Tɛsaloniaŋ Diiŋ Ndɔɔ
1 Ya Pɔɔl, Sivanɔɔ,* a Timoti+ cho nya yauwo hoo poonyiallo ni. Nya cho o kundaa niŋ Tɛsalonaika, mi la wa o diompilɔɔ niŋ nya Mɛlɛka Finyaa, a Masanɔɔ Chiisu Kiliti wa:
2 Maa Mɛlɛka Finya naa nda Masanɔɔ Chiisu Kiliti tosal nya kɛndɛi ndɛi bɛnduei, nduyɛ ma ke nya kɔl nyuloo fɔ!
3 Puaapiliaa naa, ŋ nɔ miŋ wa Mɛlɛka balikaa mello teleŋ o teleŋ le nya. Hei bɛnda, kanifuule laalaŋ nyaa cho hiouwɔɔ lachi a kaloo poŋ. Nduyɛ kaala cho nya tɛɛŋ vellaa velle wo bɛɛ cho hiouwɔɔ lachi a chɔɔlɔŋndo.+ 4 Lelaŋ naŋ cho yoŋgaa kiolɔɔ a nya okɔɔ+ kundala wanaa Mɛlɛkaa tɛɛŋ ni. Ŋ cho nda keiyo dimullo maa, mi che bɛɛ waŋnda cho nya nyɛpalaa tusioo choo, nduyɛ mi simulta cheleŋ la wa nya komallo, la cho hiouwɔɔ lachi a biuwɔŋndo, mi la wa tiindaŋ nyaa dɔwɔɔ o Mɛlɛka niŋ.+ 5 Hei chɔm ni maa o sandei choo Mɛlɛka kialu yamɛi ni. Nduyɛ biuwɔŋ nyaa cho tosa mi la simnuŋ wanaa bɛnda le luɛiyɔɔ o Masale Mɛlɛkaleŋ niŋnda. Le Masaleŋ ndeŋ nda cho nya nyɛpalaa tusioo choo ni.+
6 Le mɛɛ Mɛlɛka cho sakpo yɛ, o cho hunɔɔ wanaa cho nya nyɛpalaa tusioo choo wa maa miŋgul.+ 7 Kɛ nya nda cho haa nyɛpalaa tusioo choo wa, Mɛlɛka cho nya hunɔɔ pɛŋgioo ke naa nyaa latulu. O cho hei tosa boondii Masanɔɔ Chiisu chɔɔmuŋ niŋ+ o choo choo niŋ a maalikɛiyaa nduaa kpaayaa bɛnduaa,+ 8 o yiŋnde wule wuleleŋ niŋndo. O cho wanaa sina Mɛlɛka le wa, a wanaa kɛɛ yooŋgu kɛndɔɔ a Masanɔ naa Chiisu okɔɔ wa nyɛpalaa tusi choo.+ 9 Masanɔ naa cho waŋnda haa yamɛi kilul. Nduyɛ nyɛpalaa nda sɔla niŋndo cho tambii fɛɛŋ fɛɛŋnde ni.+ Le hei, fɛɛŋ bɛɛ o nue lɛ niŋ nda, ɔɔ mbo mala nda a kpaaya ndɔ bɛndoo le. 10 Paale Masanɔɔ cho hunɔɔ le mbo sɔla biiloo latulu nda wanaa nduaa diandaa leŋ, wanaa chɔm laalaŋndo wa kpou cho ndu tofa, okoŋ mi kɔndɔfillo bii nda. Kanifuule, la laalaŋ yooŋgu naŋ dimul nya wo.
11 Le sabu koŋ naŋ cho teleŋ o teleŋ Mɛlɛka piɛileŋ le nya ni, le mbo che nya maa la bɛnda le yoomu o veelu nya wo sɔlaa.+ Mbo soliŋ kpaaya ndɔɔ kpeku le mbo siou yeemaŋ kɛndɛŋ cho nya o lakɔl, nduyɛ mi la duau laalaŋndo o muŋ niŋndoŋ peelu. 12 Hei cho yɔŋnɔŋ le mi diola Masanɔɔ Chiisu laŋ la sɔla biiloo o nya niŋ, nduyɛ mi nya bɛɛ sɔla biiloo o ndu niŋ, sanaa a kɛndɛi bɛnduii Mɛlɛka naa a Masanɔɔ Chiisu Kiliti tosal naa ve.