Nɔmbaa

23 Okoŋ, mi Belam dimul Belaki aa: “Taŋgul bandula luamaa lasalalaŋ la ŋɔmmɛu o fondaa hoo,+ nduyɛ ma diilul la nauwaa towaa a ŋɔmmɛu a saa a ŋɔmmɛu.” 2 O lepilɛ niŋ kpe, mi Belaki tosa mɛɛ Belam dimul ndu yɛ. Nduyɛ, mi Belaki nda Belam soli saa kondoo a nau towaa salaa o bandu luamaa lasala kɛ kɛ choo.+ 3 Okoŋ, mi Belam dimul Belaki aa: “Lo o sala luamaa numndo hoo ikɛi, mi kuɛ inɛ. Naapum, Chɛhowa cho isɔɔ o ya lo. Nduyɛ nyɛ o nyɛ o dimul la pɛ, I cho num dimul.” Le hei, mbo kua o pembei bolleŋ.

4 Okoŋ, mi Mɛlɛka suaa naa Belam chua.+ Mi Belam dimul ndu aa: “I toosiaa bandula luamaa lasalalaŋ la ŋɔmmɛu, nduyɛ mi soli saa kondoo a nau towaa salaa o bandu luamaa lasala kɛ kɛ choo.” 5 Mi Chɛhowa chɔm Belam nyɛ o nɔ mbo dimi wo.+ Mbo dimul ndu aa: “Miiŋgu o Belaki lo, ma dimul ndu nyɛ ya dimul numndo.” 6 Mbo miiŋgu naa Belaki chua. Nduyɛ, o komal ndu a waŋ banaa Mowaabi kpou isisi o sala ndɔ luamaa ikɛi. 7 Okoŋ, mi Belam kandu yooŋgu Mɛlɛkaa dimioo+ aa:

“I wa Aluam,+ mi Belaki, masaa le Mowaabi huŋ a ya nanuŋ.

I wa o pembuŋ bɛndoŋ ba paaleŋ le chaŋ ndo, mbo dimul la aa:

‘Huŋ ma hendul la Chekɔpu sendioo choo.

A yandii, huŋ ma tusil la ndu siɔmbulaŋ.’+

 8 Wanaa Mɛlɛka hendu sendi choo le wa, vɛɛ ya nɔla yɛ mi handu nda sendioo choo?

Nduyɛ, wanaa Chɛhowa tusi lasiɔmbu le wa, vɛɛ ya nɔla yɛ mi tusi nda siɔmbulaŋ?+

Waŋnda haa, nda kinɛi cho loŋ ni.+

Nduyɛ, a tuu ndapila a wanaa cheleŋnda le.+

10 O nɛɛnɛ nɔla yɛ mbo chɔm chuauwaa mamaa Chekɔpu wa,+ a cho haa tau tau maa chundu wa?

Ɔɔ o yɔŋ bɛɛ ma piɔu nda kundalaŋ sala hiɔɔlu, o nɛɛnɛ nɔla yɛ mbo chɔm kundaa o pilɛ?

Maa piɔm nuu wa maa piɔm wanaa sandaa.

Maa mɛɛlula nilaŋ la wa maa mɛɛlula ndalaŋ.”

11 Okoŋ, mi Belaki nyuna Belam aa: “Yɛɛnɛ ŋ tosallɛ ya hoo? I hiŋ a num le ma hendul la yaamɔɔwaa niaa sendioo choo. Kɛ a tosa keŋ te, ma duau nda sala.”+ 12 Mbo mulul ndu aa: “Nyɛ o nyɛ Chɛhowa dimul la, baa o cho ndu le ya nɔ mi dimi le?”+

13 Mi Belaki dimul ndu aa: “A yandii, huŋ miŋ kuɛ o fondaŋ cheleŋ, naa ŋ lo ma che nda wa. Nduyɛ, a tiŋ koni ŋ cho chɔ ni, kɛ a cho nda chɔ kpou le. A cho wa loŋ, ma hendul la nda sendioo choo.”+ 14 Le hei, mbo kua a ndu o yondoo Sofim, o fondaŋ ŋpemboo Pisika.+ Nduyɛ mbo taŋgul bandula luamaa lasalalaŋ la ŋɔmmɛu, okoŋ mbo soli saa kondoo a nau towaa salaa o bandu luamaa lasala kɛ kɛ choo.+ 15 Mi Belam dimul Belaki aa: “Lo o sala numndo hoo ikɛi, mi kɔ suukaŋ a Mɛlɛka.” 16 Mi Chɛhowa suaa naa Belam chua, mbo dimul ndu+ aa: “Miiŋgu o Belaki lo, nduyɛ ma dimul ndu nyɛ ya dimul numndo” 17 Mɛɛ o miiŋgu, mbo komal Belaki a waŋ banaa Mowaabi kpou chumndo o sala ndɔ luamaa ikɛi. Mi Belaki nyuna ndu aa: “Yɛɛnɛ Chɛhowa dimul lɛ num?” 18 Okoŋ, mi Belam kandu vɛlɛ yooŋgu Mɛlɛkaa dimioo+ aa:

“Chɔŋ ma yaŋ nilaŋ Belaki.

Yaŋ ya nilaŋ, num po Sipɔɔ wo.

Te o dimi pɛ isɔɔ, baa o tosa ndi le?

Te o mɛi pɛ lediom, baa o peelu leŋ te?+

21 O chɛl mi wana wuu kooŋ le Chekɔpu suɛi wɔɔŋnde tosallo le.

Nduyɛ, o chɛl mi kpundɛ kɛ kɛ komal Isɔluɛi le.

Chɛhowa Mɛlɛka ndɔɔ cho a nda latulu.+

Nda kpou cho ndu saŋgalaa kpeekpei maa masa nda.

22 Mɛlɛka soli nda o lɛŋnde Ichipi leŋ niŋ ni.+

O cho ko maa leela chiiyo le nda.+

A boondei hei, waŋnda dimi niŋ a Chekɔpu okɔɔ, koŋ cho ni Isɔluɛi aa:

‘La tofawɔ suɛi kɔndɔfilii bɛndu Mɛlɛka tosa ve!’

25 Okoŋ mi Belaki dimul Belam aa: “Te a chɛl le ma handu nda sendioo choo le, mɛɛ a nɔ ma dɔu nda sala kposoŋ te.” 26 Mi Belam dimul Belaki aa: “I dimul num maa, ‘Nyɛ o nyɛ Chɛhowa dimul la pɛ le tosaa, ndu ya tosa ni.’”+

27 Mi Belaki dimul Belam aa: “A yandii, huŋ mi kuɛ a num vɛlɛ o fondaŋ cheleŋ. Naapum Mɛlɛka tonyaa cho chɛlɔɔ ma handu ndu sendioo choo o fondaŋ koŋ le ya.”+ 28 Le hei, mi Belaki chua Belam mbo hel a ndu o Pembii Piɔɔ Ve choo, naa wana lo ma che Chɛsimɔŋ nda.*+ 29 Okoŋ, mi Belam dimul Belaki aa: “Taŋgul bandula luamaa lasalalaŋ la ŋɔmmɛu o fondaa hoo, nduyɛ ma diilul la nauwaa towaa a ŋɔmmɛu a saa konduaa a ŋɔmmɛu.”+ 30 Mi Belaki tosa mɛɛ Belam dimul ndu yɛ. Okoŋ, mbo soli saa kondoo a nau towaa salaa o bandu luamaa lasala kɛ kɛ choo.