Luomaŋnda
11 I nyuna wɔɔ nya. Baa kiɔɔ Mɛlɛka kɛɛ wanaa nduaa ni?+ Sako bɛɛ! Ya bɛɛ Isɔluɛinɔɔ ya cho ni, chua mama Ebilaham ndo,* fulaa o yuŋgu Bɛŋjamiŋ ndo niŋ. 2 Mɛlɛka kɛɛ wanaa nduaa tasiaa o hɛli wa le.+ La sina nyɛ Yau Mɛlɛkaa dimi a Ilaicha okɔɔ wo le? Mbo ŋɔɔchiaŋ o Mɛlɛka lo a Isɔluɛiya okɔɔ aa: 3 “Chɛhowa,* a diu wanaa suaa le numnda, nduyɛ ma pesi pesi bandula numnda luamaa lasalalaŋ. Ya pilɛ kpe lo niŋ ni. Ya bɛɛ a cho ya kɔɔli le ya diyɔɔ.”+ 4 Kɛ vɛɛ Mɛlɛka mulul lɛ ndu? “I nɔ puaa 7,000, a beŋ lawu le Baal sooluuwo le wa.”+ 5 Lende koni i cho suŋ suŋ ni. Wanaa Mɛlɛka hɛli mbo tosal nda kɛndɛi nduɛi bɛnduei ya, a tiŋ lo wɔ.+ 6 Lelaŋ, te o yɔŋ pɛ maa le kɛndɛi bɛnduii Mɛlɛkɛi ni,+ mɛɛ o cho wali le naŋ tosa le naa hɛlioo le.+ Kɛ te o yɔŋ pɛ maa wallo naŋ tosa ni le naa hɛlioo, mɛɛ kɛndɛi nduɛi bɛnduei ve lɛ ikɛndɛ le.
7 Yɛɛnɛ naŋ nɔ yɛ niko miŋ dimi? Waŋnda Isɔluɛi sɔla nyɛ kpeekpei ndaa yeema wo le. Kɛ mi wanaa sɔla hɛlioo wa sɔla ndu.+ Mi a tuaa kɛɛ le nilaŋ yaŋɔɔ.+ 8 A mɛɛ Yau Mɛlɛkaa dimi yɛ aa: “Haaa a paale hauleŋ ndeŋ, Mɛlɛka tosa ma hiaunuŋ o luaŋ yikpi+ yɔŋii nda chɔ a hɔlta ndalaŋ, nduyɛ ma tuei a nila ndalaŋ.”+ 9 Mi Deeve bɛɛ dimi aa: “Maa nyɛdiaa o tibii* ndaa choo simnuŋ yaŋɔɔleŋ le nda a nyɛ tosa ma del lo. Maa nyɛpalaa tol nda choo fɔ. 10 Maa hɔlta ndalaŋ la yɔŋnuŋ yifidii, le halikpeŋ a chi lɛ le. Maa tosa mi kɔɔlaŋ la wa nda la tundaŋ lɔɔlɔɔ.”+
11 Lelaŋ I cho nyuna. Mɛɛ Isɔluɛiya boŋ ma del lɛ, baa a nɔla lɛ ma chɛŋ te? Sako bɛɛ! Kɛ mɛɛ nda tɛɛmbuu sawaa, mi wanaa cho ŋChuu le wa sɔla pioŋɔɔ. Le hei, mi Chuuwa paŋala nda.+ 12 Sawa nda tɛɛmbuuwo chuu chieeŋndo tɔnɔlaŋ. Nduyɛ le mɛɛ nda dɔɔnaŋ yɛ, mi wanaa cho ŋChuu le wa bɛɛ sɔla tɔnɔlaŋ.+ Mɛɛ te a huŋ chiŋa pɛ mɛɛ nda nɔ le waa yɛ, lende tɔnɔlaŋ la hiau niŋ wa.
13 O nya wanaa cho ŋChuu le wa lo ya cho niŋ suɛi ni. Le mɛɛ ya cho kiilanɔɔ le wanaa cho ŋChuu le wa yɛ,+ I che bɔɔ wali nuu nyɛ sɔvɛ.+ 14 I cho tosa mi wanaa niaa paŋala nya, nduyɛ mi piŋi apum nda tɛɛŋ. 15 Kpeeŋa Mɛlɛka kpeeŋa nda wo+ tosa ni mi waŋnda apum o chieeŋndo niŋ miiŋgu o diompilɔɔ niŋ a Mɛlɛka. Te o chɛl nda pɛ, mɛɛ o chɔm maa mi ndaa wu, kɛ mbo miŋgi nda yoomu. 16 Te buŋgɛi beediiyo* wa pɛ i diandaa, mɛɛ beediiyo o tɔɔ kpou bɛɛ cho o diandaa. Nduyɛ te puunduleŋ le wa pɛ le diandaa, mɛɛ lɛuwoŋ bɛɛ cho ŋ diandaa.
