Chɔŋ Tasoo

2 Chuauwaa niaa kaalaa, I cho nya sɔɔŋ muŋ poonyiallo yɔŋii nya tosa hakioo. Kɛ o yɔŋ bɛɛ mi waŋndo tosa hakioo, ŋ nɔ wana suaa le naa o Finya naa lo wo. Ndu cho yɛ Chiisu Kiliti ni,+ wana cho sakpo wo.+ 2 Ndu soliŋ sala le naa baŋaa+ o hakila naalaŋ niŋ ni.+ O cho ko le naa le, kɛ le chieeŋndo kpou.+ 3 Te o yɔŋ pɛ miŋ hiou lachi a sawala ndɔlaŋ biyɔɔ, mɛɛ ŋ chɔm maa ŋ sina ndu. 4 Te waŋndo dimi pɛ aa, “I sina ndu,” kɛ mbo kɛɛ le sawala ndɔlaŋ biyɔɔ, mɛɛ wana lachoowaa o cho ni. Nduyɛ tonyaa cho wana koŋ o kɔl te. 5 Wana o wana tosa pɛ nyɛ diom ndɔɔ dimi wo, mɛɛ kaala wana koŋ nɔ le Mɛlɛka wo cho chɔmnɔŋ kpendekele.+ Hei tosa ni miŋ sina maa ŋ cho o diompilɔɔ niŋ a ndu.+ 6 Te waŋndo dimi pɛ maa o cho o diompilɔɔ niŋ a ndu, mɛɛ o nɔ kuee mbo kela maa Chiisu.+

7 Chaaŋaa niaa kaalaa, o cho a sawa sɛnɛi okɔɔ le ya cho nya poonyiallo le, kɛ a sawa paandu nya sɔla o kandɔŋndo pa wo okɔɔ.+ Sawa paandu koŋ cho yɛ yooŋgu nya tueiyo ni. 8 O baa pilɔɔ choo, sawa sɛnɛiyo ya cho nya poonyiallo ni. Ndu cho sawa Chiisu tol kɔɔli, nduyɛ mi nya bɛɛ wa ndu tolɔɔ kɔɔli wo ni. Kanifuule, nyumndaŋ ma cho niŋ chuwɔɔ, mi nyɛ teŋgaa kpeekpeiyo wa diondɔɔ.+

9 Te waŋndo dimi pɛ maa o cho o nyɛ teŋgaa niŋ, kɛ mbo tul puaapilɛnɔ ndɔɔ leyɛ,+ mɛɛ o cho wɔ o nyumndaŋ niŋ.+ 10 Te waŋndo kaala pɛ puaapilɛnɔ ndɔɔ, mɛɛ o cho o nyɛ teŋgaa niŋ.+ Nduyɛ nyɛ o nyɛ tosa mbo boŋ te. 11 Kɛ te waŋndo tul pɛ puaapilɛnɔ ndɔɔ leyɛ, mɛɛ o cho o nyumndaŋ niŋ,+ nduyɛ mbo wa kɔlaŋ o maŋ niŋ. O sina naa o cho kɔlaŋ nda le,+ kanifuule nyumndaŋ ma suumiaa ndu.

12 Chuauwaa niaa kaalaa, le mɛɛ nya sɔla malɔɔ hakioo le sabu diola ndɔlaŋ yɛ ya cho nya poonyiallo ni.+ 13 Nya finyaa, I cho nya poonyiallo le mɛɛ nya sina wana cho chɔŋ o kandɔŋndo wo yɛ. Nya chuaa piaanduaa, I cho nya poonyiallo le mɛɛ nya yem wana dɛnɛ wɔɔŋndo* yɛ.+ Nya chuaambuaa, I cho nya poonyiallo le mɛɛ nya sina Finya naa yɛ.+ 14 Nya finyaa, le mɛɛ nya sina wana cho chɔŋ o kandɔŋndo wo yɛ ya poonyial nya ni. Nya chuaa piaanduaa, le mɛɛ nya nɔ yoomuaŋ,+ mi diom Mɛlɛkaa wa nya o lakɔl,+ nduyɛ mi la yam wana dɛnɛ wɔɔŋndo yɛ ya poonyial nya ni.+

