Lɛvitikɔɔ

19 Mi Chɛhowa suaa vɛlɛ o Muuse lo aa: 2 “Dimul Isɔluɛiya kpou aa, ‘La nɔ mi la wa a diandaa, kanifuule ya Chɛhowa Mɛlɛka nyaa, wana diandaa ya cho ni.+

3 “‘Wana o wana nɔ mbo nɔ bɛɛleŋ* le kala ndɔ a finya ndɔ.+ Nduyɛ, la nɔ mi la biilu paale pɛŋgiaaleŋ.+ Ya cho Chɛhowa Mɛlɛka nyaa ni. 4 La muliŋ o mɛlɛkaa fonduaa+ lo, ɔɔ mi nyapila toosiaa mɛlɛkaa a chiliŋnde+ le nda sooluuwo le. Ya cho Chɛhowa Mɛlɛka nyaa ni.

5 “‘Te la wa pɛ sala kɔl nyuloo solioo o ya Chɛhowa lo,+ la nɔ mi la soli ndu o nɛi ya hini kɔl a nya wo choo.+ 6 La nɔ mi la de sala koŋ o paale nya cho ndu soli leŋ choo a diimandɔɔ. Kɛ te o lo pɛ haaa o paale yaa ndɔ leŋ choo, la nɔ mi la lom ndu.+ 7 Te o yɔŋ pɛ mi la de o kɛ kɛ o paale yaa ndɔ leŋ choo, mɛɛ suɛi wɔɔŋii bɛnduei nya tosa keŋ ni, nduyɛ I chɛl niŋ sala koŋ te. 8 Wana o wana de pɛ o tɔ cho koŋ lo wo, I cho ndu nyɛpalaa tusi choo. Kanifuule, o nɔɔliaa nyɛ cho o diandaa ya Chɛhowa o hɔl lo, nduyɛ o nɔ mbo sɔla piɔmndo.

9 “‘Te la wa pɛ chiɔɔŋ nyaŋ kouwɔɔ, la nɔ mi la fuuluu a kouwɔɔ o daŋgaltaŋ te, nduyɛ la nɔ mi la chɔuviaa ŋ nya mɛi kɔɔli woŋ te.+ 10 La nɔ vɛlɛ mi la kendi kilepiima nya mɛi kɔɔli o kpelela nyalaŋ niŋ, ɔɔ mi la chɔuviaa ma sɛŋiŋ ndaŋ te. La nɔ mi la mɛi maŋ le wanaa bala fonduaa*+ a mialaa cho nya tɛɛŋ nda. Ya cho Chɛhowa Mɛlɛka nyaa ni.

11 “‘La yɔŋ levii le.+ La tosa kafalaŋ te.+ Nduyɛ, la dimulaŋ choolaŋ vellaa velle le. 12 La mɛnaŋ o choolaŋ choo a diola nilaŋ,+ okoŋ mi la nɔɔliaa diola ya Mɛlɛka nyaa le. Ya cho Chɛhowa ni. 13 La chua nyɛ pila a lakafa le,+ nduyɛ la hialu nyɛ wana le.+ Te a chua pɛ waŋndo le wali lepaa wo, paawa* ndɔɔ lɔl num choo haaa diimandɔɔ+ le.

14 “‘La nɔ mi la mɛna wana nila baŋulɛiyo ɔɔ mi la hendul wana sumɛiyo+ nyɔɔ o nɛi le. La nɔ mi la nɔ siooŋnde le Mɛlɛka nyaa.+ Ya cho Chɛhowa ni.

15 “‘La kialu yamɛi o kafalaŋ choo le. Nduyɛ, la yaala wana bala fondoo, mi la sim wana nɔ nyɛsɔlaa wo+ kɔɔli le. La kiolu yamɛi o nɛi sakpoo choo.

16 “‘La balu chaanda diolaŋ tɛɛmbuuwo le.+ Nduyɛ, la tosa nyɛ o nyɛ luei yoomu chaaŋ nya wanachioo+ o kpundɔɔ niŋndo le.* Ya cho Chɛhowa ni.

17 “‘A nɔ ma tul puaapilɛnɔ numndo leyɛ o kɔl numndo niŋ+ te. A nɔ ma miŋgi chaŋ num+ o nɛi, yɔŋii num bɛɛ luɛi o hakioo niŋ.

18 “‘La nɔ mi la miŋgi maa le,+ nduyɛ la nɔ mi la bii wana o kɔl te. Kɛ, la nɔ mi la kaala chaaŋ nya wanachioo mɛɛ nya kaala nyapila+ yɛ. Ya cho Chɛhowa ni.

19 “‘La nɔ mi la bii sawala nilaŋ ndaŋ: La nɔ mi la chɛl mi chɔluaa cho suu pilɛ le wa a hel te. Wana tosa kpeloo ma tɔl yɛiyoŋ ŋ muuŋ+ leniŋ te. Nduyɛ, nyɛla nda toosiaa a fuŋii yɛ yɛi i ŋiiŋ ndaŋ,+ la nɔ mi la wounuŋ ndaŋ te.

