Luku

24 O paale taseleŋ choo o lɔɔ bɛŋgu, mi waŋ laanduaa haa huŋ idiiyo puŋ o sɛiyo* a nyɛm chuŋ kɛndɛŋ nda toosiaa woŋ.+ 2 Kɛ a komal pou wa o sɛiyo* sondoo wo o faŋaa.+ 3 Mɛɛ nda luɛi, a komal dialuŋ Masanɔɔ Chiisu woŋ te.+ 4 A lo kɔltaŋ keeliaa a ndi okɔɔ, o lepilɛ niŋ kpe, ma cha puaa a ŋiɔɔŋ isisi nda ikɛi a nyɛla ŋɛlɛŋgi ŋɛlɛŋgilaŋ lekɔɔ. 5 Mi siooŋnde bii waŋ laanduaa haa tau, okoŋ ma tundu hɔlla lɛŋ. Mi puaa haa dimul nda aa: “Le yɛɛnɛ nya cho yɛ wana cho yoomu wo nuuviaa waŋvilɛiya tɛɛŋ?+ 6 O cho nanuŋ te. O miiŋgu yoomu. La loonuŋ nyɛ o dimul nya teleŋ o wa Kalili wo. 7 Mbo dimi maa a cho Po wanachioo malɔɔ wanaa yɔŋ wɔɔŋnda o ba, ma dii ndu o yɔmndo choo, kɛ mbo miiŋgu yoomu o paale yaa ndɔleŋ choo.”+ 8 Okoŋ ma loonuŋ nyɛ o dimi wo.+ 9 Ma faŋaŋ o sɛiyo,* ma kɔ doonuŋ kiilaa 11, a buɛiyaa tuaa sɔɔŋ muŋ kpou kona.+ 10 Waŋ laanduaa haa wa Meele Madaliŋ, Chohana, a Meele kalaa Chemisi ni. Nduyɛ, waŋ laanduaa cheleŋ wa a nda latulu wa bɛɛ wa kiilaa nduaa sɔɔŋ muŋ dimullo. 11 Kɛ ma cha maa sɔɔŋ ŋdiɔmndoŋ koni nda wa nda dimullo ni. A laalaŋ nda le.

12 Mi Pitɛ chaŋ mbo nyaanuŋ o sɛiyo.* Mɛɛ o tunduŋ, feŋgbɛlaŋ koni o che ni. Okoŋ mbo miiŋgu a kɔllo keelaa le sinaa nyɛ yɔŋnuŋ ndo.

13 O paale pilɛle leŋ choo, buɛiyaa Chiisu wa a ŋiɔɔŋ wa kɔlaŋ o sɔndɔkɔlɔ pilɛ diolaŋ aa Ɛmayɔɔ. Chɔŋ Chulusalɛm kɔ loŋ, ndoo wa kɔla kilola 11 a nyɛ lechoo.* 14 A wa kɔlaŋ a suukaŋndo a sɔɔŋ yɔŋnuŋ muŋ ndoŋ kpou okɔɔ.

