Maatiu

21 Mɛɛ nda sɔɔŋguu Chulusalɛm ikɛi, ma huŋ Bɛfee chiee lekɔɔ o Pembii Ɔlifii Ve choo, mi Chiisu viam buɛiyaa nduaa a ŋiɔɔŋ.+ 2 Mbo dimul nda aa: “La kɔ o sɔndɔkɔlɔɔ hoo nya lachi. La cho sofɛlɔɔ komal o baa a chuale ndɔleŋ ndu ikɛi. La timbi nda mi la chuu ya nda. 3 Te wana nyuna nya pɛ, la dimul ndu aa, ‘Masanɔɔ hau ba a nda.’ Okoŋ o cho nya malɔɔ chɔ chɔ mi la hiŋ a nda.”

4 Hei yɔŋnuŋ le mi nyɛ wana ndoo suaa le Mɛlɛka wo dimi wo peeluŋ. Mbo dimi aa: 5 “La dimul chua laandoo Saayɔŋ aa: ‘Tofawɔ! Masa numndo cho hunɔɔ o numndo.+ O cho wana chaa ŋwaŋnda chiee biyɔɔ.+ O cho ichali o sofɛlɔɔ choo. O sofɛlɛ fɔŋndɔɔ choo o cho hunɔɔ ni.’”+

6 Mi buɛiyaa Chiisu wa kua, nduyɛ ma kɔ tosa mɛɛ o dimul nda yɛ.+ 7 Ma kua a sofɛlɔɔ vɛlɛ a chuale ndɔleŋ, nduyɛ ma pɛŋgɛliaa domala ndalaŋ nda o lakɔɔ. Okoŋ mbo chal nda o lakɔɔ.+ 8 Mi faŋga bɛndu wa ndu kɔɔli wo, a bɔɔbɔɔ soli domala ndalaŋ ma pɛŋgɛliaa o nɛi,+ nduyɛ mi apum wa lɛuwuŋ yɔmnde bɛɛsiaa ma yɛɛmbuu muŋ o nɛi. 9 Faŋga wa ndu kɔlaŋ lachi wo a wanaa wa ndu kɔɔli wa wa deŋioo choo choo aa: “Mɛlɛka, piŋi Po Deeve wo fɔ!+ Salaa cho le wana hiŋ hoo o diola Chɛhowa* laŋ niŋndo!+ Num cho hoo o choo choo niŋndo, piŋi ndu fɔ!”+

10 Mɛɛ Chiisu luɛi Chulusalɛm, mi chioo kpou hiiluŋ. Ma dimi aa: “O nɛɛnɛ cho yɛ hoo?” 11 Mi faŋgaa hiau lachi a dimioo aa: “Chiisu ni, wana suaa le Mɛlɛka wo,+ fulaa Naasaluɛi o Kalili niŋ!”

12 Mi Chiisu luɛi o chiɛi Mɛlɛkaa niŋ. Mbo tuau wanaa wa nyɔɔŋ pisioo wa, a wanaa wa nyɔɔŋ piindoo o chiɛi Mɛlɛkaa niŋnda. Okoŋ, mbo nyiinduu tibiila* wanaa wa kanioŋ* siŋgaa wa, a kpeŋgbeila* wanaa wa kaŋgbuaa pisioo wa.+ 13 Mbo dimul nda aa: “I cho i poonyiaa aa, ‘A veelu niŋ chiɛi nuu aa chiɛi lepiɛiyo,’+ kɛ mi nya siiŋguu ndu buulu viiya.”+ 14 Okoŋ kɔɔli, mi wanaa sumɛiya a namtaa huŋ naa Chiisu chua o chiɛi Mɛlɛkaa niŋ, nduyɛ mbo siŋgi nda.

15 Mɛɛ masaa wanaa soliaa lasalaa a wanaa pɛɛku waŋnda sawala Mɛlɛkalaŋ nda che walta kɔndɔfilta Chiisu tosa laŋ, nduyɛ mi chuaambuaa wa deŋioo o chiɛi Mɛlɛkaa niŋ aa, “Mɛlɛka, piŋi Po Deeve wo fɔ!”+ ma tuulu kɔl.+ 16 Okoŋ ma nyuna ndu aa: “A cho pa tueiyɔɔ nyɛ chuaambuaa haa cho dimioo wo?” Mi Chiisu dimul nda aa: “Ei. I cho tueiyɔɔ. Baa la nuewɔ o Yau Mɛlɛkaa niŋ maa ‘Mɛlɛka tosa niŋ mi chuaambuaa a chɛlɛkpiaa saŋgala ndu le’?”+ 17 Okoŋ mbo mɛi nda, mbo faŋaŋ Chulusalɛm mbo kuaŋnuŋ Bɛtani, mbo kɔ lɔl loŋ.+

