Ɛsodɔɔ

30 “Toosiaa bandu luamaa lasalaa a yɔm akeesiaa wo,+ le waa nyɛm chuŋ kɛndɔŋ lomɔɔ lechoo.+ 2 Kpeŋguŋ ndɔŋ hiɔɔloŋ nɔ miŋ wa kpeŋkpeŋ. Bandei nɛiyo le pilɛ a tɛndaa tɛɛŋ,* toŋgei nɛiyo le pilɛ a tɛndaa tɛɛŋ, a helɔɔ nɛiyo le yaa. A nɔ ma toosiaa ndu latulu a leela ndɔlaŋ.+ 3 La nɔ mi la kumbu ndu kpou a koolii kɛndɛ kɛndɛi lechoo, kpeŋguŋ ndɔŋ vɛlɛ a leela ndɔlaŋ. La balu kooliiye hɛɛnduuwo chɛ chɛ. 4 La nɔ mi la hɛɛnduu kelaŋ nda toosiaa a kooliiye woŋ ŋ muuŋ o kpeŋgoŋ vellaa velle, o fonda nya balu kooliiye handɔɔ chɛ chɛ wo bɛŋgu. O kelaŋ muŋ niŋ nya cho yɔmnde wou ni le kɔlaŋ a ndu. 5 La toosiaa yɔmnde hei a yɔm akeesiaa wo, nduyɛ mi la kumbu ndi a kooliiye. 6 La nɔ mi la kɛsi bandu luamaa lasalaa hoo, o kola bɛndu cho o kɔfu laSawaa+ ikɛiyo hɔlndɔ, o kumbu kɔfu koŋ ikɛi naa ya cho nya chɔɔmɔŋ nda.+

7 “Elɔŋ+ cho wa nyɛm chuŋ kɛndɔŋ lomɔɔ+ o bandu koŋ choo,+ te o wa pɛ lambuilaŋ mɛndullo+ idii o idii. 8 Nduyɛ te Elɔŋ wa pɛ lambuilaŋ mɛndullo a paale delaaleŋ, o nɔ mbo lom nyɛm chuŋ kɛndɔŋ. Nya ni, chuauwaa nyaa mamaa ni, la nɔ mi la wa nyɛm chuŋ kɛndɔŋ lomɔɔ ya Chɛhowa lachi teleŋ o teleŋ. 9 Nyɛm chuŋ kɛndɛŋ nya nɔ di le lomɔɔ lechoo le woŋ, la nɔ mi la lom muŋ te.+ La nɔ mi la soli sala luamaa ɔɔ sala ŋkullo lechoo le. Nduyɛ, la nɔ mi la soli sala mamuɛiyo lechoo le. 10 Elɔŋ nɔ mbo chua kooma chɔlu nda dii le sala malɔɔ hakioo+ waŋ ma tiŋ, mbo sui maŋ o leela bandu koŋ le ndu dindioo. O nɔ mbo wa hei tosaa le pilɛ o wɔsioo niŋ le ndu dindioo.+ Nya ni, chuauwaa nyaa mamaa ni, la nɔ mi la wa hei tosaa teleŋ o teleŋ. Bandu luamaa lasala hiou diondɔɔ kpou wo o cho le ya Chɛhowa ni.”

11 Okoŋ mi Chɛhowa dimul Muuse aa: 12 “Teleŋ o teleŋ nya wa pɛ puaa o Isɔluɛi niŋ chɔmndo,+ po kɛ kɛ nɔ mbo yɔŋgu nyɛ o ya Chɛhowa lo a teleŋ koŋ, le yoomu ndɔɔ baŋaa. Hei cho tosa kpundɛ kɛ kɛ tul nda choo, a teleŋ nda cho wa nda chɔmndo wo le. 13 Nyɛ wanaa nda cho chɔm nda kpou nɔ ma yɔŋgu wo cho hoo ni: siɛkɛlle tɛndaa tɛɛŋ,* a mɛɛ nda tuu siɛkɛlloŋ o fondaŋ diandaa yɛ.+ Siɛkɛlle i pilɛ, lusul ndɔɔ wa le kɛluaa woŋ 20.* Siɛkɛlle tɛndaa tɛɛŋ cho wa chuuŋgiaa le ya Chɛhowa ni.+ 14 Wana o wana nda poonyiaa pɛ diolaŋ chɔŋ wɔsilaŋ 20 kɔ kɛ, o nɔ mbo yɔŋgu chuuŋgiaa ndɔɔ o ya Chɛhowa lo.+ 15 Wana sulaa ni, wana bala fondo ni, wana o wana nɔ mbo yɔŋgu chuuŋgiaa o ya Chɛhowa lo siɛkɛlle tɛndaa tɛɛŋ, le yoomu ndɔɔ baŋaa. O nɔ mbo handu lechoo le, nduyɛ o nɔ mbo faŋa lechoo le. 16 Kanii humbuii Isɔluɛiya cho yɔŋgu le yoomula ndalaŋ baŋaa ve, bii nda ndi o ba, ma yɔŋgu ndi le wallo tosaa o tɛndii bɔŋaŋndo, le halikpeŋ mi ya Chɛhowa loonuŋ a Isɔluɛiya.”

