Kɔliŋtiaŋ Tasoo

11 La tol tamasi nuu kɔɔli, mɛɛ ya bɛɛ cho tamasi Kiliti wo tolɔɔ kɔɔli yɛ.+

2 I chandu nya, kanifuule o nyɛ o nyɛ niŋ, la cho loonɔŋndo a ya. Nduyɛ la cho sɔɔŋ tosaa mɛɛ ya pɛɛku nya muŋ yɛ. 3 Kɛ I yeema mi la sina maa Kiliti cho wana pɔnɔɔ bolleŋ ni.+ Wana pɔnɔɔ cho wana lanɔɔ bolleŋ ni.+ Mɛlɛka cho Kiliti bolleŋ ni.+ 4 Wana pɔnɔɔ wa pɛ piɛileŋ ɔɔ suɛi Mɛlɛkɛi dimioo mbo kumbu bolleŋ, mɛɛ o tusi wana cho ndu bolleŋ ndo siɔmbulaŋ. 5 Kɛ te wana lanɔɔ wa pɛ piɛileŋ ɔɔ suɛi Mɛlɛkɛi dimioo+ mbo kumbu bolleŋ te, mɛɛ o tusi wana cho ndu bolleŋ ndo siɔmbulaŋ, kanifuule o cho wa nyɛpilɔɔ kpe a wana lanɔ sendi wo. 6 Te wana lanɔɔ kumbu bolleŋ te, mɛɛ o sendi. Kɛ te suɛi lasiɔmbuei i cho le mi wana lanɔɔ sendi ni, mɛɛ o kumbu bolleŋ.

7 Wana pɔnɔɔ nɔ mbo kumbu bolleŋ te, kanifuule o velaŋ Mɛlɛkaa niŋ o toosiaŋ ni,+ nduyɛ o ndu niŋ Mɛlɛka sɔla biiloo ni. Kɛ o wana lanɔɔ niŋ wana pɔnɔɔ sɔla biiloo ni. 8 O cho wana pɔnɔɔ le fula wana lanɔɔ o ŋdial te, kɛ wana lanɔɔ fula wana pɔnɔɔ o ŋdial ni.+ 9 I hiou kpou ve, o cho le wana lanɔɔ le Mɛlɛka toosiaa wana pɔnɔɔ le, kɛ le wana pɔnɔɔ o toosiaa wana lanɔɔ ni.+ 10 Le saboo hoo a le maalikɛiya, wana lanɔɔ nɔ mbo nɔ tamasioo o lebol, le chɔmndo maa o cho wana cho ndu bolleŋ ndo o ba bɛŋgu.+

11 O kunda Masanɔɔ niŋ, wana pɔnɔɔ hauba a wana lanɔɔ. Nduyɛ wana lanɔɔ bɛɛ hauba a wana pɔnɔɔ. 12 Mɛɛ wana lanɔɔ fula wana pɔnɔɔ o ŋdial lɛ,+ lende koni wana lanɔɔ bɛɛ velu wana pɔnɔɔ ni. Kɛ Mɛlɛka nyɛ o nyɛ fee fula o ba ni.+ 13 Nyapila kiolu wɔ yamɛi: Baa o bɛnda pa mi wana lanɔɔ wa piɛileŋ o Mɛlɛka lo o kumbu bolleŋ te? 14 Nyapila bɛɛ sina kpendekele maa i cho suɛi lasiɔmbu le mi wana pɔnɔɔ nɔ yiiŋii vilɛiye. 15 Kɛ te wana lanɔɔ nɔ pɛ yiiŋii vilɛiye, biiloo i wa le ndu ni, kanifuule Mɛlɛka ke ndu yiinde le ndu bolleŋ kumbɔɔ. 16 Wana o wana yeema pɛ mbo sɛɛŋgiaa hei le naamu cheleŋ tolɔɔ kɔɔli, mɛɛ o nɔ mbo sina maa, naa a kundala wanaa Mɛlɛkaa nɔ naamula cheleŋ te.

17 Sɔɔŋ ya cho niŋ muŋ hunɔɔ dimi woŋ, I cho nya chandɔɔ le muŋ te. Kanifuule te la chuuŋgiaŋ pɛ, o ve le dɛnɛ kɛndɛ le, kɛ le i wɔɔŋnde. 18 I tasei peŋ, I tuei maa te la chuuŋgiaŋ pɛ naapilɛ o kundaa niŋ, la piɔuviaŋ kundalaŋ yɛ yɛ. Nduyɛ I laalaŋ sɔɔŋ ya tueiyoŋ ŋ tiŋ. 19 Kɛ mɛɛ mi piɔuviaŋndaŋ la luɛi nya tɛɛŋ,+ le mi wanaa Mɛlɛka hini kɔl a nda wa chɔmnuŋ kpendekele.