17 Mi che bɛɛ yɔm ɔlifii yondoo nya cho ni, kɛ mɛɛ nda kelu lɛuwoŋ ŋpum o yɔm ɔlifiiyo, ma hol nya o fondaŋ lɛuwuŋ nda kelu muŋ ndoŋ. Okoŋ mi la biilaŋ, mi nya bɛɛ wa tɔnɔɔ sɔlaa o puunduŋ yɔm ɔlifii nda tɔl lo. 18 La pɛɛluŋ lɛuwuŋ nda kili woŋ o hɔl te. Te la pɛɛluŋ muŋ o hɔl pɛ,+ mɛɛ la loonuŋ maa o cho nya le saa puundoŋ te, kɛ puundoŋ saa nya ni. 19 Mi nya pumnda dimi dɔɔ aa: “Lɛuwuŋ cheleŋ nda kelu ni, okoŋ ma hol naa o fondaŋ lɛuwuŋ nda kelu muŋ ndoŋ, miŋ biilaŋ.”+ 20 Tonya i cho ni. Le mɛɛ nda nɔ laalaŋ te yɛ nda kelu nda ni,+ mi nya miiŋgu o fonda ndaa le laalaŋ nyaa.+ Lelaŋ, la pɛɛluŋ te. Kɛ, la wa wanaa nɔ siooŋnde wa. 21 Te Mɛlɛka kelu pɛ lɛuwuŋ kpeekpei wa o yɔmndo woŋ, baa nya o kɛɛ kiolɔɔ ni? 22 La sina pɛŋgu maa Mɛlɛka cho wana kɛndɛ,+ kɛ mbo saaŋgiaa vɛlɛ waŋndo. Wanaa del le mɛɛ nda nɔ laalaŋ te wa yɛ,+ mbo saaŋgiaa nda. Kɛ te la lo pɛ o ba ndɔɔ bɛŋgu, o cho wa wana kɛndɛ naa nya chua. Te o cho koŋ te, nya bɛɛ Mɛlɛka cho nya kiolɔɔ o yɔmndo. 23 Te wanaa kaŋ lo o nila kalula ndalaŋ niŋ te, a nɔla vɛlɛ ma sɔla holɔɔ,+ kanifuule Mɛlɛka nɔla mbo miŋgi nda holɔɔ. 24 Te la sɔla pɛ kiolɔɔ o yɔm ɔlifii yondoo, okoŋ ma hol nya o yɔm ɔlifii tualaa, baa o cho pa i kala le mi Mɛlɛka miŋgi lɛuwuŋ kpeekpei sɔla kiolɔɔ woŋ holɔɔ o yɔm ɔlifii nda kelu muŋ ndo?
25 Puaapiliaa niaa, I yeema nya mi la sina suɛi viaŋnaŋnde hei,+ yɔŋii nya heeluŋ mi la yiyaŋ maa la cho wanaa taasi bɛndu: Mi Isɔluɛiya apum lo nilakalulaŋ tosaa haaa mi wanaa cho ŋChuu le wa miiŋgu Mɛlɛka o ibuŋ. 26 O hei niŋ, Isɔluɛi kpou+ cho hunɔɔ pioŋɔɔ sɔla. A mɛɛ Yau Mɛlɛkaa dimi yɛ aa: “Saayɔŋ wana baŋaa cho fula ni,+ nduyɛ o cho hunɔɔ dɛnɛ wɔɔŋ kɛ kɛ faŋa o pulale Chekɔpu leŋ choo. 27 Nduyɛ te I mal nda pɛ haki le yɔŋnda ndala wɔɔŋndaŋ,+ I cho kpemaa yii a nda.”+ 28 Tonya, yaamɔɔwa nda cho le yooŋgu kɛndɔɔ ni, nduyɛ hei chuu nya niŋ tɔnɔɔ. Kɛ mi Mɛlɛka hɛli nda, nduyɛ mbo kaala nda le mɛɛ o mɛi lediom a finyaa ndaa mamaa yɛ.+ 29 Mɛlɛka tembu kɔl le nyɛm o ke wana woŋ te. Nduyɛ o tembu kɔl le wanaa o hɛli wa le. 30 Nya bɛɛ la ve paandu wanaa ndaa tuei Mɛlɛka diom te,+ kɛ mbo tuiinuŋ nya inyiɛɛ+ le mɛɛ Chuuwa kɛɛ ndu diikɔŋndo yɛ.+ 31 Suŋ suŋ niŋ, nda cho wanaa kɛɛ ndu diikɔŋndo wa ni, nduyɛ mi Mɛlɛka tuiinuŋ nya inyiɛɛ. Kɛ nda bɛɛ mi Mɛlɛka tuiinuŋ nda inyiɛɛ maa nya. 32 Mɛlɛka siiŋguu nda kpou chiaa le kiɔɔ diikɔŋndo+ le mbo tuiinuŋ nda kpou inyiɛɛ.+
33 Tɔɔmayɛi Mɛlɛkɛi, taasi ndɔɔ, a kɔl kalu ndɔɔ cho bɔɔ o bɛndu! Wana o wana sɔla sina pɛŋgoo a mɛɛ o tosa sɔɔŋ yɛ le, nduyɛ wana o wana nɔla mbo sina sabu o tosa muŋ lende wo le. 34 “O nɛɛnɛ tiu yɛ ba mbo sina yiyaŋ Chɛhowa* wo? Nduyɛ nɛɛnɛ nɔla yɛ mbo sila ndu?”+ 35 Ɔɔ, “o nɛɛnɛ fɛlɛŋ ke yɛ Mɛlɛka nyɛ, le halikpeŋ mbo miŋgi ndu o ba?”+ 36 Kanifuule, ndu toosiaa nyɛ o nyɛ ni, ndu nɔ nyɛ o nyɛ ni, nduyɛ ndu ke naa nyɛ o nyɛ fee ni. Saŋgalaa cho le ndu le fɛɛŋ a fɛɛŋ. Amiina.*