Koloniko Diiŋ Ndɔɔ

17 Mi Chɛhosiafati po ndɔ+ miiŋgu o masaleŋ choo o foofo ndɔɔ. Nduyɛ mbo tosa mi masale ndɔleŋ le sim yi o Isɔluɛi niŋ. 2 Mbo kɛsi puaa chɔuwa o chieeŋ bɛnduŋ nɔ kpakila kala kalalaŋ o Chuda niŋndoŋ kpou, nduyɛ mbo kɛsi vɛlɛ puaa chɔuwa a kundalaŋ o lɛŋnde Chuda leŋ niŋ, a o chieeŋ bɛndoŋ Ifiluem, ŋ Esa finya ndɔ ndoo bii yoŋ.+ 3 Mi Chɛhowa hiau lachi a waa latulu a Chɛhosiafati, kanifuule mbo kua o nɛila Deeve finya ndɔ mama laŋ choo,+ o muliŋ Baal sooluuwo le. 4 Mbo nuuviaa Mɛlɛka finya ndɔ wo,+ nduyɛ mbo tual sawala ndɔlaŋ kɔɔli. Kɛ o tul kaala wɔɔŋnda Isɔluɛiya kɔɔli le.+ 5 Mi Chɛhowa tosa mi masale Chɛhosiafati leŋ le sim yi,+ nduyɛ mi waŋnda o Chuda niŋ kpou wa ndu nyɔɔŋ kioo. Mbo sul sullo pila, nduyɛ bɛɛleŋ pila waŋnda ndaa nɔ le ndu ni.+ 6 Mbo sɔla kɔl simulaa le nɛila Chɛhowa laŋ tolɔɔ kɔɔli, nduyɛ mbo faaŋiaa pɛŋ fondaŋnda filioŋndaŋ+ a suŋgbuma iyɔm*+ nda simi le sooluuwo o Chuda niŋ ndaŋ.

7 O wɔsi yaa ndɔ o wa o masaleŋ choo wo niŋ, mbo yooŋgu le laŋgbaa nduaa kalla. Nda cho ni: Bɛŋ-heyɛɛ, Obadaya, Sɛkalaya, Nɛtanɛɛ, a Maikaya, le ma pɛɛku waŋnda o chieeŋ bɛndoŋ o Chuda niŋ. 8 Livaiyaa wa a nda latulu wa cho haa ni: Siɛmaya, Nɛtanaya, Sɛbadaya, Asahɛɛ, Siɛmilamɔti, Chɛhonataŋ, Adonicha, Tobicha, a Tobi-adonaicha. Nduyɛ Ɛlisiama nda Chɛholuam wanaa soliaa lasalaa wa a nda latulu.+ 9 Okoŋ, ma chua yau laSawa Chɛhowa wo,+ ma kandu waŋnda pɛɛkoo o Chuda niŋ. Ma balu waŋnda pɛɛkoo o chieeŋ bɛndoŋ o Chuda niŋ kpou.

10 Nduyɛ, masɛi ndii balu Chuda ve kpou, mi siooŋii Chɛhowa ve bii nda. Le hei, a chiŋalaŋ Chɛhosiafati a sɔŋgɔɔ le. 11 Mi Filitiaŋnda chuu Chɛhosiafati nyɔɔŋ, nduyɛ ma ke ndu vɛlɛ kanioŋ* le paawaa* malɔɔ. Mi Aluabuiya chua saa konduaa 7,700 a chuiŋaa piaanduaa 7,700 o chɔluaa ndaa tɛɛŋ, ma chuu ndu.

12 Mi Chɛhosiafati hiau lachi a kpaayaa sɔlaa tau tau.+ Nduyɛ mbo hiau lachi a chieeŋ bɛnduŋ nɔ kpakila kala kalalaŋ ndoŋ taŋgullo,+ vɛlɛ a chieeŋ bɛndoŋ o Chuda niŋ le nyɔɔŋ kɛsioo.+ 13 Mbo tosa walta bɛndulaŋ tau o chieeŋ bɛndoŋ o Chuda niŋ, nduyɛ ndoo nɔ puaa chɔuwa, a kuubaa dialuŋ kalaa o Chulusalɛm niŋ. 14 Puaa chɔuwa haa wa a kundalaŋ a mɛɛ yuŋgula ndala leboltaŋ la wa yɛ. O yuŋgu Chuda wo choo, masaa wa, a waŋnda waalaŋ la wa o ba bɛŋgu wa. Adinaa wa masaa o pilɛ, nduyɛ kuubaa chɔuwaa dialuŋ kalaa 300,000 wa ndu o ba bɛŋgu ni.+ 15 Masaa Chɛhohanaŋ wa ndu o ba bɛŋgu. Nduyɛ ndoo nɔ puaa chɔuwa 280,000. 16 Amasiya po Sikili wo bɛɛ wa ndu o ba bɛŋgu. Mbo yɔŋguŋ a kɔl ndɔɔ kpou le wali Chɛhowa wo tosaa. Nduyɛ, ndoo nɔ puaa chɔuwaa kpaaya bɛnduaa 200,000. 17 O yuŋgu Bɛŋjamiŋ ndo choo,+ Ɛliaada wa masaa ni. Nduyɛ kuubanɔ kpaaya bɛndoo pila o wa ni. Ndoo nɔ puaa chɔuwa 200,000, a wa a bɛɛndiaŋnda a chiɔulaŋ vɛlɛ a boola chɔulaŋ nda.+ 18 Chɛhosabadi wa ndu o ba bɛŋgu. Ndoo nɔ puaa 180,000 a wa a bɛɛndiaŋ le chɔuwo wa. 19 Haa wa wallo tosaa le masaa ni, latulu a wanaa masaa hɛli mbo kɛsi nda o chieeŋ bɛnduŋ nɔ kpakila kala kalalaŋ o Chuda niŋndoŋ kpou.+