Maatiu
19 Mɛɛ Chiisu chii sɔɔŋ muŋ dimi, mbo faŋaŋ Kalili mbo kua o pɛŋgulaŋ o tanda Chudiaa wo niŋ, Chɔɔdaŋ leeloo.+ 2 Mi waŋnda faŋga bɛndoo tual ndu vɛlɛ kɔɔli loŋ, nduyɛ mbo siŋgi nda.
3 Okoŋ, mi Falisiiya huŋ le ndu tɔɔndaŋndo. Ma nyuna ndu aa: “Baa o bɛnda pa mi wana pɔnɔɔ kɛɛ laa ndɔ le sabu kɛ kɛ?”+ 4 Mi Chiisu mulul nda aa: “Baa la chi wɔ o diom Mɛlɛkaa niŋ maa o kandɔŋndo pa mi Mɛlɛka toosiaa wana pɔnɔɔ a wana lanɔɔ le?+ 5 Mi Mɛlɛka dimi aa: ‘Le saboo hoo poo mɛi finya ndɔ a kala ndɔ ni ma chalnuŋ nda laa ndɔ, okoŋ ma simnuŋ dialle i pilɛ.’+ 6 O hei niŋ, a cho lɛ wanaa ŋiɔɔŋ te, kɛ dialle i pilɛ. Lelaŋ, nyɛ Mɛlɛka mɔɔsa pɛ, wana o wana nɔ mbo piɔu ndu tɛɛŋ te.”+ 7 Ma nyuna ndu aa: “Le yɛɛnɛ Muuse dimi yɛ niko maa te wana pɔnɔɔ yeema pɛ laa ndɔ kiɔɔ, o nɔ mbo ke ndu yau kɛyaŋndo?”+ 8 Mbo mulul nda aa: “Le nila kalula nyalaŋ Muuse chɛl nya ni le mi la kɛɛ laandaa nyaa.+ Kɛ o cho lende le i wa o kandɔŋndo le.+ 9 Mi dimul nya maa wana o wana kɛɛ laa ndɔ pɛ mbo chua lanɔ cheleŋ, te o cho yɛ le kaa ihini nɔɔlɛiyo* le, mɛɛ wana koŋ suunda.”+
10 Mi buɛiyaa nduaa dimul ndu aa: “Te o wa pɛ aa lende nɔɔ cho ni, mɛɛ o bɛnda bɛɛ mi wana chua lanɔ kposoŋ te.” 11 Mbo dimul nda aa: “O cho waŋnda kpou le tiuba keŋ tosaa le, mɛɛ wanaa nɔ ke koŋ nda.*+ 12 Waŋnda apum, a vilu nda ŋwaŋ piaandu le. Apum, waŋnda dii nda lɛmbɛ ni. Apum yɛ, ndapila yeema ni ma waŋnuŋ lende le Masale Mɛlɛkaleŋ o choo choo niŋ. Lelaŋ, num nɔla pɛ ma wa lende, mɛɛ waŋnuŋ lende.”+
13 Okoŋ, mi waŋnda huŋ a chuaambuaa pɔmbuaa naa Chiisu chua le mbo handu nda balaŋ choo, nduyɛ mbo piɛi le nda. Kɛ mi buɛiyaa nduaa kuuna nda.+ 14 Mi Chiisu dimul nda aa: “La mal chuaambuaa pɔmbuaa a huŋ o ya lo. La kuuna nda le, kanifuule le haa ndoo Masale Mɛlɛkaleŋ o choo choo niŋ le cho ni.”+ 15 Mbo handu nda balaŋ choo. Okoŋ, mbo faŋaŋ o fondaŋ koŋ.
