Saamiɛɛ Tasoo

27 Okoŋ kɔɔli, mi Deeve dimi o kɔl niŋ aa: “I laalaŋ maa paale wa niŋ mi del Sɔɔ o ba. Lelaŋ, o bɛnda mi nyaanuŋ mi kuɛŋnuŋ+ o lɛŋnde Filitiaŋnda niŋ. Okoŋ te Sɔɔ nuuviaa ya pɛ o tanda Isɔluɛiyo niŋ kpou mbo seeluŋ ya le, o cho saŋga.+ Nduyɛ koŋ cho tosa mi hɛluŋ ndu.” 2 Le hei, mi Deeve nda puaa 600+ wa a ndu latulu wa mal ma kua o Akisi+ lo po Mawoki wo, masaa le Kaati. 3 Mi Deeve, puaa nduaa chɔuwa, a yuŋgula ndalaŋ kpou kɔ chal Akisi o bɛŋgu choo o Kaati niŋ. Mi Deeve kua a laandaa nduaa ŋiɔɔŋnda Ahinowam+ fulaa Chɛsiluɛɛ, a Abikɛɛ+ fulaa Kamɛɛ, lanɔ Nabaa mɛiyo. 4 Mɛɛ Sɔɔ tuei yooŋgoo maa Deeve nyaanuŋ mbo kuaŋnuŋ Kaati, mbo pɛŋgi ndu nuuviaa.+

5 Okoŋ mi Deeve dimul Akisi aa: “Te o bɛnda pɛ a num, a yandii, ke ya chieeŋ num pɔmbɔŋ o pilɛ le mi kɔ waŋnuŋ loŋ. O bɛnda mi la wa nya buɛi numndo latulu o chiee num lemasaa niŋ te.” 6 O paale leŋ choo, mi Akisi ke Deeve Sikila.+ Lelaŋ, Sikila cho masaa le Chuda o ba bɛŋgu haaa a paale hauleŋ ndeŋ.

7 Deeve chua wɔsioo o pilɛ a paŋgoŋ ŋ hiɔɔlu o tanda Filitiaŋnda niŋ.+ 8 Mi Deeve nda puaa nduaa ndaa kɔ del Kɛsiɔluaitiiya,+ Kisaitiiya, a Amalɛkaitiiya+ choo a sɔŋgɔɔ. Kanifuule, waŋnda haa wa a tiuwaa o tanda koŋ niŋ chɔŋ Tɛlam kɔ bii Suɔɔ,+ haaa mbo tuusu a pɛŋgula lɛŋnde Ichipi leŋ. 9 Te Deeve ndoo kɔ del nda pɛ choo a sɔŋgɔɔ, wana pɔnɔ ni, wana lanɔ ni, ndoo mɛi yoomu le.+ Kɛ mi ndoo chua saa, nauwa, sofɛliaa, nyɔɔmiaa, a nyɛla chuɛɛnaŋndaŋ, okoŋ mbo miiŋguŋ o Akisi lo. 10 Mi Akisi ndoo nyuna Deeve aa: “Kuɛɛnɛ ŋ kɔ del lɛ hau waŋnda choo?” Mi Deeve ndoo muli aa: “Chuda ba tou wo,”*+ ɔɔ “O tanda Chɛluamɛɛtiiya ba tou wo,”+ ɔɔ “O tanda Kenaitiiya ba tou wo.”+ 11 Wana pɔnɔ ni, wana lanɔ ni, wana pilɛ bɛɛ Deeve ndoo mɛi yoomu mbo kuɛ a ndu Kaati le. Mi ndoo dimi aa: “Yɔŋii nda dimul nda a naa okɔɔ aa, ‘Nyɛ Deeve tosal naa wo cho hoo ni.’” (Teleŋ o teleŋ, nuaa Deeve ndoo tosa ni boondii o wa o tanda Filitiaŋnda niŋndo.) 12 Le hei, mi Akisi laalaŋ Deeve, mbo wa dimioo o kɔl niŋ aa: ‘Mbɔ lekɛndɛi Deeve simnuŋ nyɛ siouwɛi wanaa nduaa tɛɛŋ, Isɔluɛiya. Lelaŋ, buɛi nuu o cho niŋ wa lɔɔlɔɔ ni.’