Luomaŋnda

1 Ya Pɔɔl, buɛi Chiisu Kiliti wo poonyiaa yauwo hoo ni. I sɔla veeloo le mi simnuŋ kiilanɔɔ, nduyɛ mi sɔla hɛlioo le yooŋgu kɛndɛ Mɛlɛkaa dimioo.+ 2 Sindɛ pa Mɛlɛka yɔŋgu yooŋgu kɛndɔɔ hoo ni o Yau ndɔɔ niŋ, sanaa a wanaa ndaa suaa le ndu wa. 3 A Po ndɔ fula o pulale Deeve leŋ choo wo okɔɔ yooŋgoo hoo cho ni.+ 4 Mi Mɛlɛka soliŋ nyina ndɔ diandaa kpeku le ndu miiŋgioo yoomu.+ Hoo chɔm ni maa Po Mɛlɛkaa+ o cho ni. Nduyɛ, ndu cho Masanɔ naa Chiisu Kiliti ni. 5 O ndu niŋ Mɛlɛka chɔm naa kɛndɛi nduɛi bɛnduei ni. Chiisu hɛli ya le mi simnuŋ kiilanɔɔ+ le waŋnda malaa o lelɛŋ o lelɛŋ niŋ+ ma dɔu laalaŋndo o ndu niŋ, ma diikuŋ ndu, nduyɛ ma ke diola ndɔlaŋ bɛɛleŋ. 6 Nya bɛɛ cho wanaa cho ŋChuu le wa tɛɛŋ, a sɔla veeloo le Chiisu Kiliti tolɔɔ kɔɔli wa. 7 Le wanaa Mɛlɛka kaala o Luom niŋ, ma sɔla veeloo le waa wanaa diandaa wa kpou yauwo hoo cho ni:

I cho piɛileŋ maa Mɛlɛka, o cho Finya naa wo, a Masanɔɔ Chiisu Kiliti tosal nya kɛndɛi ndɛi bɛnduei le mi la wa a kɔl nyulu fɔ!

8 I tasei, I mel Mɛlɛka nuu balikaa le nya kpou o Chiisu Kiliti niŋ, kanifuule wanaa bɔɔbɔɔ cho suɛi a laalaŋ nyaa okɔɔ ba o ba fee o chieeŋndo choo. 9 I cho wali Mɛlɛkaa tosaa a kɔl nuu kpou, mi wa yooŋgu kɛndɔɔ dimioo a Po ndɔɔ okɔɔ. Nduyɛ Mɛlɛka sina maa teleŋ o teleŋ I cho piɛileŋ le nya.+ 10 I cho piɛileŋ maa te fonda sɔlaŋ pɛ, nduyɛ mi Mɛlɛka chɛl, I cho hunɔɔ nya yilɔɔ. 11 Yeemɛi cho ya bɔɔ le nya chɔɔ, le mi mala nya o Mɛlɛka piɛiyo niŋ, mi laalaŋ nyaa kendu poŋ. 12 Te o cho yɛ koŋ te, mi naa kpou dɛɛniaŋ kɔltaŋ vellaa velle+ a laalaŋ naŋ nɔ wo.

13 Puaapiliaa, I yeema mi la sina maa teleŋnda bɔɔbɔɔ, mi yaa yeema hunɔɔ naa nya chua, kɛ I sɔla ba le. Yaa yeema mi che fulamakɔɔlila kɛndɛlaŋ le yooŋgu kɛndɛ naŋ dimi loŋ ndo, a mɛɛ i cho yɔŋnɔŋndo o fondaŋnda cheleŋ yɛ. 14 Kilikiiya, wanaa lekaawa, wanaa sinaa dɛniaa, a wanaa sina dɛnɛ le wa kpou, kuee ndaa cho ya choo. 15 Lelaŋ, yeemɛi cho ya tau le nya cho o Luom niŋnda yooŋgu kɛndɔɔ dimullo.+ 16 Siɔmbula cho ya le yooŋgu kɛndɔɔ dimioo le,+ kanifuule nɛi Mɛlɛka soliŋ kpaaya ndɔɔ kpeku le wanaa chɔm laalaŋndo wa piŋioo wo o cho ni.+ Chuuwa fɛlɛŋ tuei ndu.+ Okoŋ kɔɔli, mi Kilikiiya bɛɛ tuɛi.+ 17 Mɛlɛka chɔm sakpoyɛi nduɛi o wanaa chɔm laalaŋndo wa lo.+ Nduyɛ mi hei kindi laalaŋ ndaa. A mɛɛ Yau Mɛlɛkaa dimi yɛ aa: “Wana cho sakpo wo cho wa yoomu le laalaŋ ndɔɔ.”+

