Kaleesiaŋnda

3 Ee nya waŋnda Kaleesiaa, diɔmii maavɛɛ nya luɛi yɛ hei niŋ? A tɛɛsial nya niŋ paandu kpendekele a mɛɛ nda baŋ Chiisu Kiliti o yɔmndo choo yɛ.+ Nɛɛnɛ hui yɛ nya mbo siŋga kɔlta nyalaŋ?+ 2 I yeema mi nyuna nya isɔɔ: Baa le mɛɛ nya tosa nyɛ sawaa* dimi wo yɛ nya sɔla nyina diandaa ni, ɔɔ le mɛɛ nya laalaŋ nyɛ nya tueiyo yɛ?+ 3 Baa diɔmnda nya cho ni? Kandɔɔ nya kandu kɔlaŋ o nɛi Mɛlɛkaa choo nyɛkɛndɛiyo, la yeema mi la siou ndu o nɛi iwana chieeyaa choo?+ 4 Baa mi saŋga nyaa simnuŋ nyɛ fondoo fuu? O bɛnda mbo simnuŋ nyɛ fondoo fuu le. 5 Wana tosa mi la sɔla nyina diandaa, nduyɛ mbo tosa walta kɔndɔfiltaŋ+ nya tɛɛŋndo, baa mbo wa maa le mɛɛ nya tosa nyɛ sawaa dimi wo yɛ o tosa keŋ ni, ɔɔ le mɛɛ nya laalaŋ nyɛ nya tueiyo yɛ? 6 Mi Ebilaham “duau laalaŋndo o Chɛhowa* niŋ. Le hei, mbo chua ndu maa wana sakpoo o cho ni.”+

7 A tonya, la sina maa wanaa nɔ laalaŋndo wa cho chuauwaa Ebilaham nda ni.+ 8 Mi Yau Mɛlɛkaa dimi sindɛ niŋ pa maa, Mɛlɛka cho tosa mi wanaa cho ŋChuu le wa simnuŋ wanaa sakpuaa ndu o hɔl le laalaŋ ndaa. Mbo dimul vɛlɛ Ebilaham yooŋgu kɛndɔɔ sindɛ niŋ pa aa: “Kaalaŋ o lɛŋndeŋ choo kpou cho hunɔɔ salaa sɔla sanaa o num niŋ.”+ 9 Lelaŋ, wanaa nɔ laalaŋndo wa cho salaa sɔla mɛɛ Ebilaham sɔla salaa le laalaŋ ndɔɔ yɛ.+

10 Wanaa tiindaŋ o nyɛ sawaa dimi wo niŋnda, sendioo cho nda choo. Kanifuule, i cho i poonyiaa aa: “Wana o wana hiu lachi a tosaa nyɛ cho o poonyiaa o Yau laSawa Mɛlɛkaa niŋndo le, sendioo cho ndu choo.”+ 11 I cho kpendekele maa wana o wana nɔla mbo simnuŋ wana sakpoo Mɛlɛka o hɔl,+ o nyɛ sawaa dimi wo tosaa niŋ te. Kanifuule, i cho i poonyiaa aa, “Wana cho sakpo wo cho wa yoomu le laalaŋ ndɔɔ.”+ 12 Sawaa tolnuŋ o laalaŋndo choo le. Kɛ, “wana o wana tosa pɛ nyɛ Sawaa dimi wo, o cho wa yoomu.”+ 13 Ŋ wa o sendioo niŋ Sawaa o ba bɛŋgu,+ mi Kiliti piandu naa kpali,+ mi ndupila miiŋgu o sendi koŋ bɛŋgu le naa. Kanifuule i cho i poonyiaa aa: “Wana o wana nda baŋ pɛ o yɔmndo choo, sendioo cho ndu choo.”+ 14 Hei yɔŋnuŋ le halikpeŋ mi wanaa cho ŋChuu le wa sɔla sala Ebilaham ndo, o sabu Chiisu Kiliti wo niŋ.+ Okoŋ, mi naa kpou sɔla nyina diandaa Mɛlɛka mɛi lediom le naa kioo sanaa a laalaŋ naa wo.+