17 Mi Chɛhowa dimul vɛlɛ Muuse aa: 18 “Toosiaa hɛŋgɛiyo le balaŋ a peloŋ pulɔɔ vɛlɛ a nyɛ nda kɛsi ndu lechoo wo a chiliŋii siaŋɛi,*+ ma kɛsi ndu tɛndii bɔŋaŋndo a bandu luamaa lasalaa tɛɛŋ. Okoŋ, ma wou mɛŋndaŋ leniŋ.+ 19 Loŋ Elɔŋ nda puaa nduaa cho wa balaŋ a peloŋ pulɔɔ ni.+ 20 Tuupa ma luɛi o tɛndii bɔŋaŋndo niŋ, ɔɔ ma sɔɔŋguu o bandu luamaa lasalaa ikɛi le salalaŋ lomɔɔ o ya Chɛhowa lo, a nɔ ma dindiŋ, yɔŋii nda sɔla piɔmndo. 21 A nɔ ma pulu balaŋ a peloŋ, yɔŋii nda sɔla piɔmndo. Sawaa hoo cho wa le Elɔŋ, chuauwaa nduaa, vɛlɛ a chuauwaa nduaa mamaa le fɛɛŋ a fɛɛŋ.”+

22 Mi Chɛhowa dimul vɛlɛ Muuse aa: 23 “Chua nyɛm chuŋ kɛndɛ kɛndɔŋ muŋ: Mɔɔ ŋkpuŋgbaa kiloo le ŋɔmpum, sinamɔŋ kiloo le yaa, kalamɔɔsi kiloo le yaa, 24 a kaasiaa kiloo le ŋɔmpum, a mɛɛ nda tuu siɛkɛlloŋ o fondaŋ diandaa yɛ,+ latulu a chuɛima ɔlifiiyaŋ hiŋndo cha.* 25 Okoŋ, ma muuliaŋ muŋ nyɛkɛndɛi,+ ma toosiaa chuɛima diandaŋ. Maŋ ma cho wa chuɛima diandaŋ ni le pɔyaa.

26 “A chuɛiyaŋ maŋ ŋ nɔ ni ma pɔya tɛndii bɔŋaŋndo,+ kɔfu laSawaa, 27 tibiiyo* a nyɛm ndɔŋ laandoŋ kpou, nyɛ kɛsiaa la lambuiyo a nyɛm ndɔŋ laandoŋ, bandu luamaa nyɛm chuŋ kɛndɔɔ, 28 bandu luamaa lasalaa a nyɛm ndɔŋ laandoŋ kpou, vɛlɛ a hɛŋgɛiyo a nyɛ nda kɛsi ndu lechoo wo. 29 A nɔ ma kɛsi nyɔɔŋ muŋ le wali nuu, kanifuule nyɛm hiou diondɔɔ kpou woŋ ŋ cho ni.+ Wana o wana pilaŋ nyɔɔŋ muŋ pɛ, o nɔ mbo wa o diandaa.+ 30 Pɔya Elɔŋ+ nda puaa nduaa,+ nduyɛ ma dindi nda, ma wa wanaa soliaa lasalaa le ya.+

31 “Dimul Isɔluɛiya aa: ‘Le fɛɛŋ a fɛɛŋ, chuɛima diandaŋ maŋ nya cho wa soliŋndo kpeku ni le wanaa cho wa walta nilaŋ tosaa wa pɔyaa.+ 32 Wana o wana nɔ mbo suiinuŋ chuɛiyaŋ maŋ te. Nduyɛ, nyɛm nya toosiaa chuɛiyaŋ maŋ ndoŋ, la toosiaa chuɛima cheleŋ a muŋ te. Kanifuule chuɛima diandaŋ ma cho ni, nduyɛ le teleŋ o teleŋ ma cho wa ma diandaa le nya. 33 Wana o wana toosiaa pɛ chuɛima waa lende ɔɔ mbo suu maŋ wana cheleŋ,* o nɔ mbo sɔla piɔmndo.’”+

34 Okoŋ, mi Chɛhowa dimul Muuse aa: “Chua nyɛm chuŋ kɛndɔŋ muŋ kpeŋkpeŋ.+ Muŋ cho ni: Sitati, ɔnicha, kabanɔm, a filaŋkiŋsɛŋ kɛndɛ kɛndɔɔ. 35 Okoŋ, ma toosiaa nyɛ chuŋ kɛndɔɔ.+ A nɔ ma muuliaŋ ndu nyɛ kɛndɛ kɛndɛi a hɛlle.+ A nɔ ma wou nyɛ cheleŋ te, nduyɛ ŋ nɔ miŋ wa ŋ diandaa. 36 A nɔ ma chuii ŋpum, ma chuchu kpeyaŋ koŋ o tiŋ kɔfu laSawaa lachi o tɛndii bɔŋaŋndo niŋ, naa ya cho chɔɔmɔŋ o nya lo wa. O nɔ mbo wa nyɛ hiou diondɔɔ kpou wo le nya. 37 La nɔ mi la soliŋ nyɔɔŋ muŋ kpeku le nyɛm chuŋ kɛndɔŋ toosiaa le nyapila le.+ Kanifuule, nyɛ cho o diandaa le ya Chɛhowa wo o cho ni. 38 Wana o wana toosiaa pɛ nyɛ waa lende mbo wa chuŋ ndɔɔ tueiyɔɔ yeela, o nɔ mbo sɔla piɔmndo.”