16 Okoŋ kɔɔli, mi wana pilɛ huŋ naa Chiisu chua, mbo nyuna ndu aa: “Wana Pɛɛkaa, sɔɔŋ kɛndɛŋ kuɛɛ ya nɔ yɛ mi tosa le mi sɔla yoomu fafɛɛŋndo?”+ 17 Mbo mulul ndu aa: “Le yɛɛnɛ ŋ cho yɛ nyunaa le sɔɔŋ kɛndɔŋ? Wana kɛndɔɔ ndupilɛ kpe cho ni.+ Kɛ te a yeema pɛ ma sɔla yoomoo, hiou lachi a sawala Mɛlɛkalaŋ biyɔɔ.”+ 18 Mbo nyuna Chiisu aa: “Sawala kuɛɛ?” Mi Chiisu muli aa: “Wana dii wanachioo le,+ wana suunda le,+ wana yɔŋ levii le,+ wana tɛnda seile lakafa le,+ 19 ke finya num a kala num bɛɛleŋ,+ nduyɛ ma kaala wana nya chiɛɛliaŋ ndo* mɛɛ ŋ kaala numpila yɛ.”+ 20 Mi poo hoo dimul ndu aa: “I cho laŋ kpou biyɔɔ. Yɛɛnɛ cheleŋ ya nɔ yɛ mi tosa?” 21 Mi Chiisu dimul ndu aa: “Te a yeema pɛ ma wa walaŋ,* mɛɛ kɔ pisi nyɛm numndoŋ ma ke wanaa bala fonduaa kaniŋ muŋ. A cho sullo sɔla o Mɛlɛka lo.+ Okoŋ a hiŋ, a tol la kɔɔli.”+ 22 Mɛɛ poo hoo tuei hei, mbo kuaŋnuŋ a kɔllo o tambɛi, kanifuule ndoo nɔ nyɔɔŋ tau.+ 23 Mi Chiisu dimul buɛiyaa nduaa aa: “A tonya mi dimul nya, i cho ikala le mi wana sulaa luɛi o Masale Mɛlɛkaleŋ niŋ o choo choo niŋ.+ 24 Mi dimul nya vɛlɛ maa, i cho bɛɛŋ bɛɛŋ le mi nyɔɔmiɔɔ kei o tɛɛŋgu lesiɛndioo niŋ, mbo hiau wana sulaa luɛiyɔɔ o Masale Mɛlɛkaleŋ niŋ.”+
25 Mɛɛ buɛiyaa nduaa tuei hei, mi kɔndɔfillo bii nda tau tau. Okoŋ ma dimi aa: “Mɛɛ mi nɛɛnɛ kpeekpei sɔla yɛ niŋ pioŋɔɔ?”+ 26 Mi Chiisu tofa nda chiŋ, mbo dimul nda aa: “I cho i kala le wanachioo. Kɛ Mɛlɛka ndu nyɛ o nyɛ kindu a ndu le.”+
27 Okoŋ mi Pitɛ nyuna Chiisu aa: “Mɛɛ naŋ mal niŋ nyɛ o nyɛ miŋ tual num kɔɔli yɛ, yɛɛnɛ wa yɛ niŋ le naa?”+ 28 Mi Chiisu dimul nda aa: “A tonya mi dimul nya, teleŋ nyɛ o nyɛ miiŋgu niŋ o sɛnɛi, nduyɛ mi Po wanachioo wa ichali o kpeŋgbei* ndɔ lemasa lebɛɛ bɛndoo choo wo, nya tol la kɔɔli wa chal niŋ o kpeŋgbeila lemasalaŋ 12 choo, nduyɛ mi la kɔɔsa a kaala 12 ndaŋ Isɔluɛi.+ 29 Nduyɛ wana o wana mɛi pɛ chiɛila ndɔlaŋ, ɔɔ bɛndaa nduaa, ɔɔ pɔmbuaa nduaa, ɔɔ yemaa nduaa, ɔɔ finya ndɔ, ɔɔ kala ndɔ, ɔɔ chuauwaa nduaa, ɔɔ yondola ndɔlaŋ le mɛɛ o cho buɛi ni yɛ, Mɛlɛka cho ndu hunɔɔ hendul lechoo hiouwɔɔ bɛmbɔɔ kɛmɛ, nduyɛ mbo ke ndu vɛlɛ yoomu fafɛɛŋndo.+
30 “A bɔɔbɔɔ cho wanaa tasiaa wa cho simnɔŋ wanaa mɛɛlaa, mi a mɛɛlaa simnuŋ wanaa tasiaa.+