15 Puaapiliaa, I chɔmndɔ nya a tamaselii naŋ sina wo okɔɔ: Te wanaa ŋiɔɔŋ chɛlaŋ pɛ o isɔɔ choo, nduyɛ ma yii kpemaa, wana o wana feŋa, ɔɔ mbo handu nyɛ cheleŋ lechoo le. 16 Mi Mɛlɛka chuel Ebilaham nda po ndɔ mamaa* buŋgɛi.+ O dimi nuaa aa, “chuauwaa num aa mamaa,”* mɛɛ wana yɔŋ aa waŋnda tau le. Kɛ nuaa o dimi ni aa, “po num mamaa,”* le chɔmndo maa waŋndo ndupilɛ. Ndu cho yɛ Kiliti ni.+ 17 I chɔɔlu wɔ nya ndi tɛɛsial: Kpemaa fɛlɛŋ Mɛlɛka yii. Wɔsilaŋ 430 okoŋ kɔɔli,+ mbo yɔŋgu Sawaa. Kɛ sawa koŋ tɛɛmbuu kpema Mɛlɛka yiiyo, ɔɔ buŋgɛi o chua ve le. 18 Te le nyɛ sawaa dimi wo tosaa Mɛlɛka ke waŋndo nyɛm kiɔɔŋ ni, mɛɛ o cho lɛ le buŋgɛi Mɛlɛka chua ve le o sɔla muŋ te. Kɛ mi Mɛlɛka ke Ebilaham nyɛm kiɔɔŋ le buŋgɛi o chuel ndu ve.+

19 Mɛɛ le yɛɛnɛ Mɛlɛka yɔŋgu yɛ Sawaa? Mɛlɛka yɔŋgu Sawaa le yɔŋnda wɔɔŋndaŋ chɔɔmuuwo.+ Nduyɛ mbo lo haaa mi po mama* Mɛlɛka chua buŋgɛi le ndu wo huŋ.+ Mi Mɛlɛka ke maalikɛiya sawaa hoo,+ mi nda ke wana wa Mɛlɛka nda ŋwaŋnda chiee tɛɛŋndo.+ 20 Kɛ te waŋndo ndupilɛ wa pɛ buŋgɛi chuaa, wana cheleŋ yeemaŋ lɛ le mbo sim tɛɛŋ te. Lende koni i cho a Mɛlɛka ni. Ndupilɛ kpe wa ni, boondii o chua buŋgɛi keŋ ndo. 21 Mbo wa maa sɛɛŋgiaa Sawaa cho buŋgaŋ Mɛlɛka chua woŋ ni? Sako bɛɛ! Kanifuule, te sawa Mɛlɛka yɔŋgu wo ndoo ke pɛ wana yoomoo, mɛɛ o wa tosa mi waŋnda ndaa simnuŋ wanaa sakpuaa Mɛlɛka o hɔl. 22 Kɛ Yau Mɛlɛkaa dimi maa waŋnda chieeya wa hakioo o ba bɛŋgu. O hei niŋ, wanaa dɔu laalaŋndo o Chiisu Kiliti niŋnda, Mɛlɛka nɔla mbo ke nda nyɛm kɛndɛŋ o chuel nda buŋgɛi yoŋ.

23 Tuupa miŋ duau laalaŋndo o ndu niŋ, ŋ wa o sawaa bɛŋgu mɛɛ waŋndo wa nuaa o biyɔɔ niŋ yɛ. Ŋ wa chumndo boondii Mɛlɛka wa naa ndu chɔmnde.+ 24 Sawaa wa naa nɛiyo chɔmndo ni haaa mi Kiliti huŋ,+ le halikpeŋ miŋ simnuŋ wanaa sakpuaa Mɛlɛka o hɔl sanaa a laalaŋ naa.+ 25 Kɛ mɛɛ naŋ laalaŋ niŋ o ndu niŋ yɛ,+ ŋ cho lɛ o sawa bɛŋgu le naa nɛiyo chɔmndo le.+

26 Nya kpou chuauwaa Mɛlɛkaa+ nya cho ni le mɛɛ nya laalaŋ o Chiisu Kiliti niŋ yɛ.+ 27 Kanifuule, nya wanaa sɔla yiŋɔɔ o Kiliti niŋnda kpou, la simnuŋ niŋ maa Kiliti.+ 28 Chuunɔ ni, Kilikiinɔ ni,+ chɛ ni, wana baŋaŋ ni,+ wana pɔnɔ ni, wana lanɔ ni,+ nya kpou nyɛpilɔɔ kpe nya cho ni, le mɛɛ nya cho o diompilɔɔ niŋ a Chiisu Kiliti yɛ.+ 29 Nduyɛ te le Kiliti nya cho ni, mɛɛ chuauwaa mamaa Ebilaham nda* nya cho ni.+ Nya cho nyɛm kɛŋ+ Mɛlɛka chuel ndu buŋgɛi yoŋ sɔla ni.+