Polowaa
11 Chɛhowa tul sekeleila* lakafalaŋ leyɛ.
Kɛ mbo naŋ kɔl a pou kpeekpei nda tuu nyɔɔŋ ndo.+
2 Wana yoŋgaa, siɔmbulaŋ o sɔla ni.+
Kɛ wana tusiŋndo nɔ taasioo ni.+
3 Wanaa cho sakpo wa, lo lechoo ndaa chɔm nda nɛiyo ni.+
Kɛ wanaa sendu le wa, kafala ndalaŋ la tɛɛmbuu nda ni.+
4 Sullo* nɔ niŋ tɔnɔ o tɔnɔ o paale kɔl tuuleŋ choo le.+
Kɛ sakpoyɛi cho nyɛ piŋi niŋ wana o piɔmndo niŋndo ni.+
5 Wana tɔɔyaŋ cho choo le wo, mi sandii nduɛi tosa mi kelala ndɔlaŋ la wa sakpo.
Kɛ wana dɛnɛ wɔɔŋndo cho delɔɔ le dɛnɛ ndɔ wɔɔŋndo.+
6 Wanaa cho sakpo wa, sandii ndɛi cho nda piŋi ni.+
Kɛ wanaa sendu le wa, yeemaŋ ndaŋ cho tosa ma hau o yaŋɔɔleŋ.+
7 Te wana dɛnɛ wɔɔŋndo vi pɛ, tiindaŋ ndɔɔ tambu.
Nduyɛ mi tiindaŋ ndoo nɔ o kpaaya ndɔɔ niŋndo bɛɛ tambu.+
8 Mi wana cho sakpo wo sɔla pioŋɔɔ o dɛnɛ palaa niŋ.
Kɛ mi wana dɛnɛ wɔɔŋndo miiŋgu o foofo ndɔɔ.+
9 Mi wana simul tonyaa wo* tusi wana nda chiɛɛliaŋ ndo nyɛpalaa choo a sondo.
Kɛ mi kɔl kaloo piŋi wana cho sakpo wo.+
10 Mi sɔɔŋ kɛndɛŋ wana cho sakpo wo tosa mi chioo dɔɔnuŋ nyaale.
Nduyɛ te wana dɛnɛ wɔɔŋndo vi pɛ, yeela kɔl kɛndɛlaŋ la soo.+
11 Le mɛɛ wana cho sakpo wo nɔ salaa yɛ, mi keŋ tosa mi chioo fula tɔɔ.+
Kɛ mi sondo wana dɛnɛ wɔɔŋndo tosa mi chioo piɔl.+
12 Wana o wana nɔ kɔl kalu bɔɔ le, o niŋ kɔl a wana nda chiɛɛliaŋ ndo le.
Kɛ wana nɔ sinapɛŋgoo wo, meinɔŋndo o meinuŋ ni.+
13 Wana tɛɛmbuu chaanda tɔɔ wo, ndu balu a sɔɔŋ pilaŋ o sondo ni.+
Kɛ wana wana nɔla ma tiindaŋ ndo, te a dimul ndu suɛi pɛ, I lo nya tɛɛŋ nya ndu.*
14 Te nɛi chɔmaa sɔvɛ ve le, mi waŋnda saŋga.
Kɛ mi batiuwaa* sɔlaŋ te wanaa silaa wa pɛ tau.+
15 Wana o wana chua pɛ miallo bɔŋ, o cho suei kiolɔɔ.+
Kɛ wana o wana fafaŋ pɛ waŋndo bɔŋndo chuaa,* o cho waŋnɔŋ hɛnɛkɛ.
16 Wana lanɔ kɛndɔɔ, bɛɛleŋ pila o sɔla ni.+
Kɛ waŋ piaanduaa dɛnɛ wɔɔŋnda, sullo nda puŋga ni.
17 Mi wana kɛndɔɔ* sɔla tɔnɔɔ le ndupila.+
Kɛ mi wana dɛnɛ wɔɔŋndo veeluŋ kpundɔɔ* choo.+
18 Tɔnɔ wana dɛnɛ wɔɔŋndo sɔla wo lo lefafɛɛŋ te.+
Kɛ wana tosa sɔɔŋ o nɛi sakpoo choo wo, fanda kpeekpeiyo o sɔla ni.+
19 Wana sim yi le sɔɔŋ tosaa o nɛi sakpoo choo wo cho wa yoomu.+
Kɛ wana cho sɔɔŋ wɔɔŋndoŋ tosaa wo cho piɔmndo sɔla.
20 Wanaa tosa sɔɔŋ o kafalaŋ choo wa, Chɛhowa tul nda leyɛ.+
Kɛ mbo hini kɔl a wanaa tɔɔyaŋ o tɔɔyaŋ cho choo le wa.+
21 Kɛsiŋ hei o kɔl: Wana dɛnɛ wɔɔŋndo cho nyɛpalaa sɔla.+
Kɛ chuauwaa wana cho sakpo wo cho pioŋɔɔ sɔla.
22 Wana lanɔ kɛndɛ kɛndɛ nɔ kɔl kalu bɔɔ le wo cho ko,
Mɛɛ peuwo nɔ nuaa kelɛi kooliiye o miliŋ yɛ.
23 Yeemɛi wana cho sakpo wo, o dɛnɛ kɛndɔɔ niŋ i yaa ndu ni.+
Kɛ mi tiindaŋ wana wɔɔŋndo yɛɛ ndu o dɛnɛ palaa niŋ.
24 Wana tosal waŋnda kɛndɛi yo,* nyɔɔŋ pila o sɔla ni.+
Kɛ wana nɔ hoo ikɛndɛ le wo cho simnɔŋ wana bala fondo.+
25 Wana ikɛndɔɔ, batiuwaa pila o sɔla ni.*+
Nduyɛ wana o wana nɛŋi pɛ acheleŋnda kɔl,* ndupila bɛɛ cho wa a kɔl kɛndɛ.+
26 Wana kɛɛ le kuluŋ ndɔŋ pisioo wo, waŋnda cho ndu mɛna.
Kɛ ma dɔu wana pisi kuluŋ ndɔŋ ndo sala.
27 Wana o wana kindiŋ pɛ le dɛnɛ kɛndɔɔ tosaa, dɛnɛ kɛndɔɔ komal ndu ni.+
Kɛ wana o wana kindiŋ pɛ le iwɔɔŋnde tosaa, iwɔɔŋnde komal ndu ni.+
28 Wana dɔu tiindaŋndo o sul ndɔɔ niŋndo cho delɔɔ.+
Kɛ wana sakpoo cho wa a kɔl kɛndɛ mɛɛ billo pui nuaa tɛɛ tɛɛ yɛ.+
29 Wana o wana hiŋ pɛ a kpundɔɔ* o ndu lo chiɛiniŋ, hueiye cho nyɛm kɛŋ ndɔŋ ni.+
Nduyɛ diɔmndo cho wa buɛiyo le wana nɔ taasioo wo ni.
30 Kɔmnde wana cho sakpo wo, yɔm yɔŋgu yoomoo wo o cho ni.+
Nduyɛ wana* mala waŋnda le sɔɔŋ kɛndɔŋ tosaa wo, wana taasioo o cho ni.+
31 A tonya, te wana cho sakpo o lɛŋndeŋ choo wo sɔla pɛ fandaa,
Vɛɛ kpɛ i wa yɛ niŋ a wana dɛnɛ wɔɔŋndo vɛlɛ a wana hakioo?+