Polowaa
2 Sɔɔŋ kɛndɛŋ waŋndo dimi woŋ,* muŋ o dia tɔnɔ ni.+
Kɛ wanaa hui waŋnda wa, yeemɛi ndɛi cho le sɔŋgɔlaŋ mɛlioo ni.
3 Wana manda sondo ndɔɔ wo cho yoomu ndɔɔ piŋi,+
Kɛ wana bii sondo ndɔɔ le wo, nyɛpalaa tual ndu choo ni.+
4 Wana siɛlɛiyo yeema bɛɛ nyɔɔŋ tau, o sɔla nyɛ o nyɛ le.+
Kɛ wana tosa hoo wallo kalaŋ ndo, nyɛ o nyɛ o yeema pɛ, sɔlaa o sɔla ni.*+
5 Wana cho sakpo wo tul choolaŋ leyɛ,+
Kɛ mi sɔɔŋ wana dɛnɛ wɔɔŋndo tosa woŋ chuu ndu siɔmbulaŋ a bɛɛla tambɛilaŋ.
6 Mi sakpoyɛi manda wana tɛɛmbuu isɔɔ le wo,+
Kɛ mi dɛnɛ wɔɔŋndo tɛɛmbuu wana yɔŋ wɔɔŋndo.
7 Waŋndo opum mbo chɔm maa o sul, kɛ o nɔ nyɛ o nyɛ le.+
Mi o cheleŋ chɔm maa wana bala fondoo o cho ni, kɛ wana sulaa o wa ni.
8 Wana sulaa, nyɛ ndɔ sɔlaa o yɔŋgu ni le yoomu ndɔɔ baŋaa.+
Kɛ wana bala fondoo, kpundɛ waa lende komal ndu le.+
11 Sul wana sɔla hoo luku luku wo* chel num o ba le,+
Kɛ sul wana chuuŋgiaa hoo o pɔmpɔmbɔ wo,* kuiyo o kui ni.
12 Te wana wa nyɛ kɔl* pɛ ma keleŋa ndu sɔla le, mi kɔllo saŋga tau,+
Kɛ te wana sɔla pɛ nyɛ ŋ wa kɔl lo, o wa ko maa yɔm yɔŋgu yoomoo wo.+
13 Wana o wana kɛɛ pɛ nɛi chɔmaa tolɔɔ kɔɔli, o cho fulamakɔɔli wɔɔŋndo sɔla.+
Kɛ wana o wana ke pɛ sawaa bɛɛleŋ, o cho fandaa sɔla.+
14 Pɛɛkula* wana taasioo ke wana yoomoo ni,+
Nduyɛ mi la piŋi waŋndo o heu o yaŋɔɔle piɔmndeŋ niŋ te.
15 Wana nɔ sinapɛŋgu kpeekpeiyo wo, hɛnaŋndo pila waŋnda hɛnaŋ a ndu ni.
Kɛ wanaa hui waŋnda wa chiee waŋnda biyɔɔ le.
16 Wana taasioo, a kɔl kaloo o tosa sɔɔŋ ni.+
Kɛ diɔmndo ndu, mi sɔɔŋ o tosa woŋ chɔɔmuu diɔmii nduɛi.+
17 Kiilanɔ dɛnɛ wɔɔŋndo, o kpundɔɔ niŋ o del ni.+
Kɛ mi kiilanɔ dimi tonyaa wo piŋi waŋnda.+
18 Wana o wana kɛɛ pɛ silaa, bala fondolaŋ a bɛɛla tambɛilaŋ la tual ndu choo ni.
Kɛ wana chɛl silaa wo, bɛɛleŋ pila o sɔla ni.+
19 Waŋndo te yeemɛi nduɛi peeluŋ pɛ, kɔllo pila o naŋ ni.+
Kɛ diɔmndo yeema mbo mal dɛnɛ ndɔ wɔɔŋndo le.+
20 Te wana kela a wana taasioo pɛ, a simnuŋ wana taasi.+
Kɛ wana o wana balu a diɔmndo pɛ, a saŋga tau.+
22 Wana kɛndɔɔ, mbo mel chuauwaa nduaa mamaa nyɛm kiɔɔŋ.
Kɛ wanaa yɔŋ wɔɔŋnda, le wanaa cho sakpo wa sul ndaa cho wa ni.+
23 Te wana bala fondoo tosa pɛ wali ichiɔɔ, mbo sɔla nyɛdiaa tau.
Kɛ naapum mi wanaa lakafaa kuɛŋnuŋ a ndu kpou.
24 Wana o wana kɛɛ pɛ chua ndɔɔ lɔɔ a sioŋndeŋ,* mɛɛ o tul ndu leyɛ.+
Kɛ wana kaala chua ndɔɔ wo, silaa o sila ndu ni.*+
25 Wana cho sakpo wo, mbo de mbo pim cha, nduyɛ mbo hini kɔl.+
Kɛ dembe wana dɛnɛ wɔɔŋndo, lɔɔlɔɔ fondo o wa ni.+