Lɛvitikɔɔ

20 Mi Chɛhowa suaa vɛlɛ o Muuse lo aa: 2 “Dimul Isɔluɛiya aa, ‘Wana o wana o Isɔluɛi niŋ, o wa Isɔluɛinɔ ɔɔ mialaa cho nya tɛɛŋ nda, o kɛ kɛ soli pɛ po ndɔɔ ɔɔ chua ndɔɔ sala o Molɛki lo, wana koŋ nɔ mbo sɔla piɔmndo.+ Wanaa cho o Isɔluɛi niŋnda nɔ ma vii vii wana koŋ a poutaŋ haaa mbo vi. 3 I cho dɔɔnɔŋ tumbe a ndu o kala kala, nduyɛ mi tosa mbo sɔla piɔmndo le mɛɛ o soli chuauwaa nduaa a tiŋ sala o Molɛki lo, mbo nɔɔliaa chiɛi ni diandaa+ a diola nila diandaa laŋ yɛ. 4 Te wana koŋ yɔŋgu pɛ chuauwaa nduaa o Molɛki lo, mi wanaa cho o Isɔluɛi niŋnda che ndu keŋ tosaa kɛ a tosa nyɛ o nyɛ le mbo sɔla piɔmndo le,+ 5 mɛɛ I cho tumbe dɔɔnɔŋ o kala kala a wana koŋ vɛlɛ a yuŋgu ndɔɔ.+ I cho tosa mi ndu a wana o wana tol ndu kɔɔli le kaa suundɛiyo tosaa a Molɛki sɔla piɔmndo.

6 “‘Te waŋndo muliŋ pɛ o wana ŋwaŋ vilɛiyo+ a o wana dimi sɔɔŋ waa lachioŋ ndo+ lo le mɛlɛkaa cheleŋnda sooluuwo,* I cho dɔɔnɔŋ tumbe o kala kala a wana koŋ, nduyɛ mi tosa mbo sɔla piɔmndo.+

7 “‘La nɔ mi la dindi nyapila, mi la simnuŋ a diandaa.+ Kanifuule, ya cho Chɛhowa Mɛlɛka nyaa ni. 8 La nɔ mi la bii sawala nilaŋ nduyɛ mi la tosa nyɛ la dimi wo.+ Ya cho Chɛhowa, wana cho nya dindioo wo ni.+

9 “‘Wana o wana yei* finya ndɔ ɔɔ kala ndɔ pɛ, o nɔ mbo sɔla piɔmndo.+ Le mɛɛ o yei finya ndɔ ɔɔ kala ndɔ yɛ, ndupila tɔɔyaŋ piɔm ndɔɔ cho choo ni.

10 “‘Te waŋndo suunda pɛ a lanɔ pilaa, nyɛ nda nɔ ma tosal ndu wo cho hoo ni: Po suunda koŋ a lanɔ pilaa wo nɔ mbo sɔla piɔmndo. Po suundɛi koŋ a chua suundɛi koŋ,+ nda ŋiɔɔŋ kpou a nɔ ma sɔla piɔmndo. 11 Te poo hini pɛ a lanɔɔ finya ndɔ, mɛɛ o tusi finya ndɔ siɔmbulaŋ.*+ Po koŋ ni, chua koŋ ni, nda ŋiɔɔŋ kpou a nɔ ma sɔla piɔmndo. Nduyɛ, ndapila tɔɔyaŋ piɔm ndaa cho choo ni. 12 Te poo hini pɛ a lanɔɔ po ndɔɔ, nda ŋiɔɔŋ kpou a nɔ ma sɔla piɔmndo. Suɛi nɔɔlɛi wɔɔŋ wɔɔŋnde cho keŋ ni, nduyɛ ndapila tɔɔyaŋ piɔm ndaa cho choo ni.+

13 “‘Te poo hini pɛ a chaaŋ ndɔ wana pɔnɔɔ, nda ŋiɔɔŋ kpou a tosa suɛi wɔɔŋ wɔɔŋnde.+ Nduyɛ, a nɔ ma sɔla piɔmndo. Ndapila tɔɔyaŋ piɔm ndaa cho choo ni.

14 “‘Te poo hini pɛ a wana lanɔɔ nduyɛ mbo hini vɛlɛ a chua koŋ kala ndɔ, suɛi nɔɔlɛi wɔɔŋ wɔɔŋnde*+ nda tosa keŋ ni. A nɔ ma lom+ po koŋ a waŋ laanduaa kaŋ, le halikpeŋ kaa nɔɔlɛi waa lende hiu lachi a nya waa tɛɛŋ te.