15 La kaala chieeŋndo ɔɔ nyɛm cho o chieeŋndo niŋ ndoŋ te.+ Wana o wana kaala pɛ chieeŋndo, mɛɛ kaala Finya naa cho ndu o kɔl te.+ 16 Kanifuule, nyɛ o nyɛ cho o chieeŋndo niŋ, chɔŋ a yeemaŋ ŋdialloŋ,+ hɔlte nyɛ kɛndɔɔ,+ kɔ bii a yoŋgaa kiolɔɔ a nyɛm waŋndo nɔ woŋ, o cho o Finya naa lo le ŋ fula le, kɛ o chieeŋndo niŋ ŋ fula ni. 17 Chieeŋndo cho hiouwɔɔ a yeemaŋ cho leniŋ ndoŋ.+ Kɛ wana o wana tosa pɛ hɛnaŋ Mɛlɛkaa, o cho wa yoomu lefafɛɛŋ.+

18 Chuauwaa niaa kaalaa, o teleŋ mɛɛlaa niŋ naŋ cho niŋ ni. La tuei maa wana simul Kiliti wo cho hunɔɔ.+ Mɛɛ naŋ suaa nuaa yɛ bɛɛ wanaa simul Kiliti wa, a bɔɔbɔɔ cho niŋ.+ Nduyɛ keŋ tosa ni miŋ sina maa o teleŋ mɛɛlaa niŋ naŋ cho ni. 19 Naa tɛɛŋ nda fula ni, kɛ a ve wanaa naa le.+ Kanifuule, te ndaa wa pɛ wanaa naa, a wa lo a naa latulu. Kɛ ma fulaŋ naa tɛɛŋ le chɔmndo maa a cho naa choo le.+ 20 Kɛ nya yɛ, wana diandaa pɔya nya.+ Nduyɛ nya kpou sina tonyaa. 21 I cho nya poonyiallo, o cho nuaa maa la sina tonyaa le le,+ kɛ le mɛɛ nya sina ndu yɛ. Nduyɛ, choola cho o tonyaa niŋ te.+

22 Nɛɛnɛ cho yɛ wana lachoowaa? Wana sɛɛŋgiaa maa o cho Chiisu le cho Kiliti le wo.+ Ndu simul Kiliti ni,+ nduyɛ ndu kɛɛ Finyaa a Po ndɔɔ ni. 23 Wana o wana kɛɛ pɛ Po Mɛlɛkaa, mɛɛ o cho o diompilɛ niŋ a Finya ndɔ le.+ Kɛ wana o wana chɛl pɛ Po Mɛlɛkaa,+ mɛɛ o cho o diompilɔɔ niŋ a Finya ndɔ.+ 24 Lelaŋ, sɔɔŋ nya tuei chɔŋ o kandɔŋndo woŋ, la kɛsiŋ muŋ o lakɔl.+ Te la kɛsiŋ pɛ sɔɔŋ nya tuei muŋ ndoŋ o lakɔl, la cho lo o diompilɔɔ niŋ a Po Mɛlɛkaa nda Finya ndɔ. 25 Nduyɛ, nyɛ o* chuel naa buŋgɛiyo cho yoomu fafɛɛŋndo ni.+

26 A wanaa cho kindiŋndo le nya huiyo wa okɔɔ ya poonyial nya sɔɔŋ muŋ ni. 27 Kɛ nya nya, pɔya Mɛlɛka pɔya nya wo+ cho wa nya choo. Wana cheleŋ yeemaŋ lɛ le nya pɛɛku le. Kɛ pɔya Mɛlɛka pɔya nya wo cho nya pɛɛkoo a sɔɔŋ kpou okɔɔ.+ Nduyɛ tonya sɔɔŋ muŋ cho ni, ŋ cho lachoo le. La lo o diompilɔɔ niŋ a ndu mɛɛ o pɛɛku nya yɛ.+ 28 Lelaŋ chuauwa niaa kaalaa, la lo o diompilɔɔ niŋ a ndu. Okoŋ te o huŋ chɔɔmuŋ pɛ, ŋ cho wa fɛɛsɛŋ le suɛi ndu o hɔl.+ Nduyɛ, ŋ tulnuŋ niŋ lasiɔmbu a boondii o cho wa nanuŋ nde le. 29 Te la sina pɛ maa wana sakpoo o cho ni, mɛɛ la sina pɛŋgu maa, wana o wana tosa pɛ nyɛ cho sakpo wo, Mɛlɛka cho finya ndɔ ni.+