Polowaa
25 Talela Sɔlɔmɔŋ ndaŋ la cho vɛlɛ laŋ ni.+ Wanaa wa wallo Hɛsikaya,+ masaa le Chuda o ba bɛŋgu wa miŋgi laŋ poonyiaa ni.*
2 Mi Mɛlɛka sɔla bɛɛleŋ le mɛɛ o kɛsi sɔɔŋ viaŋnaŋndoŋ yɛ,+
Nduyɛ mi masaa waa sɔla bɛɛleŋ le mɛɛ nda yaasiaa sɔɔŋ nyɛkɛndɛi yɛ.
3 Mɛɛ choo choo cho filioŋ nduyɛ mi lɛŋndeŋ le wa le yiŋgilɛi yɛ,
Lende kɔl masaa kendu yaasiaa ni.
4 Faaŋiaa nɔɔ o kanii humbuei,
Okoŋ mi i simnɔŋ i diandaa fo.+
7 Kanifuule, o bɛnda mbo dimul num aa: “Huŋ nanuŋ,”
Mbo hiau siɔmbulaŋ num tusioo laŋgbaa kalla o hɔl.+
8 Wa chɔ chɔ le suɛi waŋndo chɔmndo o lemasa le.
Kanifuule te wana nya chiɛɛliaŋ ndo tusi num pɛ siɔmbulaŋ, yɛɛnɛ ŋ cho yɛ tosa?+
9 La toosiaŋ tɛɛŋ nya wana nya chiɛɛliaŋ ndo.+
Kɛ chɔɔmuu suɛi nda dimul num sɔɔsɔɔ ve le,*+
10 Le halikpeŋ wana cho num nilaŋ yaŋɔɔ wo tusi num siɔmbulaŋ te.
Nduyɛ, a nɔla lɛ ma kuuna suɛi wɔɔŋii ŋ dimi a waŋndo okɔɔ ve pɛŋgɛlaŋndo le.
11 Mɛɛ nda tuuliaa nuaa apuiyaŋ a kooliiye, o nyɛ nda toosiaa a kanii humbueiyo niŋ yɛ,
Lende koni suɛi dimioo a teleŋ i nɔ le dimiŋndo wo cho ni,+
12 Sila wana taasioo yɔŋgu wo cho ko wana yaŋ ndu nilaŋ ndo o lani,+
Mɛɛ nda toosiaa nuaa kelɛi laniei a kooliiye vɛlɛ a nyɛm kɛvɛlɛŋ nda toosiaa a koolii kɛndɛ kɛndɛiyo yɛ.
13 Mɛɛ mɔmndo tosa nuaa mi nyɔɔ wa o nyulu o paale kuauwaa leŋ choo yɛ,
Lende koni wana viamaa wana nɔla ma tiindaŋ ndo cho ni, le wanaa viam ndu wa.
Mbo tosa mi masanɔ ndɔɔ naŋ kɔl.+
14 Wana saŋgalaŋ hoo le waŋndo nyɔɔ kioo kɛ o yɔŋgu le wo,+
O cho ko mɛɛ piɔɔ hel nuaa mi hueiye hɔŋ o se le yɛ.
15 Te wana biunuŋ pɛ a nɔla ma tiu wana bɛndoo ba,
Nduyɛ diɔɔmule yeelɛi leŋ le nɔla mi le pɛl paa.+
16 Te a saaluŋ pɛ liaaŋ, dio maŋ tuuleŋ.
Kanifuule te a hiu maŋ dioo pɛ, a cho maŋ kuisi.+
17 Lambaŋ kɔlaŋ o wana nya chiɛɛliaŋ ndo lo chiɛiniŋ te,
Yɔŋii o saŋga a num mbo tul num leyɛ.
18 Wana timbul wana nda chiɛɛliaŋ ndo seile lakafaleŋ ndo,+
O cho ko maa nyɛm chɔuwoŋ, muɛi faŋnde, ɔɔ chiŋɔle sɛɛmbiaa leŋ.
19 Wana wana nɔla ma tiindaŋ te wo* tiindaŋndo a teleŋ kpundɔɔ,
O cho ko mɛɛ waŋndo wa nuaa kindi kindiŋndo le nyɛdiaa dioo a chiŋii yomɛiye ɔɔ kɔlaŋ o pelii namtɛi choo yɛ.
20 Wana kɔl tambɛiyo chondei solullo,+
O cho ko mɛɛ waŋndo soliŋ nuaa doma ihueiyo lekɔɔ a teleŋ ihueiyo yɛ,
Ɔɔ mɛɛ nda wou nuaa muɛima waalɛiyaŋ o sodɛiyo choo yɛ.
21 Te yiaaŋ ma wa pɛ yaamɔɔnɔ numndo* nɛiyo, ke ndu nyɛdiaa* mbo de.
Nduyɛ te kolɔɔ bii ndu pɛ, ke ndu mɛŋndaŋ mbo kol.+
23 Mi hueiyii chaŋ ba luaŋ ndo ve hiŋ a piɔɔ.
Nduyɛ, mi choŋgulaŋ la tosa mi waŋndo tuulu kɔl ŋama ŋama.+
24 O bɛnda mi wana waŋnuŋ o sɔŋgile cho o chiɛiyo choo leŋ,
Mbo hiau waa o chiɛi pilɔɔ niŋ a lanɔ lasɛɛŋgiaŋndo.+
25 Yooŋgu kɛndɛ fula o fondaŋ landaŋndo wo,+
O cho ko mɛɛ waŋndo* saŋga nuaa ma ke ndu mɛŋma nyuluaŋ yɛ.
26 Wana sakpo chɛl hoo mi wana dɛnɛ wɔɔŋndo hiŋ ndu hɔlla wo,
O cho ko maa mɛŋma lindɛi ɔɔ sooŋ mamɛŋ nda wou pɔsɔnioo wo.
27 O bɛnda mi wana hiu liaaŋ dioo le.+
Nduyɛ, o bɛnda vɛlɛ ma landuŋ kɔl le bɛɛleŋ nuuviaa le numpila le.+
28 Wana dou kɔl ndɔ tuuwo o mandaa bɛŋgu le wo,+
O cho ko mɛɛ chiee bɛndoo wa nuaa a kpakioo o piɔlɛi yɛ.