Ɛsodɔɔ

31 Mi Chɛhowa dimul vɛlɛ Muuse aa: 2 “Kɛsiŋ o kɔl maa, I hɛli Bɛsalɛɛ,+ po Yului wo, ndu yɔŋnuŋ ni maa po mama Hɔɔ wo, fulaa o kaale Chuda leŋ choo.+ 3 I cho ndu nyina nuu ke, okoŋ mbo sɔla taasioo, sinapɛŋgoo, vɛlɛ a kɔl kaloo le tosaa wali suu o suu nda toosiaa nyɔɔŋ a laba, 4 le nyɔɔŋ tuuliaa, wallo a kooliiye, kanii humbuei, chiliŋii siaŋɛi,* 5 vɛlɛ a wallo le poutaŋ siɔlɔɔ a laŋ hɛɛnduuwo kpɛ kpɛ,+ nduyɛ mbo chaa nyɛ o nyɛ toosiaa a yɔmnde.+ 6 I hɛli Oholiabi,+ po Ahisamaki wo, fulaa o kaale Daŋ ndeŋ choo, le mbo wa wana malaa Bɛsalɛɛ wo. Wana o wana chaa nyɛ a laba, I cho nda taasioo ke le ma toosiaa nyɛ o nyɛ ya dimul num.+ 7 Tɛndii bɔŋaŋndo ni,+ kɔfu laSawaa ni,+ kumbu cho wa lechoo wo ni,+ nyɛm walloŋ kpou o tɛndiiyo niŋ, 8 tibiiyo*+ a nyɛm ndɔŋ laandoŋ, nyɛ kɛsiaa lambui cho wa a koolii kɛndɛ kɛndɛiyo a nyɛm ndɔŋ laandoŋ kpou,+ bandu luamaa nyɛm chuŋ kɛndɔŋ,+ 9 bandu luamaa lasalaa+ a nyɛm ndɔŋ laandoŋ kpou, hɛŋgɛiyo a nyɛ nda cho ndu kɛsi lechoo wo,+ 10 domala womulaala kɛndɛ kɛndɛlaŋ, domala diandaa laŋ le Elɔŋ wana soliaa lasalaa, domalaŋ le puaa nduaa cho wa wali wanaa soliaa lasalaa tosaa wa,+ 11 chuɛiyaŋ le pɔyaa, vɛlɛ a nyɛm chuŋ kɛndɔŋ le fondaŋ diandaa.+ Nyɛ o nyɛ ya dimul num le tosaa, nda cho tosa ni.”

12 Mi Chɛhowa dimul vɛlɛ Muuse aa: 13 “Dimul Isɔluɛiya aa, ‘Sawa ya dɔu a paale nile pɛŋgiaaleŋ okɔɔ wo, la nɔ mi la bii ndu.+ Kanifuule, tamasioo cho koŋ naa tɛɛŋ naa nyaa ni le fɛɛŋ a fɛɛŋ, le mi la sina maa ya Chɛhowa hɛli nya ni le mi la wa wanaa niaa teŋgeŋnda. 14 La nɔ mi la ke Paale Pɛŋgiaaleŋ bɛɛleŋ, kanifuule paale diandaa leŋ le cho le nya ni.+ Wana o wana nɔɔliaa leŋ pɛ, o nɔ mbo sɔla piɔmndo. Nduyɛ wana o wana tosa wallo o leŋ choo pɛ, wana koŋ nɔ mbo sɔla piɔmndo.+ 15 La tosa walta nyalaŋ o palɛi i ŋɔmpum bɛŋgu. Kɛ o paale ŋɔmmɛu leŋ choo, la nɔ mi la tosa wali kɛ kɛ le.+ La nɔ mi la pɛŋgi, kanifuule paale diandaa leŋ le cho le ya Chɛhowa ni. Wana o wana tosa pɛ wallo o Paale Pɛŋgiaaleŋ choo, o nɔ mbo sɔla piɔmndo. 16 Isɔluɛiya nɔ ma ke Paale Pɛŋgiaaleŋ bɛɛleŋ. A nɔ ma ke paaleŋ ndeŋ bɛɛleŋ le fɛɛŋ a fɛɛŋ, kanifuule kpema fafɛɛŋndo o cho ni. 17 Paale Pɛŋgiaaleŋ ndeŋ, le cho wa maa tamasi naa Isɔluɛiya tɛɛŋ le fɛɛŋ a fɛɛŋ.+ Kanifuule, o palɛi i ŋɔmpum bɛŋgu ya Chɛhowa toosiaa choo choo a lɛŋndeŋ ni, nduyɛ mi pɛŋgi o paale ŋɔmmɛu leŋ choo, mi naŋ kɔl tau.’”+

18 Dimioo nuaa mi Mɛlɛka chii suukaŋndo nda Muuse o Pembii Sanai Ve choo, mbo ke Muuse pouta yɛndɛla tiɔɔŋnda Sawalaŋ la wa la poonyiaa lechoo laŋ.+ Mɛlɛka pila poonyiaa Sawala ndaŋ o pouta yɛndɛlaŋ ndaŋ choo a iso ni.+