Maatiu

18 A teleŋ koŋ, mi buɛiyaa Chiisu wa sɔɔŋguu ndu ikɛi ma nyuna ndu aa: “O nɛɛnɛ kpeekpei cho yɛ wana bɛndoo o Masale Mɛlɛkaleŋ niŋ choo choo?”+ 2 Okoŋ, mi Chiisu veelu poombɔ pɔmbɔɔ mbo simi ndu nda lachi. 3 Mbo dimi aa: “A tonya mi dimul nya, te o cho mi la muliŋ,* mi la simnuŋ maa chuaambuaa pɔmbuaa le,+ kposoŋ bɛɛ la luei niŋ o Masale Mɛlɛkaleŋ niŋ o choo choo niŋ te.+ 4 Lelaŋ, wana o wana tusiŋ pɛ maa poombɔ pɔmbɔɔ hoo, mɛɛ ndu cho wana bɛndoo o Masale Mɛlɛkaleŋ niŋ choo choo ni.+ 5 Nduyɛ, wana o wana chɛl poombɔ pɔmbɔ waa nuaa le sabu nuu pɛ, mɛɛ ya o chɛl koŋ ni. 6 Kɛ wana o wana tosa pɛ mi wanaa pɔmbuaa dɔu haa laalaŋndo o ya niŋnda o pilɛ bɛɛ mal laalaŋ ndɔɔ, o cho fisa ma baa ndu pou bɛndoo* o labolo, ma kɔ mal ndu o mɛŋma ihɛllaŋ niŋ.+

7 “Kpundɔɔ cho le chieeŋndo le mɛɛ nyɛm cho leniŋ ndoŋ tosa mi waŋnda boŋ o Mɛlɛka piɛiyo niŋ yɛ! A tonya, nyɔŋ muŋ cho wa, kɛ kpundɔɔ cho le wana tosa mi waŋndo mal laalaŋ ndɔɔ wo! 8 Kɛ nduyɛ, te ba numndo ɔɔ pelii numnde wa pɛ tosaa le ma luɛi o hakioo niŋ, mɛɛ kiolu ba koŋ ɔɔ pelii keŋ kpali ma viou.+ O bɛnda ma huŋ sɔla yoomoo a baa o pilɛ ɔɔ pelei i pilɛ, mbo hiau tambii fafɛɛŋnde* sɔlaa a balaŋ la tiɔɔŋ ɔɔ peloŋ ŋ muuŋ.+ 9 Nduyɛ te hɔlte numndeŋ le wa pɛ tosaa le ma luɛi o hakioo niŋ, mɛɛ kala leŋ po ma viou. O bɛnda ma huŋ sɔla yoomoo a hɔlteŋ le pilɛ, mbo hiau kɔlaŋ Kɛhɛna* a hɔltaŋ la tiɔɔŋ.+ 10 Chuaambuaa pɔmbuaa haa kinɛi, o pilɛ bɛɛ la chua ndu chɔdɔ le. Kanifuule, mi dimul nya, maalikɛiyaa ndaa o choo choo niŋ cho Finya ni cho o choo choo niŋndo o hɔl teleŋ o teleŋ.+ 11* ——

12 “Vɛɛ nya yiyaŋ yɛ? Te waŋndo nɔ pɛ saa 100, mi o pilɛ luusiaŋ,+ baa o mɛi saa 99 o pembei choo, mbo kɔ nuuviaa o luusiaŋ ndo le?+ 13 A tonya mi dimul nya, te o saaluŋ ndu pɛ, mbo dɔɔnuŋ nyaale tau le saa koŋ, mbo hiou saa 99 luusiaŋ te wa. 14 O nɛi pilɛ koŋ choo, Finya nuu* o choo choo niŋ yeema mi chuaambuaa pɔmbuaa haa o pilɛ bɛɛ luusiaŋ te.+

15 “Te puaapilɛnɔ numndo tosal num pɛ suɛi wɔɔŋnde, veelu ndu nya ŋiɔɔŋ kpe ma chɔm ndu nyɛ o tosa wo.*+ Te o yaŋ num nilaŋ pɛ, mɛɛ a mala puaapilɛnɔ numndo le mbo tosa nyɛ cho o kɛndɔɔ wo.+ 16 Kɛ te o yeŋ num lani le, a veelu wana pilɛ ɔɔ wanaa ŋiɔɔŋ. Okoŋ, te wanaa ŋiɔɔŋ ɔɔ wanaa yaa timbi seileŋ pɛ, tonyaa nɔla mbo cheŋnuŋ o suɛi keŋ niŋ.+ 17 Te o yeŋ nda lani le, a dimul kundaa.* Te o yeŋ vɛlɛ kundaa lani le, a chua ndu maa wana chieeŋndo*+ ɔɔ maa wana biyaa paawaa.*+

