Kɔliŋtiaŋ Diiŋ Ndɔɔ
10 Ya Pɔɔl, I cho suɛi o nya lo o nɛi tusiaŋ niŋ, mɛɛ Kiliti cho wana tusiaŋ a wana ikɛndɛ yɛ.+ Apum dimi maa te I wa nya pɛ tɛɛŋ, I nɔla mi soo faŋ faŋ te.+ Kɛ te I faŋaŋ pɛ, I soo o yaulaŋ niŋ o kala kala naa nya chua.+ 2 Waŋnda apum cho dimioo maa o yiyaŋ iwana chieeyaa niŋ naŋ tosa sɔɔŋ ni. I nɔ tiindaŋndo maa te I hiŋ pɛ o nya lo, I nɔ niŋ sabu ya sila nda o kala kala le. 3 Mi che bɛɛ waŋnda chieeya naŋ cho ni, kɛ chɔulaba naŋ cho wo, o cho o nɛi iwana chieeya niŋ te naŋ cho ndu le. 4 Kanifuule, nyɛm chɔu naŋ cho chɔulabaa woŋ, ŋ cho nyɛm chɔu ŋwaŋchiee le,+ kɛ nyɛm chɔu Mɛlɛka ke naa woŋ.+ A muŋ naŋ tɛɛmbuu nyɛm nɔ kpaayaa tau woŋ ni. 5 Ŋ cho yiyaŋnda lachoowalaŋ a sɔɔŋ yoŋgaŋ kɛ kɛ, ŋ simul kɔl kalu Mɛlɛkaa woŋ tɛɛmbuuwo.+ Nduyɛ yiyaŋnda waŋnda nɔ laŋ kpou, ŋ cho laŋ siiŋguuwo yiyaŋnda Kiliti laŋ. 6 Te ŋ che dɔɔ pɛ maa la tosa nyɛ naŋ dimul nya wo, naa bɛɛ ŋ bɛɛndiaŋ le miŋ tusi wanaa kɛɛ naa diom nda nyɛpalaa choo.+
7 Mɛɛ nya cha sɔɔŋ yɛ nya kialu yamaŋ ni. Te wana o wana lɔɔŋ pɛ ibuŋ mbo dimi maa le Kiliti o cho ni, wana koŋ kɛsiŋ o kɔl maa mɛɛ ndu cho le Kiliti yɛ, lende koni naa bɛɛ cho le ndu ni. 8 Masanɔɔ ke naa kpaayaa le nya yoomuaŋ lueiyo, kɛ o cho le nya kɔl tɛɛmbuu le.+ Lelaŋ, o yɔŋ bɛɛ mi kelu yoŋgaa nyɛɛmbɔ a keŋ okɔɔ, I tulnuŋ lasiɔmbu le. 9 Kɛ I yeema mi la yiyaŋ maa le nya siooŋnde lueiyo le ya cho nya yaulaŋ poonyiallo le. 10 Kanifuule, a cho dimioo aa: “Yaula Pɔɔl poonyiaa laŋ la tuulu, nduyɛ la nɔ kpaayaa. Kɛ te ndupila wa naa tɛɛŋ pɛ, wana chi ndu chɔ koŋ te. Nduyɛ o chiee bɛɛ isɔɔ faŋga tɛɛŋ te.” 11 Wanaa kaŋ kɛsiŋ o kɔl maa nyɛ naŋ dimi o yaulaŋ niŋndo, ndu koni naŋ tosa ni te ŋ wa nya pɛ tɛɛŋ.+ 12 Kɔl del naa bɛɛ le muuliaŋndo a wanaa heelaŋnda, ɔɔ miŋ tuu naapila a nda le.+ A bii pɛ, a keŋnuŋ di mɛɛ nda yeema yɛ, nduyɛ ma tuunuŋ ndapila mɛɛ nda yeema yɛ. Waŋnda haa nɔ kɔl kalu kposoŋ te.+
13 Naa naa, ŋ kilu yoŋgaa miŋ hiou pɛŋgula naalaŋ te. O fondaŋ Mɛlɛka ke naa wo naŋ mɛɛlu ni. Nduyɛ nya bɛɛ cho o fondaŋ koŋ niŋ.+ 14 Teleŋ naŋ hiŋ o nya lo wo, o cho pɛŋgula naalaŋ te naŋ hiou le, kanifuule naŋ wa wanaa tasiaa le nya yooŋgu kɛndɔɔ dimullo a Kiliti okɔɔ ni.+ 15 Lelaŋ, ŋ cho yoŋga kiolɔɔ a wali wana cheleŋ tosa o fondaŋ naŋ nɔ le lakɔ le wo le. Kɛ ŋ nɔ tiindaŋndo maa la cho hiouwɔɔ lachi a kaloo o laalaŋ nyaa niŋ, nduyɛ maa wali naŋ tosa o tanda naa niŋndo cho hiouwɔɔ lachi a pɛŋgɛlaŋndo. Okoŋ, miŋ chɔɔlu wallo sɔla tau le tosaa. 16 Okoŋ kɔɔli, ŋ nɔla miŋ hiou nya choo miŋ kɔ dimi yooŋgu kɛndɔɔ o lɛŋii cheleŋ niŋ. Hei tosa ŋ kilu yoŋga a nyɛ chaanda chii niŋ tosa o tanda ndaa niŋndo le. 17 I cho i poonyiaa aa: “Wana wa pɛ yoŋgaa kiolɔɔ, o kiolu yoŋgaa o Chɛhowa* niŋ.”+ 18 Kanifuule, Chɛhowa* hɛli wana o chɛllo ni,+ kɛ o chɛl wana kialu yoŋgaa o ndupila niŋndo le.+