Polowaa
3 Po nuu, puɛɛnuŋ sɔɔŋ ya pɛɛku numndoŋ* te.
Nduyɛ, maa kɔl numndo bii sawala nilaŋ fɔ!
2 Kanifuule hei cho tosa ma viou yoomu,
Nduyɛ ma wa o kɔl nyulu niŋ le wɔsiŋ bɔɔbɔɔ.+
3 Chɛl mi lo lechoo numndo a tonyaa hɛluŋ num te.+
Yiinuŋ ndaŋ o labolo,
Nduyɛ ma poonyiaŋ ndaŋ o kɔl.+
4 Koŋ cho tosa ma nɔ taasioo,
Nduyɛ mi Mɛlɛka a waŋnda chieeya hini kɔl a num.+
6 Nyɛ o nyɛ ŋ wa pɛ tosaa, puɛɛnuŋ a ndu le.+
Keŋ cho tosa mi nɛila numndaŋ la wa sakpo.+
7 Tiindaŋ taasi numndo le.+
Nɔ siooŋnde le Chɛhowa, nduyɛ ma mulul sɔɔŋ wɔɔŋndoŋ kɔɔ.
8 Koŋ wa niŋ kɛndiaa le dialuŋ numndoŋ* ni,
Nduyɛ mi paala numndaŋ la kendu poŋ.
9 Ke Chɛhowa bɛɛleŋ a nyɛm num sɔvɛ sɔviɔŋ.+
Ndu yɔŋnuŋ ni maa kɔmnde taseleŋ* o tɔlɔɔla numndaŋ niŋ.*+
10 Koŋ cho tosa mi chiɛila ŋ kɛsi nyɔɔŋ ndaŋ la pɛ cha cha,+
Nduyɛ mi doolala* numnda mamuɛilaŋ la pɛ mi la choŋ waa a muɛima sɛnɛiyaŋ.
11 Po nuu, kɛɛ sila Chɛhowa wo le.+
Nduyɛ te o miŋgi num o nɛi pɛ, duaunuŋ tumbe le.+
12 Kanifuule wanaa Chɛhowa kaala wa, nda o miŋgi o nɛi ni.+
Lende koni finyaa tosa a po ndɔ o kaala wo ni.+
13 Kɔl kɛndɔɔ cho le wana saaluŋ taasioo wo,+
Vɛlɛ a wana sɔla sinapɛŋgoo wo.
14 Taasioo sɔlaa bɛnda mbo hiau kanii humbuei.
Nduyɛ o bɛnda mi wana nɔ taasioo mbo hiau kooliiye.+
15 O cho o sɔvɛ mbo hiau pouta baa kalalaŋ o peelo.*
A tuu ndu a nyɛ o nyɛ le.
16 Taasioo nɔ yoomu vilɛiyo o ba kɛndɔɔ choo,
Nduyɛ sullo a naŋɔɔ bɛndoo cho ndu o ba miallo choo.
17 Te a nɔ taasioo pɛ, a cho wa a kɔl kɛndɛ,
Nduyɛ ma nɔ kɔl nyuloo o yoomu numndo niŋ.+
18 Te waŋndo bii ndu pɛ kpiŋ, mbo simnuŋ yɔm yɔŋgu yoomoo wo le ndu.
Nduyɛ, mi wanaa bii ndu kpiŋ nda wa a kɔl kɛndɛ.+
19 A taasioo Chɛhowa toosiaa lɛŋndeŋ ni.+
Nduyɛ a sinapɛŋgoo o toosiaa choo choo ni, mbo kindi ndu poŋ.+
20 A kɔl kaloo o tɛnda mɛŋma yiŋgilɛiyaŋ tɛɛŋ ni,
Nduyɛ mbo tosa mi mɔmndo chɛŋ o halaa niŋ mbo chuchu.+
21 Po nuu, puɛɛnuŋ a sɔɔŋ muŋ te.*
Chɛl mi taasioo hɛluŋ num te, nduyɛ manda yiyaŋ numndo.
22 Ŋ cho num yoomoo ke,
Nduyɛ miŋ wa maa yɔlɔŋ kɛndɛ kɛndɔŋ num o labolo.
24 Te a hini pɛ, siooŋii bii num niŋ te.+
A hiniŋ niŋ ma lɔlnuŋ kpooŋ.+
25 Kpundɔɔ huŋ bɛɛ o lepilɛ niŋ kpe, o luei niŋ num isiooŋ te,+
Kɛlɛŋgaa niŋ te hueiyii kpundɛ komal wanaa dɛnɛ wɔɔŋnda ve.+
26 Chɛhowa cho wa tiindaŋ numndo ni.+
Nduyɛ o cho num manda, pelii numnde luei o leyaŋɔɔ niŋ te.+
28 Te a nɔla pɛ le waŋndo nyɔɔ kioo suŋ suŋ, dimul ndu nuaa aa,
“Kɔ wɔ pɔɔ. Siɔdii a hiŋ pɛ, I ke num” te.
29 Te wana nya chiɛɛliaŋ ndo yiyaŋ pɛ maa o cho hɛnɛkɛ le waa a num latulu,
Tuunuŋ suɛi wɔɔŋ o kɔl le ndu le.+
31 Paŋala wana latandaa le,+
Kɛlɛŋgaa niŋ te ma tol kaa ndɔ kɛ kɛ kɔɔli.
33 Mi Chɛhowa handu sendioo o chiɛi wana dɛnɛ wɔɔŋndo choo,+
Kɛ mbo dɔu chiɛi wana cho sakpo wo sala.+
35 Wanaa taasiaa cho bɛɛleŋ sɔla,
Kɛ mi diɔmnda sɔla bɛɛla tambɛilaŋ.+