18 “A tonya mi dimul nya, nyɛ o nyɛ nya yii pɛ o lɛŋndeŋ choo, o cho niŋ wa o yiyaa o choo choo niŋ. Nduyɛ nyɛ o nyɛ nya timbi pɛ o lɛŋndeŋ choo, o cho niŋ wa o timbiaa o choo choo niŋ. 19 A tonya mi dimul nya vɛlɛ maa, te wanaa ŋiɔɔŋ o lɛŋndeŋ choo chɛlaŋ pɛ le nyɛ o nyɛ cho nyɛ sɔvɛ nyunaa o piɛileŋ niŋ, Finya nuu o choo choo niŋ cho nda ndu ke.+ 20 Kanifuule, ba o ba buɛiyaa niaa chuuŋgiaŋ pɛ, a wa a ŋiɔɔŋ, a wa a yaa,+ I cho nda wa tɛɛŋ.”

21 Okoŋ mi Pitɛ huŋ naa Chiisu chua mbo nyuna ndu aa: “Masanɔɔ, te puaapilɛnɔ nuu tosa pɛ hakioo a ya, vɛɛ kpɛ ya nɔ yɛ mi mal ndu haki? Baa bɛmbɔɔ le ŋɔmmɛu?” 22 Mi Chiisu mulul ndu aa: “O cho ko bɛmbɔɔ le ŋɔmmɛu le, kɛ bɛmbɔɔ 77.+

23 “Le saboo hoo, Masale Mɛlɛkaleŋ o choo choo niŋ le cho ko maa masa pilɛ, o veelu buɛiyaa nduaa le ma huŋ dɔɔnuŋ kona nyɛ ndɔ sɔlaa wo. 24 Mɛɛ o kandu sɔɔŋ yaasiaa, ma chuu ndu buɛiyaa nduaa kaŋ o pilɛ, o ndoo nɔ le ndu paawaa* talɛŋndoŋ 10,000* wo. 25 Kɛ le mɛɛ buɛiyo hoo ndoo nɔ nyɛsɔlaa le kuee koŋ solioo le yɛ, mi masanɔ ndɔɔ dimi maa ndu ni, laa ndɔ ni, chuauwaa nduaa ni, a nyɛ o nyɛ ndoo nɔ, a pisi ma huŋ soli kuee ndɔɔ.+ 26 Lelaŋ, mi buɛiyo hoo del ndu o labɛŋguniŋ mbo nyɔɔlu ndu aa: ‘Yandii biunuŋ ya. I cho kuee numndo soli kpede.’ 27 Okoŋ, mi nyiɛɛye bii masanɔ ndɔɔ. Mbo mal ndu fasɛi a nyɛsɔlaa wa ndu kuee wo kpou mbo kuaŋnuŋ.+ 28 Mɛɛ buɛi koŋ o fula, mbo cha chaaŋ ndɔ buɛiyo, o ndoo nɔ kuee ndɔɔ dinaluɛiyoŋ 100* wo, mbo kɔ saa ndu bololaŋ. Mbo dimi aa, ‘Paawa nyɛsɔlaa kɛ kɛ ŋ nɔ le ya.’ 29 Okoŋ, mi chaaŋ ndɔ buɛiyo del ndu o labɛŋguniŋ mbo kandu ndu nyɔɔloo aa, ‘Yandii biunuŋ ya. I cho kuee numndo soli.’ 30 Kɛ mbo kɛɛ kpooŋ. Okoŋ mbo kɔ wou ndu o chiɛi manyumndo niŋ le mbo lo loŋ haaa mbo soli kuee ndɔɔ. 31 Kɛ mɛɛ chaaŋaa nduaa buɛiya che nyɛ yɔŋnuŋndo, ma tambu kɔl tau tau. Okoŋ, ma kɔ dimul masanɔ ndaa nyɛ o nyɛ yɔŋnuŋ. 32 Le hei, mi masanɔ ndɔɔ veelu ndu, mbo dimul ndu aa: ‘Num buɛi dɛnɛ wɔɔŋndo ŋ cho ni. Mɛɛ ŋ nyɔɔlu ya, mi mal num haki le kuee ni wa num choo wo kpou. 33 Le yɛɛnɛ num bɛɛ tuiinuŋ chaaŋ num buɛiyo inyiɛɛ, mɛɛ ya tuiinuŋ num inyiɛɛ yɛ le?’+ 34 Okoŋ, mi masanɔ ndɔɔ tuulu kɔl tau, mbo dimi maa a kɔ mal ndu o chiɛi manyumndo niŋ, mbo lo loŋ haaa mbo soli kuee ndɔɔ kpou. 35 Lende koni Finya nuu o choo choo niŋ cho tosa a nya ni,+ te la mel puaapilɛnɔ nyaa haki a kɔllo kpou le.”+