15 “‘Te poo hini pɛ a chɔloo, o nɔ mbo sɔla piɔmndo, nduyɛ mi la dii chɔlu koŋ.+ 16 Te wana lanɔɔ sɔɔŋguu pɛ mi chɔloo tosa hiniei a ndu,+ la nɔ mi la dii chua koŋ a chɔlu koŋ. Nda ŋiɔɔŋ kpou a nɔ ma sɔla piɔmndo. Ndapila tɔɔyaŋ piɔm ndaa cho choo ni.

17 “‘Te poo hini pɛ a yema ndɔ, o wa chua finya ndɔ wo ɔɔ chua kala ndɔ wo, mbo che chua koŋ tum fondo nduyɛ mi chuaa bɛɛ che ndu tum fondo, mɛɛ suɛi lasiɔmbuei nda tosa keŋ ni.+ A nɔ ma dii nda waŋnda Isɔluɛi o hɔl kpendekele. Po koŋ tusi yema ndɔ siɔmbulaŋ* ni. Lelaŋ, a nɔ ma tusi ndu nyɛpalaa choo.

18 “‘Te poo hini pɛ a wana lanɔ cho o teleŋ ndɔɔ niŋndo, po koŋ chɔm lebɛɛ le kooma chua koŋ te,+ nduyɛ chuaa bɛɛ chɔm lebɛɛ le kooma ndupilaŋ te. Nda ŋiɔɔŋ kpou nɔ ma sɔla piɔmndo.

19 “‘Te poo hini pɛ a bɛndoo ɔɔ pɔmbɔɔ kala ndɔ ɔɔ yemaa finya ndɔ, mɛɛ o tusi wanayɛi nduɛi siɔmbulaŋ.+ A nɔ ma tusi nda nyɛpalaa choo. 20 Te poo hini pɛ a lanɔɔ finya ndɔ pɔmbɔ ɔɔ lanɔɔ finya ndɔ bɛndu, mɛɛ o tusi finya ndɔ koŋ siɔmbulaŋ.*+ A nɔ ma tusi po koŋ a chua koŋ nyɛpalaa choo. A cho wu, nduyɛ a vilu niŋ ŋchuau le. 21 Te poo hini pɛ a lanɔɔ bɛ ndɔ ɔɔ lanɔɔ pɔmbɔ ndɔ, mɛɛ suɛi wɔɔŋ wɔɔŋnde+ nda tosa keŋ ni. O tusi bɛ ndɔ ɔɔ pɔmbɔ ndɔ siɔmbulaŋ.* A cho wu, nduyɛ a vilu niŋ ŋchuau le.

22 “‘La nɔ mi la bii sawala nilaŋ kpou+ nduyɛ mi la tosa nyɛ la dimi wo,+ le halikpeŋ lɛŋnde ya cho kɔlaŋ a nya le mi la chal leniŋ ndeŋ, I soli nya leniŋ te.+ 23 La nɔ mi la tol naamula kaala ya cho nya touwɔɔ lachi laŋ kɔɔli+ le. Kanifuule, sɔɔŋ wɔɔŋndoŋ muŋ kpou kaalaŋ ndaŋ la wa tosaa ni mi tul nda leyɛ.+ 24 Le sabu koŋ ya dimul nya ni aa: “I cho nya lɛŋnde ndaleŋ ke mi le simnuŋ nyɛ nya, nduyɛ mi la chal leniŋ. Lɛŋnde milikiiyaŋ* a liaaŋ+ ma cho taaliaa leniŋ ndeŋ. Ya cho Chɛhowa Mɛlɛka nyaa, o hɛli nya waŋnda tɛɛŋ+ le mi la wa teŋgeŋ ndo ni.” 25 La nɔ mi la sina yɛ yiɔɔ visiaa cho a diandaa wa tɛɛŋ a visiaa cho a diandaa le wa, nduyɛ mi la sina vɛlɛ yɛ yiɔɔ youwaa cho a diandaa wa tɛɛŋ a youwaa cho a diandaa+ le wa. La chɛl mi visiaa, youwa, ɔɔ nyɛ o nyɛ kua o demboo choo, a ya dimul nya maa a cho a nɔɔlɛi le nya wa tosa mi la simnuŋ a nɔɔlɛi le.+ 26 La nɔ mi la wa a diandaa ya o hɔl, kanifuule ya Chɛhowa, Mɛlɛka diandaa ya cho ni.+ I hɛli nya waŋnda tɛɛŋ le mi la simnuŋ wanaa ni.+

27 “‘Wana pɔnɔ ni, wana lanɔ ni, o kɛ kɛ simnuŋ pɛ wana ŋwaŋ vilɛiyo ɔɔ wana dimi sɔɔŋ waa lachioŋ ndo, wana koŋ nɔ mbo sɔla piɔmndo.+ A nɔ ma lo ndu vii viiyo a poutaŋ haaa mbo vi. Ndupila tɔɔyaŋ piɔm ndɔɔ cho choo ni.’”