20 “‘Te wana lanɔɔ wa pɛ chiɔɔ mi wana pɔnɔɔ fula le ndu kɛ o baŋa wɔ chua koŋ te, okoŋ mi wana pɔnɔ cheleŋ tosa hiniei a ndu, a nɔ ma tusi nda nyɛpalaa choo. Kɛ a nɔ ma dii nda le, kanifuule chua koŋ ndoo sɔla wɔ baŋaŋndo le. 21 Po koŋ nɔ mbo hiŋ a saa kondoo o tɛndii bɔŋaŋndo hɔlndɔ, le sala yɔŋ wɔɔŋndo+ solioo o ya Chɛhowa lo. 22 Wana soliaa lasalaa cho saa kondo cho koŋ le sala yɔŋ wɔɔŋndo wo salaa soli o ya Chɛhowa lo, le mbo nyuna le malɔɔ hakioo le haki po koŋ tosa wo. Okoŋ, mi po koŋ sɔla malɔɔ hakioo.

23 “‘Te la luɛi pɛ o lɛŋnde nya cho kɔlaŋ ndeŋ niŋ mi la tɔl yɔmii wana dia komɔɔ ndɔɔ ve, le wɔsilaŋ la yaa, la nɔ mi la de komɔɔ yɔmii keŋ te. Kɛ la chua laŋ maa komɔɔla ya kuuna nya dioo laŋ la cho ni, nduyɛ maa la cho la nɔɔlɛi. 24 Kɛ o wɔsi hiɔɔloo niŋ, komɔɔ yɔmii keŋ kpou cho wa o diandaa, le mi la yɔŋgu ndu a kɔl kɛndɛ o ya Chɛhowa lo.+ 25 O wɔsi ŋuɛɛnoo niŋ, la nɔla mi la de komɔɔ yɔmii keŋ, nduyɛ mi komɔɔla laŋ la handuŋ o nyɛm nya dia woŋ choo. Ya cho Chɛhowa Mɛlɛka nyaa ni.

26 “‘Nyɛ o nyɛ nɔ koowaŋ leniŋ,+ la dia ndu le.

“‘La wa wanaa viamaa yawaa ɔɔ wanaa maŋgalaa le.+

27 “‘La nɔ mi la sendi yiiŋnde nya o lebol o kpeŋgoŋ te.* Nduyɛ, la nɔ mi la tɛɛmbuu siɛiyii nyɛi le.+

28 “‘La nɔ mi la tɛɛndiaa dialuŋ nyaŋ le wana vilɛiyo*+ le. Nduyɛ, la nɔ vɛlɛ mi la tuuliaa nyɔɔŋ o dialloŋ te. Ya cho Chɛhowa ni.

29 “‘La tusi chuauwaa nyaa siɔmbulaŋ, mi la siiŋguu nda wanaa suundɛiya+ le, yɔŋii lɛŋndeŋ le simnuŋ le nɔɔlɛi a kaa suundɛiyo, nduyɛ mi kaala nɔɔlɛilaŋ+ la pɛ leniŋ cha.

30 “‘La nɔ mi la biilu paale nile pɛŋgiaaleŋ,+ nduyɛ mi la nɔ bɛɛleŋ* le chiɛi nuu. Ya cho Chɛhowa ni.

31 “‘La kua o wana ŋwaŋ vilɛiyo+ lo ɔɔ o wana dimi sɔɔŋ waa lachioŋ ndo+ lo le, yɔŋii nya simnuŋ wanaa nɔɔlɛi. Ya cho Chɛhowa Mɛlɛka nyaa ni.

32 “‘La che pɛ waŋndo a yuluŋnde, la chɔŋ isisi.+ Te la che pɛ bɛndu yuuwo,+ la ke ndu bɛɛleŋ. La nɔ mi la nɔ siooŋnde le Mɛlɛka nyaa.+ Ya cho Chɛhowa ni.

33 “‘La nɔ mi la bii mialaa cho nya tɛɛŋ nda biyɔɔ wɔɔŋndo le.+ 34 La nɔ mi la bii mialaa cho nya tɛɛŋ+ nda mɛɛ nya bii nyapila yɛ, nduyɛ mi la kaala nda mɛɛ nya kaala nyapila yɛ. Kanifuule, mialla nya bɛɛ wa o lɛŋnde Ichipi leŋ niŋ+ ni. Ya cho Chɛhowa Mɛlɛka nyaa ni.

35 “‘Te la wa pɛ nyɔɔ tuuwo le sinaa bandii nduɛi,+ lusul ndɔɔ, ɔɔ mɛɛ kpɛ o cho yɛ, la nɔ mi la tosa kafalaŋ te. 36 La nɔ mi la soliŋ sekeleila kpeekpeilaŋ a nyɛla tuwaala kpeekpeilaŋ*+ kpeku le nyɔɔŋ tuuwo. Ya cho Chɛhowa Mɛlɛka nyaa, o soli nya o lɛŋnde Ichipi leŋ niŋndo ni. 37 Lelaŋ, la nɔ mi la bii sawala nilaŋ kpou, mi la tosa nyɛ la dimi wo, nduyɛ mi la kuɛ o laŋ choo.+ Ya cho Chɛhowa ni.’”