Sɔɔŋ Chɔɔmaŋndoŋ
4 Okoŋ kɔɔli, mi cha dioo o kumbiaa o choo choo niŋ. Diom tase ya tuei suɛi naa ya chua wo wa maa bulu bɛndu. Mbo dimi aa: “Hel nanuŋ mi chɔm num sɔɔŋ nɔ le yɔŋnɔŋndo woŋ.” 2 O lepilɛ niŋ kpe, mi nyina Mɛlɛkaa tual la choo. Okoŋ mi cha kpeŋgbei* lemasaa o kɛsiaa o choo choo niŋ. Nduyɛ waŋndo wa ichali lechoo.+ 3 Wana wa ichali lechoo wo wa diondɔɔ maa pou chasipaa* wo,+ a pou sadiɔɔ* wo. Niŋginaŋgaa wa kpeŋgbei lemasaa o balaa silɔ maa pou ɛmiluaa* wo.+
4 Kpeŋgbeila lemasalaŋ 24 laa balu kpeŋgbei lemasaa hoo ni. Bɛnduaa 24 wa ichali+ o kpeŋgbeilaŋ ndaŋ choo ni, a doviaŋ o nyɛla humbulaŋ niŋ. Mɔsilta lemasala ŋkooliilaŋ la wa nda o lebol. 5 Mi cha nyɛ ŋualalɛiyo fulaa o kpeŋgbei lemasaa.+ Mi tuɛi diomndaŋ a taŋndaŋ deŋioo.+ Mi cha vɛlɛ lambuilaŋ la ŋɔmmɛu sandei o kpeŋgbei lemasaa lachi. Lambuila ŋɔmmɛulaŋ ndaŋ la sim le nyinaa ŋɔmmɛuwaa Mɛlɛkaa.+ 6 Mi cha vɛlɛ nyɔɔ o kpeŋgbei lemasaa lachi maa pee mɛŋma ihɛl.+ O wa ŋɛlɛŋgi ŋɛlɛŋgi maa tofaŋ.
Nyaa yoomaa a hiɔɔlu wa kpeŋgbei lemasaa tɛɛŋ,+ a wa a balaa silɔ. Lachi ni, amakɔɔ ni, ndaa nɔ hɔltaŋ la tiuwaa ba o ba fee. 7 Nyɛ yoomaa tasoo wa maa kpɔkuŋ.*+ O diiŋ ndɔɔ wa maa nau piaandu fɔŋndɔ.+ O yaa ndɔɔ+ ndoo nɔ hɔlla maa wanachiee. Nduyɛ o hiɔɔloo+ wa maa kowɛ.+ 8 Nyaa yoomaa hiɔɔluaa haa, o kɛ kɛ ndoo nɔ kumbaŋndaŋ la ŋɔmpum. Hɔltaŋ la wa nda la tiuwaa silɔ o kumbaŋndaŋ ndaŋ.+ Idii ni, ichɔl ni, a wa dimioo aa: “Wana diandaa, wana diandaa, wana diandaa Chɛhowa,*+ Mɛlɛka Kpaaya Kpou Kpou Wo cho ni. Ndu wa kani masindɛ ni, ndu cho pɛŋgoo hoo ni, ndu cho vɛlɛ hunɔɔ ni.”+
9 Teleŋ o teleŋ nyaa yoomaa haa saŋgala pɛ wana cho ichali o kpeŋgbei lemasaa choo, mbo wa yoomu le fɛɛŋ a fɛɛŋ ndo, ma ke ndu bɛɛleŋ, nduyɛ ma mel ndu balikaa,+ 10 bɛnduaa 24+ haa baŋ wulaŋ, a piɛi wana cho ichali o kpeŋgbei lemasaa choo, mbo wa yoomu le fɛɛŋ a fɛɛŋ ndo. Okoŋ a soli mɔsilta ndala lemasalaŋ, a kɛsi laŋ kpeŋgbei lemasaa lachi, a dimi aa: 11 “Chɛhowa* Mɛlɛka naa, a bɛnda ma sɔla biiloo,+ a bɛɛleŋ,+ a kpaayaa,+ kanifuule num toosiaa nyɔɔŋ kpou ni.+ O hɛnaŋ numndo niŋ ŋ toosiaŋ ni, nduyɛ miŋ wa.”