Sɛkalaya

8 Mi Chɛhowa, Mɛlɛka puaa chɔuwa suaa vɛlɛ o ya lo aa: 2 “Nyɛ ya Chɛhowa, Mɛlɛka puaa chɔuwa dimi wo cho hoo ni, ‘I cho Saayɔŋ manda. A tonya, I cho ndu manda a kɔl nuu kpou.’”+

3 “Nyɛ ya Chɛhowa dimi wo cho hoo ni, ‘I cho miiŋgu Saayɔŋ,+ nduyɛ mi chal Chulusalɛm.+ Waŋnda cho Chulusalɛm veelu aa chiee bɛndu tonyaa,+ nduyɛ ma veelu pembii Chɛhowa, Mɛlɛka puaa chɔuwa ve aa, pembii diandɛi.’”+

4 “Nyɛ ya Chɛhowa, Mɛlɛka puaa chɔuwa dimi wo cho hoo ni, ‘Waŋ piaanduaa a waŋ laanduaa yuwɛiya cho miiŋgu vɛlɛ ichali o luŋndaŋ Chulusalɛm. Nduyɛ, wana o wana cho nɔ tindaa o ba, kanifuule a cho wa a yuwɛi kudɛɛ.+ 5 Chuaambuaa cho wa a piaa cha o luŋnda chiee bɛndu koŋ niŋ, ma wa pisultaŋ loŋ.’”+

6 “Nyɛ ya Chɛhowa, Mɛlɛka puaa chɔuwa dimi wo cho hoo ni, ‘Mi che bɛɛ wanaa cho lo yoomu o palɛi keŋ niŋnda cho ndi chɔ ikala kpoke, kɛ baa i wa niŋ pa ikala kpoke le ya?’ Ya Chɛhowa, Mɛlɛka puaa chɔuwa dimi lende ni.”

7 “Nyɛ ya Chɛhowa, Mɛlɛka puaa chɔuwa dimi wo cho hoo ni, ‘Wanaa niaa cho o lɛŋii cho ba paaleŋ le chaŋ ndo a ba le del lo wa, I cho nda piŋi ndi o ba.+ 8 I cho hunɔɔ a nda Chulusalɛm,+ nduyɛ ma chal loŋ. A cho simnɔŋ wanaa niaa, nduyɛ mi simnuŋ Mɛlɛka nda+ nɔ tonyaa, mbo wa sakpo wo.’”

9 “Nyɛ ya Chɛhowa, Mɛlɛka puaa chɔuwa dimi wo cho hoo ni, ‘Nya cho diomnda wanaa suaa le Mɛlɛka wa+ nilaŋ yaŋɔɔ wa, la nɔ kɔl simulaa.+ Nduyɛ, teleŋ nda kila chiyii chiɛi Chɛhowa, Mɛlɛka puaa chɔuwa le ndu taŋgullo wo, diomnda pilɛ laŋ ndaŋ kpe nda dimul nya ni. 10 Tuupa mi teleŋ koŋ o fuuluu, paawa* ve le wali waŋnda chieeya ɔɔ visiaa ndaa tosa wo le. Nduyɛ le mɛɛ yaamɔɔwa wa yɛ,+ waŋnda ve hɛnɛkɛ le balɔɔ mɛɛ ndaa yeema yɛ le. Kanifuule, mi tosa mi waŋnda kpou mululaŋ vellaa velle.’

11 “‘Kɛ wanaa niaa lo haa yoomu wa, I cho nda biyɔɔ mɛɛ yaa bii nda o paandoo niŋ yɛ le.’+ Ya Chɛhowa, Mɛlɛka puaa chɔuwa dimi lende ni. 12 ‘A cho kuluŋ kɔl nyuloŋ saŋɔɔ, mi kilepiima ndaŋ ma yɔŋgu kɔmndeŋ,+ nduyɛ mi lɛŋndeŋ le nɛŋi tɔlɔɔlaŋ. Choo choo cho wa mɔmndo yɔŋgoo le nda. Nduyɛ, I cho tosa mi wanaa niaa lo haa yoomu wa sɔla nyɔɔŋ muŋ kpou.+ 13 Nya waŋnda Chuda a nya waŋnda Isɔluɛi, waŋnda ndaa che nya paandu maa wanaa sendioo cho choo wa.+ Kɛ, I cho nya piŋi nduyɛ mi dɔu nya sala.+ La yɔŋ isiooŋ te!+ La nɔ kɔl simulaa.’+

