Sam
Chondii Deeve ve.
141 Oo Chɛhowa, I cho num veeloo.+
Huŋ chɔchɔ ma mala ya.+
Te I veelu num pɛ le malaa, yandii muli ya diom.+
2 Maa piɛile nileŋ le wa maa nyɛm chuŋ kɛndɛŋ+ nda toosiaa num lachi woŋ,+
Nduyɛ mi bala ya heelu naa num chua laŋ la wa maa sala ŋkul nda soli ichɔl lo.+
3 Oo Chɛhowa, mala ya mi manda sondo nuu.
Chɛl mi suɛi wɔɔŋ fula ya o sondo le.+
4 Chɛl mi kɔllo del la o suɛi wɔɔŋ kɛ kɛ le,+
Yɔŋii ya tosa sɔɔŋ wɔɔŋndoŋ a wanaa dɛnɛ wɔɔŋnda latulu.
Maa fɛɛŋ bɛɛ I dia nyɛdiaa nda yeelɛiyo le.
5 Te wana cho sakpo wo soŋ ya pɛ, mɛɛ kaala lo lechoo wo o chɔm ya ni.+
Te o miŋgi ya pɛ o nɛi, I wa ko maa chuɛiyaŋ nda tala ya o lebol ni,+
Nduyɛ kposoŋ bɛɛ bolle nileŋ le kɛɛ maŋ te.+
O yɔŋ bɛɛ mi wanaa cho sakpo wa wa o kpundɔɔ niŋ, I cho hiouwɔɔ lachi a piɛileŋ naa num chua.
6 O yɔŋ bɛɛ mi wanaa ndaa kialaa ŋyamaa fula o pembuŋ feke fekoŋ ma del,
Waŋnda cho nilaŋ yaŋɔɔ o diomnda nilaŋ, kanifuule la naŋ.
7 Mɛɛ mɛɛ waŋndo wa nuaa waa mbo wuŋjula puuloo yɛ,
Lende koni paala naalaŋ la sɛŋiŋ o Sɛiyo* sondoo ni.
8 Oo Chɛhowa, Mɛlɛka Kpuluŋguma Bɛndoo, o numndo ya muliŋ ni.+
Num cho naa niaa viaŋnaŋnda ni.
Tosa mi sɔla piɔmndo le.
9 Manda ya yɔŋii ya del o yaŋɔɔla nda kɛsul la laŋ niŋ,
Yaŋɔɔla wanaa dɛnɛ wɔɔŋnda kɛsul la laŋ.
10 Wanaa dɛnɛ wɔɔŋnda kpou cho hau o yalala ndapila handu laŋ niŋ,+
Kɛ ya, mi hiounuŋ yɛlɛkɛlɛɛ nyɛ o nyɛ yɔŋnuŋ ya le.