Ikilisiaati

2 Okoŋ, mi dimi o kɔl niŋ aa: “I kindiŋ ndɔɔ le mi tuei yoomu nuu yeela,* mi che nyɛ cho wa fulamakɔɔlioo wo.” Kɛ koŋ bɛɛ mi cha maa nyɛ fondoo fuu.

 2 Mi dimi a mamɔɔ okɔɔ aa, “Seemaa koni hei cho ni!”

Nduyɛ te o hiŋ pɛ a yoomoo tueiyɔɔ yeela okɔɔ, “Tɔnɔ* yɛɛ kpeekpei wana sɔla yɛ leniŋ?”

3 Mi kɛɛsiaa o kɔl nuu niŋ le mi yɔŋguŋ o muɛiyaŋ kolɔɔ niŋ,+ le chɔɔ tɔnɔ wana sɔla o muɛiyaŋ niŋndo. Kɛ a koŋ kpou, I chɛl le mi taasi nuu hɛluŋ ya le. Mi luei vɛlɛ balaŋ o sɔɔŋ ŋdiɔmndoŋ niŋ, le sinaa nyɛ sɔvɛ wanachioo nɔ mbo tosa teleŋ biŋgi o nɔ le waa yoomu o chieeŋndo choo wo. 4 Mi tosa vɛlɛ walta bɛndulaŋ.+ Mi taŋgul chiɛilaŋ,+ nduyɛ mi tual kpelela makilepiilaŋ le yapila.+ 5 Mi tosa kpelela cheleŋ, nduyɛ mi tosa fondaŋnda wana kua pɛŋgioo laŋ, okoŋ mi tual yɔmii kuamɛi suu o suu leniŋ. 6 Mi tuau sooŋnda mamɛŋndaŋ le yɔmii ya tɔl hei ve pɔɔliaa, nduyɛ mi i wa puiyo tɛɛ tɛɛ. 7 Mi sɔla buɛiyaa piaanduaa a buɛiyaa laanduaa tau,+ nduyɛ mi buɛiya vialuŋ vɛlɛ o ya lo chiɛiniŋ. Mi sɔla vɛlɛ chɔluaa a hɔbɛi, nauwa a saa,+ mbo hiau wana o wana keeku ya lachi Chulusalɛm. 8 Mi sɔla vɛlɛ kaniŋ humboŋ a kooliiyoŋ tau,+ ŋ masaa waa a waŋnda o tandala yɛ yɛlaŋ niŋ wa ya yɔŋndo woŋ.+ Mi chuuŋgiaa vɛlɛ puaa a waŋ laanduaa soliaa ŋchonduaa le ma wa ya chondoŋ solullo, vɛlɛ a nyɛ nɛŋi wana pɔnɔɔ kɔllo tau wo, ndu cho yɛ wana lanɔɔ ni. A tonya, mi chua waŋ laanduaa tau. 9 Mi simnuŋ wana kpaaya bɛndu, mbo hiau wana o wana keeku ya lachi Chulusalɛm.+ Nduyɛ, I chɛl mi taasi nuu hɛluŋ ya le.

10 Mi tosa a sabu mi sɔla nyɛ o nyɛ yaa yeema.*+ Nduyɛ nyɛ o nyɛ ndoo nɛŋi ya kɔl, mi tosa ndu. Mi duaunuŋ nyaale le wali kala kala ya tosa wo kpou, nduyɛ fanda nuu wa hoo ni, le wali kala kala ya tosa wo kpou.+ 11 Kɛ mɛɛ ya yiyaŋ a walta ya tosa a bala nilaŋ ndaŋ kpou, vɛlɛ a walta kala kalala ya tiuba le tosaa laŋ,+ mi cha maa nyɛ fondoo fuu la cho ni, mɛɛ waŋndo wa nuaa hueiye nyaanɔŋndo kɔɔli yɛ.+ Nyɛ o nyɛ sɔvɛ* cho o chieeŋndo hoo choo le.+

12 Okoŋ mi handu kɔllo o taasioo choo, seemaa, a diɔmnde.+ (Yɛɛnɛ wana cheleŋ tiu yɛ ba mbo tosa te masaa faŋaŋ pɛ? Nyɛ tosaŋ niŋ ndo ndu bɛɛ cho miŋgi tosa ni.) 13 Mi saaluŋ maa taasioo bɛnda mbo hiau diɔmnde,+ mɛɛ nyɛ teŋgaa bɛnda mbo hiau nyumndaŋ yɛ.