14 “Nyɛ ya Chɛhowa, Mɛlɛka puaa chɔuwa dimi wo cho hoo ni, ‘“Le mɛɛ finyaa nyaa mamaa a tosa mi duaunuŋ tumbe yɛ, mi kɛɛsiaa le nya nyɛpalaa tusioo choo, nduyɛ mɔnɛi bii ya kposoŋ te.”+ Ya Chɛhowa, Mɛlɛka puaa chɔuwa dimi lende ni. 15 “Kɛ a teleŋndo hoo, I kɛɛsiaa le mi tosal waŋnda Chulusalɛm a waŋnda Chuda nyɛ cho o kɛndɔɔ wo.+ La yɔŋ isiooŋ te!”’+

16 “‘Sɔɔŋ nya nɔ le tosaa woŋ cho muŋ ni: La dimulaŋ tonyalaŋ vellaa velle.+ Yamaŋ nya kialu o diola kpakila nyalaŋ ndoŋ nɔ miŋ wa sakpo, nduyɛ miŋ hiŋ a kɔl nyuloo.+ 17 La kɛɛsiaŋ sɔɔŋ wɔɔŋndoŋ o lakɔl le chaaŋaa nyaa le.+ Nduyɛ, la kaala buŋgaŋ lachoowaŋ chuaa le,+ kanifuule sɔɔŋ muŋ kpou ya tul leyɛ ni.’+ Ya Chɛhowa dimi lende ni.”

18 Mi Chɛhowa, Mɛlɛka puaa chɔuwa suaa vɛlɛ o ya lo, mbo dimi aa: 19 “Nyɛ ya Chɛhowa, Mɛlɛka puaa chɔuwa dimi wo cho hoo ni, ‘Sum nya bii o paŋgii hiɔɔluei niŋndo ni,+ o nya bii o paŋgii ŋuɛɛnuei niŋndo ni,+ o nya bii o paŋgii ŋɔmmɛu ve niŋndo ni,+ a o nya bii o paŋgii tɔ ve niŋndo+ cho simnɔŋ boonduŋ nyaale le waŋnda Chuda. Nduyɛ, bɔŋaŋnda kɔl kɛndɛlaŋ la wa niŋ ni.+ Lelaŋ, la kaala tonyaa a kɔl nyuloo.’

20 “Nyɛ ya Chɛhowa, Mɛlɛka puaa chɔuwa dimi wo cho hoo ni, ‘Teleŋ cho fuuluu, mi waŋnda fula ba o ba fee a o chieeŋ bɛnduŋ bɔɔbɔɔ niŋ ma hiŋ. 21 Nduyɛ, waŋnda cho chɔnɔŋ o chiee bɛndoo niŋ ma kuɛ o chiee bɛndu cheleŋ niŋ, ma dimul wanaa cho loŋ nda aa: “Ŋ kɔŋnuŋ a kɔllo kpou miŋ kɔ nuuviaa Chɛhowa, Mɛlɛka puaa chɔuwa, okoŋ miŋ nyɔɔlu ndu Chɛhowa le mbo dɔu naa sala. Naa bɛɛ ŋ cho lakɔ.”+ 22 Wanaa bɔɔbɔɔ a lɛŋii kpaayɛi bɛnduei cho hunɔɔ Chulusalɛm+ le Chɛhowa, Mɛlɛka puaa chɔuwa nuuviaa, nduyɛ ma nyɔɔlu ndu Chɛhowa le mbo dɔu nda sala.’

23 “Nyɛ Chɛhowa, Mɛlɛka puaa chɔuwa dimi wo cho hoo ni, ‘O palɛi keŋ niŋ, ŋwaŋ tɔ cho fula o sɔɔŋ maŋgalaŋ niŋ kpou o chieeŋndo choo,+ ma huŋ saa bɔɔle doma Chuunɔɔ. A tonya, a cho leŋ saa kpiŋ ma dimi aa: “Ŋ yeema miŋ kuɛ a nya latulu,+ kanifuule ŋ tuei maa Mɛlɛka cho a nya latulu.”’”+