Lɛvitikɔɔ

18 Mi Chɛhowa dimul vɛlɛ Muuse aa: 2 “Dimul Isɔluɛiya aa, ‘Ya cho Chɛhowa Mɛlɛka nyaa ni.+ 3 La nɔ mi la tosa sɔɔŋ mɛɛ waŋnda o lɛŋnde Ichipi leŋ niŋ, naa nya wa wa, ndaa tosa sɔɔŋ yɛ le. Nduyɛ la nɔ mi la tosa sɔɔŋ mɛɛ waŋnda o lɛŋnde Kenaŋ ndeŋ niŋ, naa ya cho kɔlaŋ a nya wa,+ tosa sɔɔŋ yɛ le. La nɔ mi la tol naamula ndalaŋ kɔɔli le. 4 La nɔ mi la bii sawala nilaŋ, mi la tosa nyɛ la dimi wo, nduyɛ mi la kuɛ lechoo.+ Ya cho Chɛhowa Mɛlɛka nyaa ni. 5 La nɔ mi la bii sawala nilaŋ, mi la tosa nyɛ la dimi wo. Wana o wana bii sawala nilaŋ ndaŋ pɛ, o cho wa yoomu.+ Ya cho Chɛhowa ni.

6 “‘Wana o wana nɔ mbo hini+ a wanayɛi nduɛi kpɛɛluŋnde le. Ya cho Chɛhowa ni. 7 A nɔ ma hini a finya num te, nduyɛ a nɔ ma hini a kala num te. Le mɛɛ o cho kala num yɛ, a nɔ ma hini a ndu le.

8 “‘A nɔ ma hini a lanɔɔ finya num te.+ Finya num siɔmbulaŋ tusioo* cho koŋ ni.

9 “‘A nɔ ma hini a yema num te. O wa chua finya numndo ɔɔ chua kala numndo, nduyɛ o yɔŋ bɛɛ o chiɛi pilɔɔ niŋ nya veluŋ ni ɔɔ mi la viluŋ bɛɛ o chiɛi pilɛ niŋ te.+

10 “‘A nɔ ma hini a chua num mamaa le. O wa o po numndo ɔɔ o chua numndo velu wo. Kanifuule, numpila bɛɛlaŋ tɛɛmbuuwo cho koŋ ni.

11 “‘A nɔ ma hini a lanɔɔ finya num chua ndɔɔ le. Kanifuule, chua finya numndo o cho ni, nduyɛ yema num o cho ni.

12 “‘A nɔ ma hini a yemaa finya num te. Kanifuule, kooma piliaŋ nda cho nda finya num ni.+

13 “‘A nɔ ma hini a bɛndoo ɔɔ pɔmbɔɔ kala num te. Kanifuule, kooma piliaŋ nda cho nda kala num ni.

14 “‘A nɔ ma hini a lanɔɔ finya num bɛndu ɔɔ finya num pɔmbɔ ma tusi ndu siɔmbulaŋ te.* Kanifuule, kala num bɛndu ɔɔ kala num pɔmbɔ o cho ni.+

15 “‘A nɔ ma hini a lanɔɔ po numndo+ le. Le mɛɛ o cho lanɔɔ po numndo yɛ, a nɔ ma hini a ndu le.

16 “‘A nɔ ma hini a lanɔɔ bɛ num ɔɔ pɔmbɔ num+ te. Kanifuule, bɛ num ɔɔ pɔmbɔ num siɔmbulaŋ tusioo* cho koŋ ni.

17 “‘A nɔ ma hini a wana lanɔɔ, ma hini vɛlɛ a chua ndɔɔ+ le. Nduyɛ a nɔ ma hini a chua po ndɔɔ ɔɔ chua chua ndɔɔ velu wo le. Chuauwaa nduaa mamaa nda cho ni, nduyɛ kaa nɔɔlɛi wɔɔŋ wɔɔŋndo cho koŋ ni.*

18 “‘A nɔ ma chua wana lanɔɔ o nɔɔ niŋ, ma chua vɛlɛ bɛ ndɔ ɔɔ pɔmbɔ ndɔ le mbo wa diɔɔmu ndɔ+ le. Nduyɛ, a nɔ ma hini a ndu teleŋ laa num cho yoomu wo le.

19 “‘A nɔ ma hini+ a wana lanɔɔ boondii o cho o teleŋ ndɔɔ niŋnde le.

20 “‘A nɔ ma hini a lanɔ pila le,* yɔŋii ŋ simnuŋ wana nɔɔlɛiyo.+

21 “‘La nɔ mi la soli chuauwaa nyaa salaa o Molɛki+ lo le. La nɔ mi la nɔɔliaa diola nilaŋ o nɛi waa nuaa choo le.+ Ya cho Chɛhowa ni.

22 “‘Wana pɔnɔɔ nɔ mbo hini a wana pɔnɔɔ mɛɛ o hini a wana lanɔɔ+ yɛ le. Suɛi wɔɔŋ wɔɔŋnde cho keŋ ni.

23 “‘Wana pɔnɔɔ nɔ mbo hini a chɔloo le, yɔŋii o simnuŋ o nɔɔlɛi. Nduyɛ, wana lanɔɔ nɔ mbo chɛl mi chɔloo hini a ndu le.+ Kɛɛsiaa Mɛlɛkaa tɛɛmbuuwo cho koŋ ni.

24 “‘La nɔɔliaa nyapila a sɔɔŋ muŋ i kɛ kɛ le. Kanifuule, sɔɔŋ muŋ kpou tosa ni mi kaala ya cho nya touwɔɔ lachi laŋ la simnuŋ la nɔɔlɛi.+ 25 Lelaŋ lɛŋnde ndaleŋ le simnuŋ le nɔɔlɛi ni. I cho wanaa cho o lɛŋnde leŋ niŋnda nyɛpalaa tusi choo le sɔɔŋ wɔɔŋ nda cho tosaa woŋ, nduyɛ mi soli nda loŋ po.+ 26 Kɛ nya nya, la nɔ mi la bii sawala nilaŋ nduyɛ mi la tosa nyɛ la dimi wo.+ La nɔ mi la tosa sɔɔŋ wɔɔŋndoŋ muŋ i kɛ kɛ le. O wa Isɔluɛinɔɔ ɔɔ mialaa cho nya tɛɛŋ nda.+ 27 Kanifuule, sɔɔŋ wɔɔŋndoŋ muŋ kpou wanaa cho o lɛŋnde leŋ niŋ nya lachi+ wa tosa ni, mi lɛŋndeŋ le simnuŋ le nɔɔlɛi. 28 Okoŋ la nɔɔliaa niŋ lɛŋnde leŋ mi la sɔla solioo, mɛɛ wanaa cho nya lachi wa cho solioo sɔla leniŋ yɛ le. 29 Sɔɔŋ wɔɔŋndoŋ muŋ kpou, wana o wana tosa i pilɛ bɛɛ pɛ, o nɔ mbo sɔla piɔmndo. 30 Naamula wɔɔŋ wɔɔŋnda wanaa cho nya lachi wa cho tosaa laŋ,+ o pilɛ bɛɛ la nɔ mi la tosa le, le halikpeŋ mi la lo o buŋgɛi nya chua o ya lo ve choo. Okoŋ, la simnuŋ a nɔɔlɛi le. Ya cho Chɛhowa Mɛlɛka nyaa ni.’”