18 Mɛlɛka chɔm maa o dɔɔnuŋ tumbe+ o choo choo niŋ le dɛnɛ wɔɔŋ kɛ kɛ waŋnda chieeya cho tosaa. A veŋ tonyaa kpiŋ+ yɔŋii waŋnda sina ndu. 19 Mɛlɛka chɔm niŋ nda kpendekele nyɛ nda nɔ ma sina a ndu okɔɔ wo.+ 20 Te ŋ pɛɛku pɛ a mɛɛ o toosiaa chieeŋndo yɛ, ŋ nɔla miŋ bii suliŋnda ndɔla naŋ chi le laŋ bila. Nduyɛ te ŋ mɛɛndaŋ pɛ nyɛm Mɛlɛka toosiaa woŋ,+ ŋ nɔla miŋ sina mɛɛ o cho yɛ. Nyɔɔŋ muŋ chɔm maa kpaaya ndɔɔ cho le fɛɛŋ a fɛɛŋ+ nduyɛ maa Mɛlɛka o cho ni.+ Lelaŋ, a nɔ nɛi o nɛi nda yɔŋgu lakafɛi le. 21 Mi che bɛɛ waŋnda haa ndaa sina Mɛlɛka, kɛ a ke ndu lebɛɛ maa Mɛlɛka nda le, nduyɛ a mel ndu balika le. Ma simnuŋ diɔmnda o yiyaŋnda ndalaŋ niŋ, nduyɛ mi kɔlta ndalaŋ la suma.+ 22 Mi che bɛɛ mi wanaa waa nuaa chɔm maa a cho wanaa taasi, kɛ diɔmnda nda cho ni. 23 Yɔŋii nda saŋgala Mɛlɛka vi le wo, ma muliŋ ma tuuliaa waŋnda chieeyaa wu wa, a youwa, a visiaa peluŋ hiɔɔluaa, a nyaa yoomaa kua o demboo choo wa le nda sooluuwo.+

24 Lelaŋ, mi Mɛlɛka mal nda le ma tosa yeemɛi nɔɔlɛi cho o kɔlta ndalaŋ niŋnde, ma wa vɛlɛ sɔɔŋ lasiɔmboŋ tosaa a dialuŋ ndaŋ. 25 Ma siŋga tonya cho a Mɛlɛka okɔɔ wo a choolaŋ. A kɛɛ Mɛlɛka piɛiyo, ma muliŋ nyɛm o toosiaa woŋ sooluuwo. Nduyɛ, ndu nɔ dioo ni le mbo sɔla saŋgalaa lefafɛɛŋ. Amiina.* 26 Le saboo hoo Mɛlɛka mal nda ni mi yeemɛi le hiniei tosaa hiau nda o kɔl kɔɔli.+ Waŋ laanduaa mal waa a waŋ piaanduaa a mɛɛ Mɛlɛka kɛɛsiaa yɛ, ma wa dialuŋ ndaŋ soliŋndo kpeku o nɛi cheleŋndo choo.+ 27 Nduyɛ waŋ piaanduaa bɛɛ mal waa a waŋ laanduaa a mɛɛ Mɛlɛka kɛɛsiaa yɛ, ma tual yeemaŋ nɔɔlɛiyoŋ kɔɔli le waa a chaaŋaa ndaa waŋ piaanduaa,+ ma wa sɔɔŋ lasiɔmboŋ tosalaŋndo vellaa velle. Kɛ a cho hunɔɔ fandaa sɔla le sɔɔŋ wɔɔŋ nda cho muŋ tosaa woŋ.+

28 Le mɛɛ nda chi ndi suɛi sɔvɛ le Mɛlɛka sinaa le yɛ, mi Mɛlɛka mal nda ma wa hiouwɔɔ lachi a yiyaŋnda ndala nɔɔlɛilaŋ tolɔɔ kɔɔli. Nduyɛ, ma wa sɔɔŋ nda nɔ le tosa le woŋ tosaa.+ 29 Sɔɔŋ wɔɔŋndoŋ koni cho wanaa waa nuaa o lakɔl ni.+ Sɔɔŋ muŋ cho ni, dɛnɛ wɔɔŋndo, hɔlteŋ,+ kɔl vesɛiyo, paŋalaa,+ diyɔɔ,+ sɔŋgɔlaŋ, choolaŋ,+ nɔŋnaŋndo o lakɔl,+ choŋgulaŋ, 30 waŋnda tɔɔ tɛɛmbuuwo,+ Mɛlɛka yɛleŋ tullo, yioulaŋ, yoŋgaa, hɔlaa heelaa, nɛilaŋ nuuviaa le sɔɔŋ wɔɔŋndoŋ tosaa, wanaa velu nda wa kiɔɔ diikɔŋndo,+ 31 sinapɛŋgoo kiɔɔ chɔmndo,+ kiɔɔ loo o lediom, kaalaa kiɔɔ chɔmndo, a nyiɛɛye kiɔɔ chɔmndo. 32 Waŋnda haa sina walaŋ nyɛ Mɛlɛka dimi wo maa, wanaa cho sɔɔŋ muŋ tosaa wa nɔ ma sɔla piɔmndo.+ A cho ko hiouwɔɔ lachi a sɔɔŋ muŋ tosaa le, kɛ ma sim vɛlɛ wanaa cho muŋ tosaa wa kɔɔli.