Ditɔnɔmii

34 Okoŋ, mi Muuse chaŋ o lɛŋnde dɛŋgbɛleŋ Mowaabi, mbo kɔ hel o Pembii Nibo Ve choo,+ o Pembii Pisika Ve bolleŋ,+ ba Chɛluiko wo.+ Nduyɛ mi Chɛhowa chɔm ndu lɛŋndeŋ kpou, chɔŋ Kiliaadi haaa kɔ Daŋ,+ 2 lɛŋnde Nafitalii leŋ, lɛŋnde Ifiluem ndeŋ, lɛŋnde Manaasɛ leŋ, a lɛŋnde Chuda leŋ kpou, haaa kɔ bii o pee mɛŋma ihɛllo* ba paaleŋ le del lo,+ 3 tanda Nɛkɛbi wo,+ tanda+ Chɔɔdaŋ ndo, lɛŋnde dɛŋgbɛleŋ Chɛluiko a chiee bɛndu mawauwo haaa kɔ bii Sowaa.+

4 Okoŋ, mi Chɛhowa dimul ndu aa: “Lɛŋndeŋ ndeŋ ya chuel Ebilaham, Aase, a Chekɔpu buŋgɛi ni, mi dimul nda aa, ‘Lɛŋndeŋ ndeŋ ya cho chuauwaa nyaa mamaa* ke ni.’+ I tosa ma cha leŋ a lehɔl pɛɛŋ, kɛ a cho taŋɔɔ loŋ te.”+

5 Okoŋ kɔɔli, mi Muuse buɛi Chɛhowa wo wu o pembei choo loŋ, o lɛŋnde Mowaabi leŋ niŋ, a mɛɛ Chɛhowa dimi yɛ.+ 6 Mbo kumbu ndu o kpoloŋndo niŋ o lɛŋnde Mowaabi leŋ, Bɛti-piɔɔ ikɛi. Nduyɛ wana o wana sina naa sɛi ndɔɔ cho wa le, haaa a paale hauleŋ ndeŋ.+ 7 Muuse wa wɔsilaŋ 120 mbo wu.+ Mi ndoo che wɔ nyɛkɛndɛ walaŋ, nduyɛ ndoo nɔ wɔ yoomuaŋ tau. 8 Mi waŋnda Isɔluɛi chaŋ Muuse o lɛŋnde dɛŋgbɛleŋ Mowaabi le palɛi 30.+ Okoŋ, mi biisi ndɔɔ chuu.

9 Chɔɔsuaa po Nuŋ ndo, ndoo nɔ taasi Mɛlɛkaa tau. Kanifuule, mi Muuse handu ndu baa choo,+ nduyɛ mi Isɔluɛiya kandu ndu nilaŋ yaŋɔɔ, okoŋ ma tosa mɛɛ Chɛhowa ndoo dimul Muuse yɛ.+ 10 Kɛ wana suaa le Mɛlɛka wo, o pilɛ bɛɛ sɔlaŋ lɛ o Isɔluɛi niŋ maa Muuse,+ o Chɛhowa ndoo sina nyɛkɛndɛiyo* le.+ 11 Mbo tosa sɔɔŋ kɔndɔfilloŋ a kaamaalaŋ, la Chɛhowa vem ndu le tosaa o lɛŋnde Ichipi leŋ niŋndaŋ kpou. Nduyɛ mbo tusi Feloo, buɛiyaa nduaa, a wana o wana o lɛŋnde leŋ niŋ nyɛpalaa choo.+ 12 Sɔɔŋ kɔndɔfiliŋ bɛnduŋ Muuse tosa muŋ a kpaaya bɛndoo woŋ, Isɔluɛiya kpou o hɔl o tosa muŋ ni.+