15 Mɛɛ nda wa kɔlaŋ a suukaŋndo a sɔɔŋ muŋ okɔɔ, mi Chiisu sɔɔŋguu nda ikɛi mbo wa kɔlaŋ nda ndaa, 16 kɛ a nɔla ma sina ndu le.+ 17 Mbo nyuna nda aa: “O sɔɔŋ yɛɛ choo nya cho yɛ kɔlaŋ a suukaŋndo?” Ma sim yi a kɔltaŋ nda la tambɛi pɛ. 18 Mi o nda veelu aa Kiliopaa wo mulul ndu aa: “Kpooko! Baa miallo ŋ cho Chulusalɛm ni? Sɔɔŋ yɔŋnuŋ loŋ waalioo woŋ kpou, I che maa num koni sina wɔ muŋ te ni. 19 Mbo nyuna nda aa: “Sɔɔŋ yɛɛnɛ?” Ma mulul ndu aa: “Sɔɔŋ yɔŋnuŋ Chiisu fula Naasaluɛi yo woŋ.+ Wana ndoo suaa le Mɛlɛka wo o wa ni. Mbo dimi sɔɔŋ kɔndɔfilloŋ. Nduyɛ mbo tosa walta kpaayalaŋ Mɛlɛka o hɔl a waŋnda kpou.+ 20 Kɛ mi masaa wanaa soliaa lasalaa, a masaa naa mal ndu waŋnda o ba le ma baŋ ndu o yɔmndo choo,+ okoŋ ma dii ndu. 21 Nduyɛ, naŋ nɔ tiindaŋndo maa poo hoo ndoo nɔ le Isɔluɛi baŋaa ni.+ O fulawɔ okoŋ kɔɔli, hau pei palɛi i yaa ni chɔŋ a teleŋ sɔɔŋ muŋ yɔŋnuŋndo. 22 Nduyɛ, mi waŋ laanduaa apum naa tɛɛŋ bɛɛ tosa mi kɔndɔfillo bii naa. Ma kua diilɛŋ puŋ o sɛiyo,*+ 23 kɛ a komal dialuŋ ndɔŋ te. Ma huŋ dimul naa maa ma cha maalikɛiya, nduyɛ ma dimul nda maa o miiŋgu yoomu. 24 Mi wanaa pum naa tɛɛŋ kua o sɛiyo,*+ kɛ ma komal ndu fondo mɛɛ waŋ laanduaa dimi yɛ, a chi dialuŋ ndɔŋ te.”

25 Okoŋ mi Chiisu dimul nda aa: “Ee nya vɛlɛ bɛɛ, la kendu bɔɔ isɔɔ pɛɛku. La kendu le laalaŋndo sɔɔŋ wanaa ndaa suaa le Mɛlɛka wa dimi woŋ kpou! 26 La sina nuaa maa sɔɔŋ muŋ kpou, muŋ nɔ le Kiliti yɔŋnɔŋndo,+ okoŋ mbo luɛi o naŋɔɔ ndɔɔ niŋ te?”+ 27 Mbo tɛɛsial nda nyɛ o nyɛ Muuse, a wanaa ndaa suaa le Mɛlɛka wa+ kpou dimi o Yau Mɛlɛkaa niŋ a ndu okɔɔ wo.

28 Mɛɛ nda hiŋ le fuuluuwo o sɔndɔkɔlɔ nda wa kɔlaŋ ndo, mi Chiisu tosa maa hiounɔŋndo o cho ni. 29 Kɛ ma nyɔɔlu ndu aa: “Ŋ lɔŋnuŋ nanuŋ, kanifuule paaleŋ le cho niŋ le delɔɔ, nduyɛ nyumndaŋ ma cho suŋ tolɔɔ.” Okoŋ mbo kua chiɛiniŋ nda ndaa. 30 Mɛɛ o wa nyɛdiaa dioo a nda latulu, mbo chua beediiyo,* mbo piɛi, mbo yimi yimi, mbo ke nda.+ 31 Okoŋ, mi hɔlta ndalaŋ la kumbiŋ ma sina ndu. Kɛ mbo lo nda o hɔl pɛ.+ 32 Ma dimulaŋ aa: “Teleŋ o wa suɛi o naa lo nɛi tɛɛŋ, nduyɛ mbo wa naa sɔɔŋ muŋ tɛɛsiallo o Yau Mɛlɛkaa niŋndo, miŋ pilaŋ naa kɔltaŋ tau.” 33 Ma chaŋ o lepilɛ niŋ kpe ma miiŋgu Chulusalɛm. Ma komal kiilaa 11 a wanaa wa a chuuŋgiaŋ latulu a nda wa. 34 Ma dimul nda aa: “A tonya, Masanɔɔ miiŋgu yoomu, nduyɛ mbo fula Saimɔŋ o hɔl!”+ 35 Mi nda bɛɛ dimul nda sɔɔŋ yɔŋnuŋ o nɛi yoŋ, vɛlɛ a mɛɛ nda sina ndu teleŋ o yimi yimi beediiyo wo yɛ.+

