Ikilisiaati

6 Kpundɛ cheleŋ ya che vɛlɛ o chieeŋndo choo mbo yɔŋnuŋ wanaa bɔɔbɔɔ wo cho hoo ni: 2 Mɛlɛka tonyaa tosa mi wanachioo sul, nduyɛ mbo sɔla nyɛm kiɔɔŋ a bɛɛleŋ, le halikpeŋ nyɛ o nyɛ o yeema ve ndu lepɛŋ te. Kɛ a koŋ kpou, Mɛlɛka tonyaa chɛl ndu mbo tuei muŋ yeela le. Miallo tuɛi muŋ yeela ni. Nyɛ fondoo fuu hei cho ni, nduyɛ kɔl tambɛi bɛndoo pila i chuu wana ni. 3 O yɔŋ bɛɛ mi waŋndo velu chuauwa kɛmɛ, nduyɛ mbo viou yoomu le wɔsila bɔɔbɔɔ, mbo yuuwa kudɛɛ, kɛ mbo tui nyɛm ndɔŋ kɛndɔŋ yeela tuupa mbo kuɛ o sɛiyo niŋ te,* I nɔla mi dimi maa chɛlɛkpɛ nda viikuu wo cho fisa a ndu.+ 4 Kanifuule chɛlɛkpɛ nda viikuu koŋ ndo, fondo fuu koni nda velu ndu ni. I cho maa o nyumndaŋ niŋ o vi ni, nduyɛ o nɔ ladio kposoŋ te. 5 Mi che bɛɛ o chi lepala ɔɔ mbo sina nyɛ o nyɛ le, kɛ ndu hiou wa fisa* a wana viou yoomu wo.+ 6 O yɔŋ bɛɛ mi waŋndo wa yoomu le wɔsilaŋ waalaŋ la tiɔɔŋ, tɔnɔ yɛɛ o sɔla yɛ te o tui yoomoo yeela le? O cho o fondaŋ pilɔɔ kpe le nda kpou cho lakɔ le?+

7 Wali kala kala wanachioo tosa wo kpou, le dembe ndɔɔ.+ Kɛ a koŋ kpou, fɛɛŋ bɛɛ o hini kɔl te. 8 Hɔɔyale kuɛɛ wana taasioo nɔ yɛ mbo hiau diɔmndo?+ Ɔɔ, tɔnɔ yɛɛ wana bala fondoo sɔla yɛ te o sina pɛ mɛɛ o nuuviaa nyɛm o hauba le mbo wa yoomu woŋ?* 9 O bɛnda ma tuei nyɛ ŋ nɔ wo yeela mbo hiau yeemɛi bɛnduei nɔɔ le nyɛ ŋ nɔla sɔla le wo. Hei bɛɛ nyɛ fondoo fuu i cho ni, mɛɛ waŋndo wa nuaa hueiye nyaanɔŋndo kɔɔli yɛ.

10 Nyɛ o nyɛ cho, o wa niŋ paandu a diola ndɔlaŋ, nduyɛ wanachioo bɛɛ cho o chɔɔmaŋ kpendekele. Wanachioo nɔla mbo sɔla wana hiou ndu kpaayaa wo di le.* 11 Mɛɛ waŋndo suaa fau, lende koni o dimi sɔɔŋ fondoŋ ni.* Nduyɛ tɔnɔ yɛɛnɛ keŋ chuu yɛ wanachioo? 12 Nɛɛnɛ sina yɛ nyɛ bɛnda le mi wanachioo tosa boondii biŋgi o wa yoomu ve? Haupa mi yoomu ndɔ fondo fuu cho maa lewundu wo mɛɛlu.+ Nduyɛ te o vi pɛ, nɛɛnɛ nɔla yɛ mbo dimul ndu nyɛ cho ndu yɔŋnɔŋ kɔɔli o chieeŋndo hoo choo wo?