14 Mi wana taasioo che sɔɔŋ kpendekele,*+ kɛ diɔmndo ndu, o nyumndaŋ niŋ o balu ni.+ Kɛ mi saaluŋ vɛlɛ maa, nda ŋiɔɔŋ kpou fulamakɔɔlila pilɛlaŋ kpe nda sɔla ni.”+ 15 Okoŋ mi dimi o kɔl niŋ aa: “Nyɛ yɔŋnuŋ diɔmndo wo koni yɔŋnuŋ ya vɛlɛ ni.”+ Mɛɛ tɔnɔ yɛɛ ya sɔla yɛ niko le taasi bɛndu ya sɔla hoo wo? Le hei, mi dimi o kɔl niŋ aa: “Hei bɛɛ, nyɛ fondoo fuu i cho ni.” 16 Wana taasioo ni, diɔmndo ni, o kɛ kɛ vi pɛ, waŋnda loonuŋ a nda okɔɔ le fɛɛŋ a fɛɛŋ te.+ Te teleŋ biŋgi hiou dɔɔ pɛ, wana o wana puɛɛnuŋ a nda okɔɔ. Vɛɛnɛ wana taasioo wu yɛ? Mɛɛ diɔmndo wu yɛ, lende koni ndu bɛɛ wu ni.+

17 Le hei, mi tul yoomoo leyɛ.+ Kanifuule nyɛ o nyɛ cho o chieeŋndo hoo choo, kɔl tambɛiyo o chuu ya ni. Nduyɛ nyɛ fondoo fuu o cho ni,+ mɛɛ waŋndo wa nuaa hueiye nyaanɔŋndo kɔɔli yɛ.+ 18 Wali kala kala ya tosa o chieeŋndo hoo choo kpou wo, mi tul ndu leyɛ.+ Kanifuule I cho wu mi mɛi nyɔɔŋ muŋ, le wana cheleŋ cho hunɔɔ ya kɔɔli wo.+ 19 Nduyɛ ko o wa niŋ wana taasi ɔɔ diɔm, nɛɛ sina yɛ?+ A koŋ kpou, nyɛm ya dɔu muŋ sɛmbɔɔ a taasioo mi sɔla muŋ o chieeŋndo hoo choo woŋ kpou, ndu o ba bɛŋgu ŋ cho hunɔɔ wa ni. Hei bɛɛ, nyɛ fondoo fuu i cho ni. 20 Le hei, mi tambu kɔllo tau le wali kala kala ya tosa o chieeŋndo choo wo kpou. 21 Kanifuule mi waŋndo soliŋ taasioo, kɔl kaloo, a sina ndɔ pɛŋgoo kpou kpeku le wali kala kalaa tosaa, kɛ paale wa niŋ mbo mel* wana cheleŋ tosa wali koŋ te wo.+ Hei bɛɛ nyɛ fondoo fuu, nduyɛ kpundɛ bɛndoo i cho ni.

22 Tɔnɔ yɛɛnɛ kpeekpei waŋndo sɔla yɛ o wali kala kala o tosa wo niŋ kpou, vɛlɛ a sɔɔŋ nyindu ndu* le wallo tosaa o chieeŋndo hoo choo wo?+ 23 Kanifuule teleŋ o wa yoomu wo kpou, nyɛ nɛiyaa a kɔl tambɛiyo walta o tosa laŋ la chuu ndu ni,+ nduyɛ ichɔl bɛɛ kɔl ndɔɔ pɛŋgi le.+ Hei bɛɛ, nyɛ fondoo fuu i cho ni.

24 Nyɛ bɛnda le wanachioo kinɛiyo cho ni, dioo, mbo kol, nduyɛ mbo de saŋga ndɔɔ tɔnɔ.+ Hei bɛɛ, mi saaluŋ maa ke fula Mɛlɛka tonyaa o ba wo o cho ni.+ 25 O nɛɛnɛ dia yɛ nyɛdiaa sɔviɔɔ nduyɛ mbo kol muɛima kɛndɛ kɛndiaŋ mbo hiau ya?+

26 Mi Mɛlɛka tonyaa ke wanaa nɛŋi ndu kɔllo wa taasioo a kɔl kaloo, nduyɛ mbo tosa ma naŋ kɔl.+ Kɛ wanaa dɛnɛ wɔɔŋnda nda, mbo tosa ma chuuŋgiaa nyɔɔŋ le mi wanaa nɛŋi ndu kɔllo wa sɔla tɔnɔɔ o muŋ niŋ.+ Hei bɛɛ nyɛ fondoo fuu i cho ni, mɛɛ waŋndo wa nuaa hueiye nyaanɔŋndo kɔɔli yɛ.