Sɔɔŋ Chɔɔmaŋndoŋ

16 Okoŋ, mi tuɛi diomndo fulaa o chiɛi Mɛlɛkaa* niŋ,+ mbo wa maalikɛiyaa ŋɔmmɛuwa dimullo choo choo kpeleŋ aa: “La kɔ hulu hɛŋgɛila ŋɔmmɛula tumbe Mɛlɛkaa cho leniŋ ndaŋ o chieeŋndo choo.”+

2 Mi o tasoo kɔ hulu hɛŋgɛi ndɔɔ o chieeŋndo choo.+ Mɛɛ o hulu, mi pauvii wɔɔŋ wɔɔŋnde+ fula wanaa ndaa nɔ pondale visi biyaa wa,+ a wanaa wa velaŋ ndɔɔ piɛiyo wa lekɔɔ.+

3 Mi o diiŋ ndɔɔ hulu hɛŋgɛi ndɔɔ o pee mɛŋma ihɛllo niŋ.+ Mɛɛ o hulu, mi pioo simnuŋ koowaŋ+ naŋ chaa waŋndo nda dii ni. Mi nyɛ o nyɛ yoomaa cho o pee mɛŋma ihɛllo niŋ wu.+

4 Mi o yaa ndɔɔ hulu hɛŋgɛi ndɔɔ o peelaŋ a o sooŋnda mamɛŋndaŋ niŋ.+ Okoŋ mi la simnuŋ koowaŋ.+ 5 Mi tuɛi maalikɛinɔ ndoo nɔ kpaayaa mɛŋndaŋ choo wo dimioo aa: “Mɛlɛka, num cho pɛŋgoo hoo, nduyɛ ma wa kani masindɛ wo,+ ma chɔm lo lechoo wo,+ nduyɛ a cho sakpoo.+ A kilul waŋnda haa yamaŋ muŋ, 6 kanifuule ma diu diu wanaa diandaa, a wanaa ndaa suaa le numnda.+ Lelaŋ ŋ ke nda koowaŋ ni le ma kol.+ Keŋ bɛnda bɔɔ le nda ni.”+ 7 Mi tuɛi bandu luamaa lasalaa dimioo aa: “Chɛhowa,* Mɛlɛka Kpaaya Kpou Kpou Wo,+ yamaŋ numndoŋ cho sakpo, nduyɛ ŋ cho tonya.”+

8 Mi o hiɔɔloo hulu hɛŋgɛi ndɔɔ o paaleŋ choo.+ Okoŋ, mi paaleŋ le sɔla dioo le mi le lumi waŋnda chieeya. 9 Mi haŋgul tuu bɛndoo luam waŋnda chieeya. Ma tɛɛmbuu diola Mɛlɛka laŋ, o tusi nda kpundɛlaŋ ndaŋ choo wo. Kɛ a koŋ kpou, a wookuŋ ma saŋgala ndu le.

10 Mi o ŋuɛɛnoo hulu hɛŋgɛi ndɔɔ o kpeŋgbei* lemasa visi biyaa choo. Okoŋ, mi masale ndɔleŋ le piimiaa kpilo.+ Ma kandu diɔɔmuii ndɛi somndo a nyɛ nɛiyaa wa nda choo wo. 11 Kɛ ma kɛɛ le wookɔŋndo. Ma tɛɛmbuu diola Mɛlɛka cho o choo choo niŋndo le mɛɛ pauvii wɔɔŋ wɔɔŋnde fula nda, mi nyɛ nɛiyaa wa nda choo yɛ.

12 Mi o ŋɔmpumndo hulu hɛŋgɛi ndɔɔ o pee bɛndoo Yufiluaati niŋ.+ Okoŋ, mi pioo vela+ le mi nɛiyo bɛɛndiaŋ le masaa+ cho fula ba paaleŋ le chaŋ ndo wa.

13 Mi cha yooŋgula nɔɔlɛilaŋ* la yaa fulaa tambalakaa, visi biyaa,+ a wana lachoowa dimi maa le Mɛlɛka o suaa ni wo o sondo. Yooŋgu fula o kɛ kɛ o sondo wo, wana aa che ndu pɛ aa sɔlla ni. 14 Nyinaa wɔɔŋnda o sondo yooŋgulaŋ ndaŋ la fula ni, mi la wa walta kɔndɔfiltaŋ tosaa.+ Masaa o lɛŋndeŋ choo kpou cho laŋ tueiyɔɔ, le nda chuuŋgiaa le chɔuwo+ o paale Mɛlɛka Kpaaya Kpou Kpou Wo leŋ choo.+

15 Mi tuɛi diomndo aa: “I cho hunɔɔ maa viinɔ.+ Kɔl kɛndɔɔ cho le wana cho lahɔl+ a nyɛla ndɔlaŋ lekɔɔ wo, le halikpeŋ o kela fondo mi waŋnda che dialuŋ ndɔŋ lasiɔmboŋ te.”+

16 Okoŋ, ma chuuŋgiaa nda o fondaŋ nda veelu o Hibuluiye niŋ aa Amakɛdɔŋ* ndo.+

17 Mi o ŋɔmmɛuwo hulu hɛŋgɛi ndɔɔ o hueiye niŋ. Okoŋ, mi diomndo fula o chiɛi Mɛlɛkaa+ o kpeŋgbei lemasaa, mbo dimi choo choo kpeleŋ aa: “Nyɛ o nyɛ chuu yɔŋnɔŋ!” 18 Nyɔɔ wa kioloo ŋualalɛi ŋualalɛi bɛndu. Taŋndaŋ ma wa deŋioo, mi wa diomndaŋ tueiyɔɔ, nduyɛ mi lɛŋndeŋ le nyiiya tau tau. Kani mi waŋnda chieeya wa o lɛŋndeŋ choo, le pilɛ bɛɛ lɛŋndeŋ le nyiiya wɔ lende le.+ O ve nyiiya bɛɛŋ bɛɛŋ te le nyiiya le. 19 Mi chiee bɛndoo+ tɛnda kpeŋgoŋ ŋgaa, nduyɛ mi chieeŋ bɛndoŋ o lɛŋnde niŋ kpou koombiaa. Okoŋ, mi Mɛlɛka loonuŋ a Babilɔŋ Bɛndoo,+ le mbo kuesi ndu taala mamuɛi cho o piaa cha a tumbe ndɔ bɛndoo leniŋ ndo.+ 20 Mi lɛŋii mɛŋndaŋ ma balu ve kpou lo pɛ. Nduyɛ pemboŋ bɛɛ wana aa chi le.+ 21 Mi looŋ kpuŋgbaŋ bɛndu bɛndoŋ deli waŋnda choo.+ I kɛ kɛ ndii wa lusullo le talɛŋnde i pilɛ.* Mi waŋnda tɛɛmbuu diola Mɛlɛka laŋ le mɛɛ looŋ deli nda choo yɛ.+ Kpundɛ bɛndoo pila wa hoo ni.