Walta Kiilaa
1 Oo Tioofilɔɔ, o yau tase ya poonyiaa wo niŋ, mi poonyiaa a sɔɔŋ Chiisu kandu tosaa a waŋnda pɛɛkoo woŋ kpou okɔɔ,+ 2 haaa a paale Mɛlɛka heelu ndu choo choo leŋ.+ O chii fɛlɛŋ kiilaa o hɛli wa silalaŋ ke sanaa a mala nyina diandaa, tuupa mi Mɛlɛka heelu ndu choo choo.+ 3 Mɛɛ o sɔla saŋgaa, mbo fula buɛiyaa nduaa o hɔl teleŋnda bɔɔbɔɔ le ma sina kɛsɛ maa o cho yoomu.+ Le palɛi 40, o wa nda fulaa o hɔl, mbo wa suɛi a Masale Mɛlɛkaleŋ okɔɔ.+ 4 Mɛɛ o wa a nda latulu, mbo dimul nda aa: “La faŋaŋ Chulusalɛm te.+ Kɛ la hiou lachi a chumndo le nyɛ Finyaa mɛi lediom,+ mi dimul nya a ndu okɔɔ wo. 5 Chɔŋ ndu, o mɛŋndaŋ niŋ o yiŋ waŋnda ni. Kɛ nya la cho yiŋɔɔ sɔla a nyina diandaa+ o palɛi biŋgi bɛŋgu.”
6 Mɛɛ nda chuuŋgiaŋ naapilɛ, mi buɛiyaa nduaa nyuna ndu aa: “Masanɔɔ, baa suŋ suŋ ŋ cho masaleŋ miŋgi Isɔluɛi ni?”+ 7 Mbo mulul nda aa: “La nɔ mi la sina teleŋnda laŋ ɔɔ boonduŋ muŋ te, kanifuule Finya nuu ndupilɛ kpe nɔ dioo* ni le sɔɔŋ waa nuaa kɛɛsiaa.+ 8 Kɛ la cho kpaayaa sɔla te nyina diandaa tol nya pɛ choo.+ Nduyɛ la cho seileŋ timbi a ya okɔɔ+ o Chulusalɛm niŋ,+ Chudiaa a Sameeliaa,+ a ba o ba fee o lɛŋndeŋ choo.”+ 9 Mɛɛ o chii sɔɔŋ muŋ dimi, buɛiyaa nduaa lo ndu tofaa mi Mɛlɛka heelu ndu o choo choo niŋ. Okoŋ mi yumbu yumboo kumbu ndu kpu, a chi lɛ ndu le.+ 10 Mɛɛ o wa helɔɔ, ma sim tofaa o halaa niŋ. O lepilɛ niŋ kpe, mi puaa a ŋiɔɔŋ huŋ sim nda ikɛi o nyɛla humbulaŋ niŋ.+ 11 Ma nyuna nda aa: “Nya puaa Kalili, le yɛɛnɛ nya sim yɛ tofaa o choo choo niŋ? Mɛɛ nya che mi Mɛlɛka heelu Chiisu o choo choo niŋ yɛ, lende koni o cho vɛlɛ hunɔɔ ni.”
12 Okoŋ ma faŋaŋ o Pembii Ɔlifii Ve, ma miiŋgu Chulusalɛm.+ Pembei hei yɛ, i cho levil a Chulusalɛm te. Tiŋndo cho le kɔla kilo pilɛ.* 13 Mɛɛ nda fuuluu, ma hel o chiɛi choo choo pum niŋ o lumui nda wa o yiya wo. Wanaa wa loŋ nda cho haa ni: Pitɛ, Chɔŋ, Chemisi, Andulu, Filipi, Tɔmɔsi, Batolomi, Maatiu, Chemisi po Afiɔɔsi wo, Saimɔŋ Wana Dialuŋ Fulaa, a Chuda po Chemisi wo.+ 14 Nda kpou wa hiouwɔɔ lachi a piɛileŋ o diompilɔɔ niŋ, latulu a waŋ laanduaa apum.+ Meele kalaa Chiisu, a pɔmbuaa Chiisu wa bɛɛ wa loŋ.+
15 Paale pilɛ, mi Pitɛ sim puaapiliaa tɛɛŋ (nda kpou a wa le ŋwaŋ 120), mbo dimi aa: 16 “Puaapiliaa, i wa suɛi sɔvɛ le mi nyɛ yau Mɛlɛkaa dimi wo peeluŋ. Sanaa a mala nyina diandaa, mi Deeve suaa a Chuda okɔɔ,+ o sim puaa chɔuwa lachi le Chiisu biyɔɔ wo.+ 17 Chuda bɛɛ wa wana pilɛ naa tɛɛŋ,+ nduyɛ mbo sɔla hɛlioo le wallo hoo tosaa a naa latulu. 18 (Laŋunɔɔ hoo yɛ, ndu kpeekpei pendu lɛŋndeŋ ni a kaniŋ* nda paawa* ndu le dɛnɛ ndɔ wɔɔŋndo woŋ.+ Mbo kɔ del a lebol, mi demboo buli ndu, okoŋ mi nyɛm wa ndu niŋndoŋ fula.+ 19 Mi wanaa wa Chulusalɛm nda kpou sina a hei okɔɔ. Ma veelu niko lɛŋnde leŋ o suɛi ndɛi maŋgalɛi niŋ aa Akɛɛdama, koŋ cho ni, “Yondo maKoŋgoo.”) 20 I cho i poonyiaa o yau Sam ndo niŋ aa, ‘Maa fondaŋ ndɔ chalaa simnuŋ pɔmndo, wana o wana chel lɛ loŋ te!’+ Nduyɛ ‘Maa wana cheleŋ miiŋgu o foofo o nɔ le chilaŋ chuaa wo fɔ!’+ 21 Lelaŋ, o bɛnda miŋ hɛli wana pilɛ o wanaa wa latulu a naa wa tɛɛŋ, teleŋ Masanɔɔ Chiisu wa walta ndɔlaŋ tosaa wo, 22 kanduŋ a teleŋ Chɔŋ yiŋ ndu wo,+ haaa a paale o mɛi naa mbo kuaŋnuŋ ndeŋ.+ Wana pilɛ o puaa haa tɛɛŋ nɔ mbo wa seiyo a naa latulu, a miiŋgu Chiisu miiŋgu yoomu wo okɔɔ.”+
23 Okoŋ ma soli wanaa ŋiɔɔŋ. Choosɛ, o ndaa veelu aa Basabaa, mi ndaa veelu ndu vɛlɛ aa Chɔsitɔɔ wo, a Matayasi. 24 Ma piɛi aa: “Oo Chɛhowa,* num sina hoo kɔltaŋ kpou wo,+ chɔm naa wana ŋ hɛli o puaa ŋiɔɔŋnda haa tɛɛŋndo, 25 le wallo hoo a wali lekiilaa tosaa, o Chuda mal mbo tual nɛi ndɔɔ kɔɔli wo.”+ 26 Lelaŋ, ma wuu kooŋ le nda,+ nduyɛ mi kuei chɔm maa Matayasi Mɛlɛka hɛli ni. Okoŋ ma handu ndu o kiilaa 11 choo.