Pitɛ Diiŋ Ndɔɔ
2 Wanaa lachoowaa dimi maa le Mɛlɛka nda suaa ni wa, a wa sindɛ waŋnda tɛɛŋ. Lende koni wanaa pɛɛkaa lachoowaa wa niŋ nya tɛɛŋ ni.+ A cho tosa mi piɔuwaŋndo luɛi nya tɛɛŋ. Nduyɛ wana pendu nda wo bɛɛ, a cho ndu kɛɛ kpooŋ.+ Le hei, a cho tambei sɔla chɔ chɔ. 2 Wanaa bɔɔbɔɔ tual niŋ kaala ndala kɔl vesɛilaŋ* kɔɔli.+ Le saboo hoo, waŋnda cho wa sɔɔŋ wɔɔŋndoŋ dimioo a nɛi tonyaa okɔɔ.+ 3 Le mɛɛ nda cho wanaa lepuluaa yɛ, a cho nya hui ma poondiaa nyɛm nyaŋ. Yamɛi kɛɛsiaŋ sindɛ pa+ le nda ve, i doonuŋ niŋ tamala le. Nduyɛ, nyɛ o nyɛ kuuna nda tambei sɔlaa le.+
4 Maalikɛiyaa tosa sindɛ hakioo wa, Mɛlɛka mel nda haki le.+ Kɛ mbo wou nda o Tatalɔɔ* niŋ.+ Nduyɛ mbo yii nda a yɔlɔŋ, ma wa o fondaŋ nyumma kpiŋgbi bɛndoo niŋ. Loŋ nda cho lo ni haaa mi Mɛlɛka huŋ kilul nda yamɛi.+ 5 Nduyɛ, chieeŋ wa koŋ o sindɔɔ niŋndo,+ mi Mɛlɛka tɛɛmbuu ndu a mɛŋma koŋgi bɛnduaŋ. Kanifuule, o wa o piaa cha a wanaa ndaa sina Mɛlɛka le wa.+ Kɛ mbo manda Nuuwa, wana wa yooŋgoo dimioo a nyɛ cho sakpo wo okɔɔ wo,+ a wanaa cheleŋ a ŋɔmmɛu.+ 6 Okoŋ kɔɔli, mbo luam Sodɔm a Komoolua chilikɔ. Mi chieeŋ bɛndoŋ muŋ simnuŋ pultaŋ.+ Hei cho maa tamasi le sɔɔŋ cho hunɔɔ yɔŋnɔŋ wanaa sina Mɛlɛka le wa o chilaŋ niŋndoŋ.+ 7 Kɛ mbo chiindiaa Lɔtu,+ wana sakpoo. Mi Lɔtu tambu kɔl tau a kaala kɔl vesɛila* wanaa dɛnɛ wɔɔŋnda wa tosaa laŋ. 8 Teleŋ wana sakpoo hoo wa nda tɛɛŋndo, lepaa o lepaa o wa mɔnɛi biyɔɔ le sɔɔŋ dɛnɛ wɔɔŋ o wa chɔɔ waŋnda haa tosaa, nduyɛ mbo wa tueiyɔɔ woŋ. 9 Lelaŋ, Chɛhowa* sina mɛɛ o chiindiaa wanaa yɔŋguŋ o ndu lo wa o nyɛpalaa niŋ yɛ.+ Kɛ wanaa dɛnɛ wɔɔŋnda nda, o cho nda kɛsioo le ma huŋ sɔla tambei o paale kɔɔsɔleŋ choo.+ 10 Taama taama wanaa cho kindiŋndo le dialuŋ acheleŋnda nɔɔliaa wa,+ a wanaa yeema ma wa o kpaaya lemasa bɛŋgu le wa.+
Waŋnda haa hiuba a ndapila laalaŋndo. Wanaa yoŋgaa nda cho ni, nduyɛ a nɔ isiooŋ le wanaa Mɛlɛka ke bɛɛleŋ nda diomnda wɔɔŋndaŋ dimullo le. 11 Kɛ, maalikɛiya nda cho lende le. Mi che bɛɛ a nɔ kpaayaa a yoomuaŋ tau, kɛ a dimul wanaa lachoowaa haa diomnda wɔɔŋndaŋ te, kanifuule a nɔ bɛɛleŋ le Chɛhowa.*+ 12 Waŋnda haa cho sɔɔŋ tosaa mɛɛ visiaa tosa sɔɔŋ yɛ. Visiaa nɔ kɔl kalu le. A kom nda pɛ, a bii nda, okoŋ a dii nda. Sɔɔŋ waŋnda haa sina le woŋ,+ a muŋ okɔɔ nda dimi sɔɔŋ wɔɔŋndoŋ ni. Nda bɛɛ cho hunɔɔ tambei sɔla le dɛnɛ nda wɔɔŋndo. 13 A cho hunɔɔ nyɛpalaa sɔla le kaala ndala wɔɔŋndaŋ.
