Ditɔnɔmii

18 “Wanaa soliaa lasalaa fula o pulale Livai leŋ choo wa a kaale Livai leŋ kpou, a cho nda nyɛm kɛŋ ke Isɔluɛiya tɛɛŋ te. Salala luamaala nda cho wa solioo o Chɛhowa lo laŋ nda cho wa dioo ni, nduyɛ nyɛm ndaŋ kiɔɔŋ cho wa muŋ ni.+ 2 Lelaŋ, a nɔ ma sɔla nyɛm kiɔɔŋ puaapiliaa ndaa tɛɛŋ te. Chɛhowa cho nyɛm kɛŋ ndaŋ ni, a mɛɛ o dimul nda yɛ.

3 “Nyɛm waŋnda nɔ ma ke wanaa soliaa lasalaa o visioŋ niŋndoŋ cho muŋ ni: Wana o wana wa pɛ salaa solioo, o wa nauwo ɔɔ saa, o nɔ mbo chua choŋgoo, yaalolaŋ, a demboo, mbo ke wana soliaa lasalaa. 4 O nɔ vɛlɛ mbo chua komɔɔla taselaŋ o kuluŋ ndɔŋ tɛɛŋ, muɛima ndɔma sɛnɛiyaŋ, chuɛima nduaŋ, vɛlɛ a yiiŋii tase o kili saa nduaa ve mbo ke wana soliaa lasalaa.+ 5 Chɛhowa Mɛlɛka nyaa hɛli ndu a puaa nduaa o kayii nyɛi tɛɛŋ kpou ni, le ma wa wallo o diola Chɛhowa laŋ niŋ teleŋ o teleŋ.+

6 “Kɛ te Livainɔɔ yeema pɛ faŋaŋndo o chieeŋ nyaŋ bɛndoŋ o Isɔluɛi niŋ i pilɛ le kɔlaŋ challe+ o fondaŋ Chɛhowa hɛli wo,*+ 7 o hiau lachi a wallo tosaa loŋ o diola Chɛhowa Mɛlɛka ndɔɔ niŋ, mɛɛ puaapiliaa nduaa Livaiya cho wallo tosaa loŋ Chɛhowa lachi yɛ.+ 8 O fulawɔ o nyɛ o sɔla o nyɛm ndɔŋ o pisi woŋ kɔɔli, o nɔ mbo wa nyɛdiaa sɔlaa mɛɛ nda bɛɛ sɔla yɛ.+

9 “Te la fuuluu pɛ o lɛŋnde Chɛhowa Mɛlɛka nyaa cho nya kioo leŋ niŋ, la tosa sɔɔŋ wɔɔŋ kayii cho loŋ nde tosa woŋ te.+ 10 Wana o wana soli po ndɔɔ ɔɔ chua ndɔɔ salaa o yiŋndeŋ niŋ,+ o nɔ mbo wa nya tɛɛŋ te. Nduyɛ wanaa tosa sɔɔŋ muŋ nda bɛɛ, a nɔ ma wa nya tɛɛŋ te: Wana kua o mandenɔɔ lo wo,+ wana maŋgalaa,+ wana viamaa yawaa,+ mandenɔɔ,+ 11 wana yɔŋul waŋndo a kooma wɔɔŋndaŋ ndo, wana ŋwaŋ vilɛiyo,+ wana dimi sɔɔŋ waa lachioŋ ndo,+ a wana kua o wana ŋwaŋ vilɛiyo lo wo.+ 12 Wana o wana tosa pɛ sɔɔŋ muŋ, Chɛhowa tul ndu leyɛ, nduyɛ le sɔɔŋ Chɛhowa Mɛlɛka nyaa tul muŋ leyɛ woŋ, o cho nda touwɔɔ nya lachi ni. 13 La nɔ mi la nɔ sɔŋ o sɔŋ Chɛhowa Mɛlɛka nyaa o hɔl te.+

14 “Kanifuule, mi kayii nya cho hei lɛŋii ndɛi hiɔlɔɔ ve ndaa kuɛ o wanaa maŋgalaa lo,+ a o wanaa viamaa layawaa lo.+ Kɛ Chɛhowa Mɛlɛka nyaa chɛl nya mi la tosa sɔɔŋ waa nuaa le. 15 Chɛhowa Mɛlɛka nyaa cho hɛli wana suaa le ndu wo puaapiliaa nyaa tɛɛŋ maa ya. La nɔ mi la yaŋ ndu nilaŋ.+ 16 Hei cho yɔŋnɔŋ le mi Chɛhowa Mɛlɛka nyaa tosa nyɛ nya dimul ndu o Pembei Holuɛɛbi, teleŋ nya chuuŋgiaŋ loŋ ndo.+ Mi la dimi aa, ‘Tosa lɛ miŋ tuei Chɛhowa Mɛlɛka naa diom ɔɔ miŋ che yiŋnde bɛndule waa nuaa le, yɔŋii naŋ sɔla piɔmndo.’+ 17 Okoŋ, mi Chɛhowa dimul la aa, ‘Nyɛ nda dimi wo naŋ. 18 I cho wana suaa le ya wo hɛli puaapiliaa ndaa tɛɛŋ maa num,+ mi dimul ndu nyɛ o nɔ mbo dimul nda wo,+ okoŋ mbo dimul nda ndu kpou.+ 19 Wana ya hɛli le suɛi o diolaŋ nilaŋ niŋndo, wana o wana yeŋ ndu lani le, o nɔ mbo dɔɔnuŋ kona o ya lo.+

20 “‘Te wana suaa le ya wo o kɛ kɛ dimi pɛ nyɛ ya dimul ndu le wo o diola nilaŋ niŋ a yoŋga, ɔɔ mbo soo o diola mɛlɛkaa cheleŋnda niŋ, wana koŋ nɔ mbo sɔla piɔmndo.+ 21 Kɛ mi la dimiŋ dɔɔ o lakɔl aa: “Vɛɛ naŋ looku yɛ sina maa o cho Chɛhowa le dimi diomndaŋ ndaŋ te?” 22 Te wana suaa le ya Chɛhowa wo soo pɛ o diola nilaŋ niŋ, nduyɛ mi nyɛ o dimi wo peeluŋ te ɔɔ mbo ve tonya le, mɛɛ o cho ya Chɛhowa le soo o ndu lo le. A yoŋga wana suaa koŋ le ya wo soo ni, nduyɛ la nɔ mi la yaŋ ndu lani le.’