18 Mɛɛ o wa miiŋgoo Chulusalɛm idiiyo puŋ, yiaaŋ ma wa ndu nɛiyo.+ 19 Mɛɛ o che yɔm mafikiiyo o nɛiyo daŋgala, mbo sei lebɛŋgu. Kɛ o chi komɔɔ lechoo le, mɛɛ pei.+ Okoŋ mbo dimul yɔmndo aa: “Num, fɛɛŋ bɛɛ a kum lɛ le.”+ O lepilɛ niŋ kpe mi yɔm mafikiiyo hoo vesa sɛɛŋ. 20 Mɛɛ buɛiyaa nduaa che hei, mi kɔndɔfillo bii nda, ma dimi aa: “Vɛɛ yɔm mafikiiyo hoo looku yɛ vesa o lepilɛ niŋ kpe?”+ 21 Mi Chiisu mulul nda aa: “A tonya mi dimul nya, te la nɔ pɛ laalaŋndo, nduyɛ mi kiisaŋ ve nya o lakɔl te, la nɔla mi la tosa nyɛ ya tosa a yɔm mafikiiyo hoo wo. Kɛ o fulawɔ okoŋ kɔɔli, la nɔla mi la dimul pembei hei aa, ‘Suŋguŋ ma kɔ del o pee mɛŋma ihɛllo niŋ,’ mi i yɔŋnuŋ.+ 22 Nduyɛ nyɛ o nyɛ nya nyuna pɛ o piɛileŋ niŋ a laalaŋndo, la cho sɔla.”+

23 Mɛɛ o luɛi o chiɛi Mɛlɛkaa niŋ, mi masaa wanaa soliaa lasalaa a laŋgbaa kalla huŋ naa o wa waŋnda pɛɛkoo wa. Ma nyuna ndu aa: “A kpaaya nɛɛnɛ ŋ cho yɛ sɔɔŋ muŋ tosaa? Nduyɛ nɛɛnɛ ke yɛ num kpaayaa hoo?”+ 24 Mi Chiisu mulul nda aa: “Ya bɛɛ I cho nya isɔɔ nyuna. Te la mulul la pɛ, mɛɛ ya bɛɛ I chɔm nya wana ke ya kpaayaa le sɔɔŋ muŋ tosaa wo. 25 Nɛɛnɛ ndoo vem yɛ Chɔŋ le waŋnda yiŋɔɔ? Mɛlɛka ɔɔ waŋnda chieeya?” Okoŋ ma kandu suukaŋndo ndapila tɛɛŋ aa: “Te ŋ dimi pɛ aa, ‘Mɛlɛka,’ o cho naa dimul aa, ‘Mɛɛ le yɛɛnɛ la laalaŋ a nyɛ o wa nya dimullo wo le?’+ 26 Kɛ te ŋ dimi pɛ aa, ‘Waŋnda chieeya,’ ŋ cho luɛiyɔɔ o kpundɔɔ niŋ, kanifuule waŋnda kpou a chua Chɔŋ maa wana ndoo suaa le Mɛlɛka wo o wa ni.” 27 Okoŋ, ma mulul Chiisu aa: “Ŋ sina le.” Mi Chiisu bɛɛ dimul nda aa: “Mɛɛ ya bɛɛ I cho nya chɔm wana ke ya kpaayaa le sɔɔŋ muŋ tosaa wo le.”

28 “Vɛɛ nya yiyaŋ yɛ? Finya pilɛ ndoo nɔ puaa nda ŋiɔɔŋ. Mbo kɔ dimul o tasoo aa, ‘Po nuu, kɔ tosa wallo hau o kpele makilepiiyo niŋ.’ 29 Mbo dimi aa: ‘I cho lakɔ le.’ Kɛ mɛɛ teleŋ tiŋ hiou, mbo siŋga kɔl ndɔɔ, okoŋ mbo kua. 30 Mbo kɔ dimul vɛlɛ po ndɔɔ o pilɔɔ nyɛ pilɛ koŋ kpe. Mi ndu dimi aa, ‘Awa Kɛkɛ, I cho lakɔ.’ Kɛ o kue le. 31 O puaa ŋiɔɔŋnda haa tɛɛŋ, o kuɛɛnɛ tosa yɛ hɛnaŋ finya ndɔ wo?” Ma muli aa: “Po tasoo.” Mi Chiisu dimul nda aa: “A tonya mi dimul nya, wanaa biyaa paawaa,* a waŋ laanduaa tiamaa cho nya luɛiyɔɔ tase o Masale Mɛlɛkaleŋ niŋ. 32 Kanifuule, mɛɛ Chɔŋ hiŋ mbo chɔm nya nɛi sakpoo,* la laalaŋ ndu le. Kɛ mi wanaa biyaa paawaa, a waŋ laanduaa tiamaa laalaŋ ndu.+ Mi che bɛɛ mi la cha sɔɔŋ muŋ, kɛ la siŋga kɔlta nyalaŋ mi la laalaŋ ndu le.