20 Te la chuuŋgiaŋ pɛ naapilɛ, o kpeekpei niŋ, o cho le Nyɛdiaa Ichɔl Masanɔɔ dioo le.+ 21 Te teleŋndo fuuluu pɛ le ndu dioo, apum chii niŋ fɛlɛŋ o ndaa dio. Okoŋ mi haa lo a yiaaŋ, kɛ mi muɛiyaŋ ma bii apiliaa. 22 Baa la nɔ la chiɛi le nyɛdiaa dioo a kolɔɔ loŋ te? Baa kunda wanaa Mɛlɛkaa nya chua chɔdɔ ni, nduyɛ mi la tusi wanaa nɔ nyɛ o nyɛ le wa siɔmbulaŋ? Yɛɛnɛ ya nɔ yɛ mi dimul nya? Baa mi chandu nya? O hei niŋ ndu, I cho nya chandɔɔ le.

23 Mɛɛ Masanɔ naa pɛɛku ya yɛ, lende koni ya cho nya pɛɛkoo ni. O nyumma ndaa nɔ le Masanɔɔ Chiisu+ pisioo waŋ choo, mbo chua beediiyo.* 24 Mɛɛ o piɛi, mbo yimi yimi. Mbo dimi aa: “Hoo sim le dialuŋ nuŋ ni.+ Muŋ ya cho yɔŋgu le nya ni. La wa hei tosaa le loonɔŋndo a ya.”+ 25 Mɛɛ nda chii nyɛdiaa ichɔllo dio, mbo tosa vɛlɛ nyɛ pilɛ koŋ kpe a taalaa.+ Mbo dimi aa: “Taalaa hoo sim le kpema sɛnɛi+ yiinuŋ a kooma niaŋ ndo ni.+ Teleŋ o teleŋ nya wa kolɔɔ leniŋ pɛ, la tosa ndi le loonɔŋndo a ya.”+ 26 Haaa mi Masanɔɔ hiŋ, teleŋ o teleŋ nya de pɛ beediiyo hoo, nduyɛ mi la kol o taalaa hoo niŋ, mɛɛ hiouwɔɔ nya cho koŋ lachi a waŋnda dimullo a piɔm ndɔɔ okɔɔ ni.

27 Lelaŋ, wana o wana de pɛ beediiyo hoo ɔɔ mbo kol o taalaa hoo niŋ, kɛ mbo suliŋ kposoŋ te, mɛɛ wana koŋ tɛɛmbuu dialuŋ Masanɔɔ a kooma nduaŋ labɛɛ. 28 Wana o wana nɔ mbo yaasiaŋ fɛlɛŋ nyɛkɛndɛi,+ tuupa mbo de beediiyo hoo, nduyɛ mbo kol o taalaa hoo niŋ. 29 Te waŋndo de pɛ nduyɛ mbo kol, kɛ mbo kɛɛ le sinaa maa nyɔɔŋ muŋ sim le dialuŋ Masanɔɔ, mɛɛ o kilul ndupila yamɛi. 30 Le saboo hoo a bɔɔbɔɔ nya tɛɛŋ nɔ dialuŋ vilɛiyoŋ ni, ma wa a naalaŋ, nduyɛ mi apum sɔla piɔmndo.*+ 31 Kɛ te ŋ sina pɛ wanaa suu naŋ cho wa, ŋ kiluluŋ iyama le. 32 Te Chɛhowa* kilul naa pɛ yamɛi, silaa o cho naa koŋ ni,+ yɔŋii o kilul naa yamɛi a chieeŋndo latulu.+ 33 Lelaŋ puaapiliaa niaa, te la chuuŋgiaŋ pɛ le nyɛdiaa hoo dioo, la chumaŋ. 34 Wana o wana yiaaŋ ma wa pɛ nɛiyo, o dio fɛlɛŋ o ndu lo bɛɛ. O hei niŋ, te la chuuŋgiaŋ pɛ, o ve boondii nda kilul wana iyama le.+ Le sɔɔŋ ŋ pilɔŋ muŋ, te I hiŋ pɛ, I cho muŋ toosiaa.