I pala deŋ nda wa a nyaale ni le yeemaŋ ndaŋ wɔɔŋndoŋ tosaa.+ Sɔɔŋ lasiɔmboŋ a sɔɔŋ bɛɛtambɛiyoŋ kposoŋ nda tosa ni. Te la chuuŋgiaŋ pɛ le nyɛdiaa dioo, a luɛi nya tɛɛŋ le waŋnda huiyo a pɛɛkula lachoowalaŋ.+ 14 Yeemɛi suundɛiye hiou nda o kɔl kɔɔli.+ A nɔla lɛ ma mal hakioo tosaa le. A bii pɛ, a hui wanaa kindu o Mɛlɛka piɛiyo niŋ te wa le ma wou balaŋ o hakioo niŋ. A cho wanaa hɔlte bɛndu. Chuauwaa sendiaa nda cho ni. 15 A bii ma mal nɛi tonyaa, ma laasiaŋ. Okoŋ ma tual Belam,+ po Biyɔɔ wo kɔɔli. Mi poo hoo tosa suɛi wɔɔŋnde, kanifuule ndoo yeema le fandaa sɔlaa.+ 16 Kɛ mbo sɔla silaa le suɛi wɔɔŋii o tosa ve.+ Mi sofɛlɔɔ, visi suu le wo suaa o ndu lo maa wanachiee. Okoŋ, mbo kuuna ndu le hiouwɔɔ lachi a diɔmii fonduii keŋ tosaa.+
17 Waŋnda haa cho ko mɛɛ sooŋnda mamɛŋndaŋ la vela nuaa sɛɛŋ yɛ. Nduyɛ a cho maa piɔɔ hueiyii fuku fukuei hivi wo. Kɛ Mɛlɛka kɛsi nyumma bɛndu bɛnduaŋ le nda.+ 18 Sɔɔŋ waŋnda haa kialu yoŋgaa a muŋ okɔɔ woŋ, ŋ nɔ tɔnɔ o tɔnɔ le. Ma tosa kaa kɔl vesɛiyo,* nduyɛ ma kpeeŋiaa waŋnda yeemaŋ wɔɔŋndoŋ.+ Ma hui nda le ma miŋgi vɛlɛ balaŋ o sɔɔŋ nda wa paandu tosaa woŋ niŋ.+ 19 Ma chuel waŋnda buŋgɛi maa a cho nda baŋa. Kɛ ndapila bɛɛ cho chiaa hakioo o ba bɛŋgu.+ Kanifuule, te waŋndo nɔ num pɛ kpaayaa choo, mɛɛ chiɔɔ ŋ cho le ndu ni.+ 20 A tonya, te waŋndo hɛluŋ pɛ sɔɔŋ nɔɔlɛiyoŋ o chieeŋndo niŋ+ sanaa a kɔl kalu o sɔla a Masanɔ naa Chiisu Kiliti okɔɔ wo, okoŋ mbo miŋgi vɛlɛ balaŋ o sɔɔŋ o wa paandu tosaa woŋ niŋ, mɛɛlula ndɔlaŋ la cho wɔu mbo hiou mɛɛ o wa o tasela ndɔɔ yɛ.+ 21 Ndoo bɛnda bɛɛ mi ndaa sina nɛi sakpoo nyɛkɛndɛi le. Koŋ ndoo hiau naŋɔɔ, a ndu sinaa ma mulul sawala diandaala nda sɔla laŋ kɔɔ.+ 22 Nyɛ yɔŋnuŋ nda wo chɔm maa nyɛ taloo hoo dimi wo cho tonya. Ndu cho ni: “Tuŋndo miiŋgu vɛlɛ kuisi ndɔɔ deembuuwo. Nduyɛ, peu nda chii pulɔɔ wo miiŋgu vɛlɛ lindaŋndo o loolioo niŋ.”+