33 “La yaŋ vɛlɛ nilaŋ o tale cheleŋ. Po pilɛ ndoo nɔ lɛŋndeŋ, mbo tosa kpele makilepiiyo lechoo.+ Mbo duau ndu o kuŋgaa niŋ, okoŋ mbo tuau doolaa* le maŋ waayiaa leniŋ, nduyɛ mbo taŋgul bandu vilɛiyo.+ Okoŋ, mbo ke waŋnda kpele ndɔɔ le ma koma wa ndu hɔlteŋ, mbo kuaŋnuŋ o lɛŋnde cheleŋ niŋ pɔ.+ 34 Mɛɛ boondei fuuluu le tɔlɔɔ hoo kendioo, mbo viam buɛiyaa nduaa naa waŋnda haa chua le ma ke ndu kilepiiyaŋ ma nduaŋ. 35 Kɛ mɛɛ buɛiya haa kuɛ, mi waŋnda haa bii nda ma luaa o pilɛ, ma dii o pilɔɔ, nduyɛ ma vii vii o pilɔɔ a poutaŋ.+ 36 Mbo viam vɛlɛ buɛiyaa cheleŋ. Ndaa hiou kunda tase o vem ndo. Kɛ nda bɛɛ ma tosal nda nyɛ pilɛ koŋ kpe.+ 37 O mɛɛlulaŋ kpɔŋ, mbo viam po ndɔɔ o nda lo. Mbo dimi aa, ‘Po nuu ndu, a cho ndu bɛɛleŋ ke.’ 38 Mɛɛ waŋnda haa che po ndɔɔ, ma dimulaŋ aa, ‘Hoo cho hunɔɔ nyɛm kiɔɔŋ loo ni.+ La huŋ ŋ diinuŋ ndu mi nyɛm kɛŋ ndɔŋ lo le naa!’ 39 Okoŋ ma soli ndu o kpeloo niŋ ma dii ndu.+ 40 Lelaŋ, te wana kpeloo hiŋ pɛ, yɛɛ o cho yɛ tosa a wanaa kaŋ? 41 Ma mulul ndu aa: “Le mɛɛ nda cho wanaa dɛnɛ wɔɔŋ bɛndu yɛ, o cho nda diu diu kpou, okoŋ mbo chua kpele ndɔɔ, mbo ke wanaa cheleŋ le ma wa ndu hɔlteŋ, a tiuba ma wa ndu kilepiiyaŋ ma nduaŋ kioo a teleŋ kendiaa wo.”

42 Mi Chiisu dimul nda aa: “Baa la nue wɔ o Yau Mɛlɛkaa niŋ maa, ‘Pou wanaa taŋgulaa kɛɛ wo,+ ndu le simnuŋ pou kpeekpei saa taŋgullo wo le? O Chɛhowa* lo pou koŋ chɛŋ ni, nduyɛ hei cho bɔɔ suɛi kɔndɔfili bɛndu naa o hɔl.’+ 43 Lelaŋ mi dimul nya maa, Mɛlɛka cho nya Masaleŋ poonda o ba mbo ke wanaa cho hɛnaŋ ndɔɔ tosaa wa. 44 Wana o wana del o pouwo hoo choo pɛ, wana koŋ yomi yomi.+ Nduyɛ wana o wana pouwo hoo del choo pɛ, o pesi ndu wɔ wɔ.”+

45 Mɛɛ masaa wanaa soliaa lasalaa a Falisiiya tuei talelaŋ ndaŋ, ma sina maa a nda okɔɔ Chiisu wa suɛi ni.+ 46 Mi che bɛɛ ndaa yeema le ndu biyɔɔ, kɛ ma wo faŋgaa, kanifuule waŋnda haa ndaa chua ndu maa wana suaa le Mɛlɛka wo o cho ni.+