36 A lo suɛi a ndi okɔɔ, mi Chiisu pila huŋ sim nda tɛɛŋ, mbo dimul nda aa: “Maa la wa a kɔl nyulu fɔ!”+ 37 Kɛ ma woolu wa wa a siooŋnde, nduyɛ ma nyiiya kpa kpa. Ndaa yiyaŋ ko maa nyinaa fula nda o hɔl ni. 38 Okoŋ mbo nyuna nda aa: “Siooŋii yɛɛ nya cho yɛ? Nduyɛ le yɛɛnɛ nya cho yɛ kiisaŋndo? 39 La tofawɔ ya balaŋ a peloŋ. Ya kpeekpei ni. La pilaŋ ya mi la che, kanifuule nyinaa nɔ ŋdial te. Nduyɛ o nɔ vɛlɛ lapaa mɛɛ nya cho ya chɔɔ yɛ le.” 40 Mɛɛ o dimi lende, mbo chɔm nda bala ndɔlaŋ a peluŋ ndɔŋ. 41 Kɛ buɛiyaa nduaa ndaa laalaŋndɔ nyɛ o wa nda dimullo wo le, kanifuule kɔndɔfillo wa nda, nduyɛ a wa a nyaale tau. Okoŋ mbo nyuna nda aa: “La nɔ pa nyɛdiaa naŋ le dioo? 42 Ma ke ndu suu tuɛiyaa. 43 Mbo bii, mbo dia nda o hɔl.

44 Okoŋ mbo dimul nda aa: “La loonuŋ maa teleŋ ya wa a nya latulu wo,+ mi dimul nya maa nyɛ o nyɛ cho o poonyiaa o Sawala Mɛlɛka ke Muuse laŋ niŋ, a nyɛ wanaa ndaa suaa le Mɛlɛka wa dimi wo, a nyɛ yau Sam ndo dimi a ya okɔɔ wo nɔ mbo peeluŋ.”+ 45 Okoŋ, mbo kumbi kɔlta ndalaŋ le ma bii nyɛ Yau Mɛlɛkaa dimi wo bila nyɛkɛndɛi.+ 46 Mbo dimul nda aa: “Nyɛ cho o poonyiaa wo cho hoo ni aa: Kiliti nɔ le saŋgaa sɔlaa, nduyɛ mbo miiŋgu yoomu o paale yaa ndɔleŋ choo.+ 47 Nduyɛ kanduŋ Chulusalɛm,+ yooŋgoo nɔ mbo balu dimiŋndo o kaalaŋ niŋ kpou+ le mi waŋnda wookuŋ,+ ma sɔla malɔɔ hakioo sanaa o diola ndɔlaŋ niŋ. 48 La cho seileŋ timbi a sɔɔŋ muŋ okɔɔ.+ 49 I cho nya yɔŋ nyɛ Finya nuu mɛi lediom ndo. Kɛ nya, la lo Chulusalɛm haaa mi la sɔla kpaaya cho fula choo choo wo.”+

50 Okoŋ mbo kua a nda Bɛtani pɔ, mbo heelu balaŋ choo choo, mbo duau nda sala. 51 O lo nda salaa dɔwɔɔ, mi Mɛlɛka heelu ndu o choo choo niŋ, mbo mɛi nda loŋ.+ 52 Okoŋ kɔɔli, ma beŋ Chiisu wulaŋ, ma miiŋgu Chulusalɛm a nyaale bɛndoo.+ 53 Ma hiau lachi a Mɛlɛka saŋgalaa o chiɛi ndɔɔ niŋ.+