Luomaŋnda

16 I yeema mi chɔm nya Fobi, yema naa cho wallo o kundaa Sɛŋkiliaa niŋndo.+ 2 Yandii, la bii ndu nyɛkɛndɛi maa chaaŋ nya wana laalaŋndo o Masanɔɔ niŋ. La ke ndu mala kɛ kɛ o yeema pɛ,+ kanifuule o mala niŋ wanaa bɔɔbɔɔ. Ya bɛɛ o mala ya niŋ.

3 La yil la Pilisika* nda Akuila,+ chaaŋaa niaa walla le Chiisu Kiliti. 4 Nda bɛɛ luei niŋ yoomula ndalaŋ o kpundɔɔ niŋ le ya.+ Nduyɛ ya a kundala wanaa cho ŋChuu le wa kpou mel nda balikaa. 5 La yil la kunda bɔɔŋiaŋ o nda lo chiɛiniŋ ndo.+ La yil la chaaŋ ni kaalaa Epinɛtɔsi. Ndu cho wana tasoo le simnɔŋndo buɛi Kiliti wo o Eesiaa niŋ ni. 6 La yil la Meele, o tosa niŋ wallo kalaŋ le nya wo. 7 La yil la Andulɔnaikɔɔ nda Chuniasi, wanaa niaa+ naŋ wa o chiɛi manyumndo niŋ latulu wa. Kiilaa Chiisu wa sina nda nyɛkɛndɛi, nduyɛ nda fɛlɛŋ simnuŋ buɛiyaa Kiliti wa a ya.

8 La yil la Amipiliatɔɔ, chaaŋ ni kaalaa o Masanɔɔ niŋ. 9 La yil la Ɔbanɔɔ, chaaŋ naa wallo o Kiliti niŋ, a chaaŋ ni kaalaa Sitakii. 10 La yil la Apɛlɛɛ, o chɔm kpendekele maa le Kiliti o cho ni wo. La yil la wanaa cho o yuŋgu Aluitɔbulɔɔ wo niŋnda. 11 La yil la Hɛlodiɔŋ, wanayɛi nii. La yil la wanaa cho o yuŋgu Naasisɔɔsi wo niŋ ma wa buɛiyaa Masanɔɔ wa. 12 La yil la Tilifaina nda Tilifosa, waŋ laanduaa cho wallo kalaŋ le Masanɔɔ wa. La yil la Paasi, chaaŋ naa kaalaa. Ndu bɛɛ tosa niŋ wallo kalaŋ le Masanɔɔ. 13 La yil la Lufɔɔsi, wana Masanɔɔ hɛli wo a kala ndɔ, o chua ya maa po ndɔ wo. 14 La yil la Asiŋkilitɔɔ, Filikɔŋ, Hɛmɛsi, Patilobaasi, Hɛmasi, a puaapiliaa cho a nda latulu wa. 15 La yil la Filolokɔɔsi nda Chuliaa, Niluɛsi nda yema ndɔ, a Olimpaasi, a puaapiliaa* cho a nda latulu wa kpou. 16 La yilaŋ vellaa velle o kaalaa niŋ. Kundala cho le Kiliti laŋ kpou la yil nya.

17 Puaapiliaa, I cho nya silaa le mi la mandaŋ a wanaa tosa mi piɔuwaŋndo luɛi o kundaa niŋ, nduyɛ ma paaliaŋ laalaŋ chaanda wa. A bii pɛ a pɛɛsa pɛɛkula nya sɔla laŋ. La holnuŋ wanaa waa lende le.+ 18 Wanaa waa lende, chiaa nda cho ni le yeemaŋ ndaŋ,* kɛ o cho le Masanɔ naa Kiliti le. Ma dimul wanaa bala ndala cho o dɛnɛ wɔɔŋ niŋ te wa sɔɔŋ yeelɛiyoŋ a choolaŋ le nda huiyo. 19 I cho a nyaale le nya, kanifuule wana o wana sina maa wanaa diikaŋnda nya cho ni. I yeema nya mi la wa wanaa taasi le tosaa nyɛ cho o kɛndɔɔ wo. Nduyɛ isɔɔ o isɔɔ cho suɛi wɔɔŋ, bala nya wa leniŋ te.+ 20 Mɛlɛka yɔŋgu kɔl nyuloo wo cho suŋ hunɔɔ Setana tɛɛmbuu+ o peluŋ nyaŋ bɛŋgu. Maa kɛndɛi bɛnduii Masanɔ naa Chiisu ve wa a nya fɔ!

21 Chaaŋ ni wallo Timoti yil nya. Wanayaŋ nuŋ Lusiɔɔ, Cheesiŋ, a Sosipata bɛɛ yil nya.+

22 Ya Tɛsiɔɔ, wana poonyiaa yauwo hoo wo bɛɛ yil nya o diola Masanɔɔ niŋ.

23 Kayɔɔ,+ wana ya cho o bɛŋgu choo wo yil nya. O ndu lo chiɛiniŋ kundaa kpou bɔɔŋiaŋ ni. Iluatɔsi, wana kɛsiaa ŋkanioo* yil nya. Kuaatɔɔ nda pɔmbɔ ndɔ bɛɛ yil nya. 24* ——

25 Mɛlɛka nɔla mbo tosa mi la sim yi a dialuŋ kala sanaa a yooŋgu kɛndɛ ya cho nya dimullo a Chiisu Kiliti okɔɔ wo. Yooŋgoo hoo tosa mi sɔɔŋ wa ŋ viaŋnaŋ+ kani masindɛ a Mɛlɛka okɔɔ woŋ kandu chɔɔmɔŋndo o pɔmpɔmbɔ. 26 Kɛ suŋ suŋ niŋ, nyɛ wanaa ndaa suaa le Mɛlɛka wa dimi mbo wa o Yau Mɛlɛkaa niŋndo chɔɔmuu yooŋgoo hoo. Mɛlɛka naa cho le fɛɛŋ a fɛɛŋ ndo dimi maa naŋ dimul waŋnda o kaalaŋ niŋ kpou yooŋgoo hoo le ma laalaŋ, nduyɛ ma diikuŋ ndu. 27 Mɛlɛka nɔ hoo taasioo ndupilɛ kpe wo,+ saŋgalaa cho le ndu o diola Chiisu Kiliti laŋ niŋ le fɛɛŋ a fɛɛŋ. Amiina.*