ nda tendu, ma cha Chiisu o naŋɔɔ ndɔɔ niŋ,+ nduyɛ ma cha puaa ŋiɔɔŋaa wa ndu isisi ikɛi ya. 33 Mɛɛ puaa ŋiɔɔŋaa kaŋ wa kɔŋndaŋ, mi Pitɛ dimul Chiisu aa: “Wana Pɛɛkaa, o bɛnda bɔɔ miŋ wa nanuŋ. Lelaŋ, ŋ taŋgullɔɔ tɛndiilaŋ* la yaa. O pilɛ le num, o pilɛ le Muuse, nduyɛ o pilɔɔ le Ilaicha.” Ndoo sina nyɛ o wa dimioo wo pɛŋgu le. 34 O lo suɛi, mi yumbu yumboo huŋ kumbu nda kpu. Mi siooŋnde bii nda. 35 Okoŋ, mi diomndo+ fula o yumbu yumbu koŋ niŋ, mbo dimi aa: “Po nuu cho hoo ni. Wana ya hɛli wo.+ La tuei ndu diom.”+ 36 Mɛɛ diomndo hoo soo, Chiisu ndupilɛ kpe nda che niŋ ni. Kɛ ma meinuŋ doŋ, a dimul wana o wana o teleŋ koŋ niŋ a nyɛ nda che wo okɔɔ le.+

37 Mɛɛ nda tol pembei diimandɔɔ, mi waŋnda faŋga bɛndoo komal ndu.+ 38 Mi po pilɛ dimi o faŋga koŋ tɛɛŋ aa: “Wana Pɛɛkaa, yandii tofallɔ ya po nuu hoo, ndupilɛ kpe ya nɔ ni.+ 39 Te nyina wɔɔŋndo chua ndu pɛ, o koŋul choo choo kpeleŋ, o biondu, hiiyo fula ndu o sondo. Mbo booluu ndu, nduyɛ o yala ndu malɔɔ le. 40 Mi nyɔɔlu buɛiyaa numnda le ma tou ndu nyina wɔɔŋndo hoo kɔɔli, kɛ a tiuba le.” 41 Okoŋ mi Chiisu dimi aa: “Ee nya waŋnda haa, baa la nɔ laalaŋ te? La cho wanaa tuunduɛi.+ Le vɛɛ kpɛ ya cho yɛ wa a nya latulu, mi wa nya biuwɔŋndo? Huŋ a po numndo nanuŋ.”+ 42 Kɛ mɛɛ poombɔɔ wa Chiisu sɔɔŋguuwo ikɛi, mi nyina wɔɔŋndo chua ndu, okoŋ mbo biondu, mbo del lɛŋ. Kɛ mi Chiisu tuau nyina wɔɔŋ koŋ ndu kɔɔli, mbo siŋgi ndu. Mbo miŋgi ndu finya ndɔ o ba. 43 Mi kɔndɔfillo bii waŋnda kpou a kpaaya bɛndu Mɛlɛkaa.

Mɛɛ kɔndɔfillo wa waŋnda le walta o wa tosaa laŋ kpou, mbo dimul buɛiyaa nduaa aa: 44 “La yaŋ nilaŋ nyɛkɛndɛi, nduyɛ mi la loonuŋ diomndaŋ ndaŋ, kanifuule a cho hunɔɔ Po wanachioo pisi waŋnda o ba.”+ 45 Kɛ a bii nyɛ Chiisu wa nda dimullo wo bila le. I wa ko maa suɛi viaŋnaŋ le nda, yɔŋii nda bii ndi bila. Nduyɛ siooŋnde wa nda le ndu nyunaa.

46 Okoŋ mi buɛiyaa nduaa kandu diomndaŋ hiŋaŋndo le wana cho wana bɛndoo nda tɛɛŋ ndo.+ 47 Kɛ mɛɛ Chiisu sina yiyaŋnda ndalaŋ, mbo chua poombɔɔ, mbo simiŋ ndu ikɛi. 48 Okoŋ mbo dimul nda aa: “Wana o wana chɛl poombɔ pɔmbɔ waa nuaa le sabu nuu pɛ, mɛɛ ya o chɛl koŋ ni. Nduyɛ wana o wana chɛl la pɛ, mɛɛ wana vem ya wo o chɛl vɛlɛ koŋ ni.+ Wana chɔm pɛ maa ndu cho o pɔmbɔ nya tɛɛŋ kpou ni, mɛɛ ndu wa niŋ wana bɛndoo le nya ni.”+

49 Okoŋ mi Chɔŋ dimi aa: “Wana Pɛɛkaa, miŋ cha waŋndo nyinaa wɔɔŋnda touwɔɔ o diola numndaŋ niŋ, kɛ miŋ kuuna ndu, kanifuule o cho naa choo le.”+ 50 Kɛ mi Chiisu dimul ndu aa: “La kuuna ndu le, kanifuule wana o wana simul nya le, mɛɛ le nya o cho ni.”

51 Mɛɛ teleŋndo wa niŋ fuuluuwo le mi Chiisu helnuŋ o choo choo niŋ,+ mbo kɛɛsiaa a kɔl ndɔɔ kpou le kɔlaŋ Chulusalɛm. 52 Okoŋ mbo viam pɔɔ waŋnda ndu lachi. Ma kua o sɔndɔkɔlɔ Sameeliaŋnda niŋ, le ma bɛɛndiaa sɔɔŋ le hunɔɔ ndɔɔ. 53 Kɛ a yiya ndu le,+ kanifuule ndoo kɛɛsiaa le kɔŋndaŋ Chulusalɛm. 54 Mɛɛ buɛiyaa nduaa, Chemisi nda Chɔŋ+ che hei, ma dimi aa: “Masanɔɔ, a yeema miŋ veelu yiŋndeŋ o choo choo niŋ mi le huŋ lom nda?”+ 55 Mbo muliŋ o nda lo, mbo kpaa nda. 56 Okoŋ ma kuaŋnuŋ o sɔndɔkɔlɔ cheleŋ.

57 Mɛɛ nda wa kɔlaŋ o nɛi, mi wana pilɛ dimul Chiisu aa: “Ba o ba ŋ kɔ, I cho num tolɔɔ kɔɔli.” 58 Kɛ mi Chiisu dimul ndu aa: “Visiaa yonduaa nɔ fondaŋnda lɔlaalaŋ, mi youwa bɛɛ nɔ waaŋnde. Kɛ Po wanachioo ndu nɔ naa yambaa lebol te.”+ 59 Okoŋ mbo dimul wana cheleŋ aa: “Huŋ ma tol la kɔɔli.” Mi poo dimul ndu aa: “Masanɔɔ, I kua wɔ fɛlɛŋ mi kɔ kumbu finya nuu.”+ 60 Mi Chiisu dimul ndu aa: “Wanaa vi wa+ kumbu wanaa ndaa vilɛiya, kɛ num kɔ ma kɔ dimul waŋnda a Masale Mɛlɛkaleŋ okɔɔ.”+ 61 Mi wana cheleŋ bɛɛ dimul ndu aa: “Masanɔɔ, I cho num tolɔɔ kɔɔli, kɛ I kua wɔ fɛlɛŋ mi kɔ choŋguŋ yuŋgu nuu.” 62 Mi Chiisu dimul ndu aa: “Wana o wana kandu pɛ waa, nduyɛ mbo tofaŋ kɔɔli+ le nyɛm o mɛi yoŋ, o bɛnda le Masale Mɛlɛkaleŋ te.”+