Chɔŋ Tasoo

1 Ŋ cho nya poonyiallo a wana wa o kandɔŋndo wo okɔɔ, wana naŋ tuei o suɛi, miŋ cha ndu a lehɔl, nduyɛ miŋ pilaŋ ndu a ba wo. Wana koŋ hiŋ a yooŋgu yɔŋgu yoomoo wo ni.+ 2 Yoomoo hoo chɔɔmuŋ o naa lo, miŋ cha ndu, miŋ wa seileŋ timbioo a ndu okɔɔ,+ nduyɛ miŋ wa nya dimullo a yoomu fafɛɛŋndo hoo okɔɔ.+ O Finyaa lo yoomu fafɛɛŋndo hoo chɛŋ ni, mbo chɔɔmuŋ o naa lo. 3 Nyɛ naŋ che koŋ miŋ tuɛiyo, ndu naŋ cho nya hoo dimullo ni,+ le mi nya bɛɛ wa diompilɛ a naa. Ŋ cho diompilɛ naa hoo tueiyɔɔ yeela a Finyaa nda Po ndɔɔ Chiisu Kiliti.+ 4 Ŋ cho nya sɔɔŋ muŋ poonyiallo le miŋ wa a nyaale tau tau.

5 Yooŋgu o dimul naa koŋ miŋ wa nya dimullo wo cho hoo ni: Nyɛ teŋgaa Mɛlɛka cho ni.+ Nduyɛ nyumma cho o ndu niŋ kposoŋ te. 6 Te ŋ dimi pɛ aa, “Ŋ cho diompilɛ a ndu,” kɛ miŋ wa wɔ kelaa o nyumndaŋ niŋ, mɛɛ choolaŋ naŋ cho dimioo ni. Ŋ cho nyɛ tonyaa dimi wo tosa le.+ 7 Kɛ te ŋ wa pɛ kelaa o nyɛ teŋgaa niŋ mɛɛ ndu bɛɛ cho o nyɛ teŋgaa niŋ yɛ, mɛɛ ŋ cho wa o diompilɔɔ niŋ vellaa velle. Nduyɛ kooma Chiisu Po ndɔ waŋ ma wɔɔsuu hakila naalaŋ kpou ni.+

8 Te ŋ dimi pɛ aa, “Ŋ nɔ haki le,” mɛɛ huiyo naŋ cho naapila ni.+ Nduyɛ, tonya cho naa o lakɔl te. 9 Mɛlɛka cho sakpo, nduyɛ o feŋaŋ o lediom te. Lelaŋ, te ŋ chɔɔmuu pɛ hakila naalaŋ, o tiuba mbo mal naa haki. Okoŋ, mbo mala naa miŋ soli balaŋ o yɔŋ wɔɔŋndo niŋ.+ 10 Te ŋ dimi pɛ aa, “Ŋ tosa wɔ haki le,” mɛɛ Mɛlɛka naŋ cho koŋ siiŋguuwo wana lachoowaa ni. Nduyɛ diom ndɔɔ cho naa o lakɔl te.