Chɔɔsuaa
3 Mi Chɔɔsuaa pena chɔnɔŋ puŋ, okoŋ mbo faŋaŋ Sitim nda Isɔluɛiya* kpou,+ ma huŋ o pioo Chɔɔdaŋ. Nduyɛ, ma lɔl loŋ tuupa ma taŋ.
2 Mɛɛ palɛi hiou i yaa, mi simlachiaa+ balu o dɔɔŋgɔɔ niŋ kpou. 3 Ma dimul waŋnda aa: “Te la che dɔɔ pɛ mi wanaa soliaa lasalaa fula o kaale Livai leŋ choo wa chua kɔfu kpema Chɛhowa wo ma kandu kɔlaŋ,+ la nɔ mi la chɛŋ mi la tol nda kɔɔli. 4 Kɛ la nɔ mi la sɔɔŋguu nda ikɛi le. Tiŋndo nɔ mbo wa nya tɛɛŋ le nɛiyo 2,920.* Keŋ cho tosa mi la sina nɛi nya nɔ mi la kuɛ wo, kanifuule la hiŋ ndɔ naŋ paandu le.”
5 Mi Chɔɔsuaa dimul waŋnda aa: “La dindi nyapila,+ kanifuule Chɛhowa cho siɔdii sɔɔŋ kɔndɔfilloŋ tosa nya tɛɛŋ.”+
6 Mi Chɔɔsuaa dimul wanaa soliaa lasalaa aa: “La chua kɔfu kpemaa,+ mi la hiou waŋnda lachi.” Okoŋ, ma chua kɔfu kpemaa, ma hiau waŋnda lachi.
7 Mi Chɛhowa dimul Chɔɔsuaa aa: “O paaleŋ ndeŋ choo ya cho kandɔɔ num siiŋguuwo wana bɛndoo Isɔluɛiya kpou o hɔl ni,+ le ma sina maa I cho wa a num latulu,+ mɛɛ ya wa a Muuse latulu yɛ.+ 8 Dimul wanaa soliaa lasalaa cho kɔlaŋ a kɔfu kpemaa wa aa: ‘Te la fuuluu pɛ o pioo Chɔɔdaŋ kɔŋgɔ, la nɔ mi la sim yi o peelo.’”+
9 Mi Chɔɔsuaa dimul Isɔluɛiya aa: “La huŋ mi la tuei nyɛ Chɛhowa Mɛlɛka nyaa dimi wo.” 10 Mi Chɔɔsuaa dimi aa: “La cho niko hunɔɔ sina maa Mɛlɛka cho yoomu wo cho nya tɛɛŋ,+ nduyɛ maa o cho kaaye hei kpou touwɔɔ nya lachi. Ndi cho ni, Kenanaitiiya, Hitaitiiya, Hivaitiiya, Pɛluɛsaitiiya, Kikasaitiiya, Amɔluaitiiya, a Chɛbusaitiiya.+ 11 Kɔfu kpema Masanɔɔ le lɛŋndeŋ kpou cho nya hiouwɔɔ lachi, le Chɔɔdaŋ ndaŋ taŋɔɔ. 12 La hɛli puaa 12 o kaaye Isɔluɛi niŋ kpou. Kaale kɛ kɛ, wana pilɛ.+ 13 Wanaa soliaa lasalaa cho kɔlaŋ a kɔfu Chɛhowa wo wa, Masanɔɔ le lɛŋndeŋ kpou, cho lakɔ le Chɔɔdaŋ ndaŋ taŋɔɔ. Nduyɛ te a pila dɔɔ pɛ peloŋ o Chɔɔdaŋ ndaŋ niŋ, mɛŋma cho wa fulaa amaluaŋ ndaŋ ma cho pɛŋgi hiouwɔɔ, mi ma sim yi mɛɛ nda kanda nuaa mɛŋndaŋ yɛ.”+
14 Lelaŋ, mɛɛ waŋnda puusiaa dɔɔŋgɔɔ ma huŋ le Chɔɔdaŋ ndaŋ taŋɔɔ, mi wanaa soliaa lasalaa wa kɔlaŋ a kɔfu kpemaa+ wa hiau nda lachi. 15 A teleŋ chiɔɔŋ kuauwaa, mi Chɔɔdaŋ ndaŋ maa hiŋ hunɔɔ pila.+ Kɛ dimioo nuaa mi wanaa soliaa lasalaa wa kɔlaŋ a Kɔfoo wa fuuluu o pioo Chɔɔdaŋ kɔŋgɔ ma pila peloŋ o peelo, 16 mi mɛŋndaŋ ma pɛŋgi hiouwɔɔ. Mi ma hel, mi ma sim o chioo Adam pɔɔli, Saluɛtaŋ ikɛi, mɛɛ nda kanda nuaa mɛŋndaŋ yɛ. Mi ma tuaŋ kpou ma tuusu o Pee Mɛŋma Ihɛllo o tanda Aluaba wo niŋ, ndu cho yɛ Pee Nyɛ Yoomaa Cho Leniŋ Te Wo ni. Mɛŋndaŋ ma lo lende haaa mi waŋnda taŋ Chɛluiko ikɛi. 17 Wanaa soliaa lasalaa wa kɔlaŋ a kɔfu kpema Chɛhowa wo wa, lo isisi o lɛŋnde vesɛileŋ choo+ o pee kɔllo Chɔɔdaŋ, haaa mi waŋnda Isɔluɛi kpou taŋ Chɔɔdaŋ ndaŋ o lɛŋnde vesɛileŋ choo.+