Maatiu

7 “La pɛŋgi waŋnda yamaŋ kilullo,+ yɔŋii nda kilul nya yamɛi. 2 Kanifuule, mɛɛ nya kilul chaanda yamaŋ yɛ, lende koni nda cho nya yamɛi kilul ni.+ Nduyɛ mɛɛ nya tuulul chaanda yɛ, lende koni nda cho nya tuulul ni.*+ 3 Vɛ ma buulaŋ a bilte cho puaapilɛnɔ numndo o hɔl teŋ, kɛ a buulaŋ a yɔm bɛndu cho num o hɔl lo le?+ 4 Ɔɔ, vɛɛ ŋ dimul lɛ puaapilɛnɔ numndo aa, ‘Huŋ I soli num bilteŋ o hɔl,’ kɛ mi yɔm bɛndoo wa num o hɔl? 5 Num wana mulu muluaŋndo hoo! Soli wɔ fɛlɛŋ yɔm bɛndu cho num o hɔl lo. Okoŋ, a wa niŋ chɔɔ walaŋ le ma soli puaapilɛnɔ numndo bilteŋ o hɔl.

6 “La ke tuŋnda nyɛm cho ŋ diandaa woŋ te. Nduyɛ, la wuulul peuwa nyɛm nyaŋ baa kalaŋ te,+ yɔŋii nda niɔu muŋ okoŋ ma muliŋ ma yɔŋul nya.

7 “La lambaŋ nyunaa, la cho sɔla.+ La lambaŋ nuuviaa, la cho saalɔŋ. La lambaŋ dioo lɔɔ, o cho kumbiŋ.+ 8 Kanifuule, wana o wana nyuna pɛ, o cho sɔla.+ Wana o wana nuuviaa pɛ, o cho saalɔŋ. Nduyɛ wana o wana lɔɔ dioo pɛ, dioo cho kumbiŋ. 9 O nɛɛnɛ cho yɛ nya tɛɛŋ, te po ndɔɔ nyuna ndu pɛ le beediiyo,* o ke ndu pouwo? 10 Ɔɔ te po ndɔɔ piɛi ndu pɛ suuwo, o ke ndu kɛuwo. O tosa pa keŋ? 11 Lelaŋ, te nya wanaa lahakiaa sina pɛ mɛɛ nya ke chuauwaa nyaa nyɛm kɛndɔŋ yɛ, ɔɔ niŋ Finya nya cho o choo choo niŋndo? A tonya, o tiuba mbo ke wanaa cho ndu nyunaa wa+ nyɛm kɛndɔŋ!+

12 “Nyɛ o nyɛ nya yeema pɛ mi chaanda tosal nya,+ nya bɛɛ la tosal nda nyɛ pilɛ koŋ kpe. Kanifuule, hei kɛsɛ Sawalaŋ* a wanaa ndaa suaa le Mɛlɛka wa dimi ni.+

13 “La keeku o dio sɔɔkɛnyɛɛ wo,+ kanifuule dio bɛndoo cho o yaa wana o tambei niŋndo, nduyɛ nɛi ndɔɔ cho o tuaŋgaa. Loŋ wanaa bɔɔbɔɔ cho keelaŋ ni. 14 Kɛ nɛi yaa wana o yoomoo wo kendu kɔlaŋ, nduyɛ dio ndɔɔ bɛɛ cho sɔɔkɛnyɛɛ. Waŋnda nyɛɛmbɔ koni cho kɔlaŋ lechoo ni.+

15 “La mandaŋ a wanaa lachoowaa dimi maa le Mɛlɛka nda suaa ni wa.+ Ma mɔɔviaa yɛmbɔŋ le chɔmndo maa saa nda cho ni,+ kɛ nduyɛ visiaa biyaa nda cho o kɔltaŋ niŋ ni.+ 16 A kaala ndalaŋ* nya sina niŋ nda ni. Yɔm ŋyɔɔ kum kilepiiyaŋ ɔɔ fikiiyaŋ kposoŋ te, lende le?+ 17 Lende koni, yɔm o yɔm cho yɔm kɛndɛ, ndu kuam komɔɔ kɛndɔɔ ni. Kɛ yɔm o yɔm cho yɔm kɛndɛ le, komɔɔ wɔɔŋndo o kuam ni.+ 18 Yɔm kɛndɔɔ kum komɔɔ wɔɔŋndo le, nduyɛ yɔm wɔɔŋndo kum komɔɔ kɛndɛ le.+ 19 Yɔm o yɔm kum komɔɔ kɛndɛ le, kiolɔɔ nda kialu ndu ni ma viou ndu o yiŋ.+ 20 A tonya, a kaala ndalaŋ nya cho waŋnda haa sina ni.+

21 “O cho wanaa cho haa dimioo aa: ‘Masanɔɔ, Masanɔɔ’ wa kpou le luɛi niŋ o Masale Mɛlɛkaleŋ niŋ te. Kɛ wanaa cho hɛnaŋ Finya nuu o choo choo niŋ tosaa wa kinɛi cho luɛiyɔɔ ni.+ 22 Wanaa bɔɔbɔɔ dimul la niŋ o paale leŋ choo aa: ‘Masanɔɔ, Masanɔɔ,+ o cho naa le wa waŋnda yooŋgu Mɛlɛkaa dimullo o diola numndaŋ niŋ te? O cho naa le wa nyinaa wɔɔŋnda touwɔɔ, a walta kɔndɔfiltaŋ tosaa o diola numndaŋ niŋ te?’+ 23 Okoŋ, I cho nda dimul aa: ‘I sina nya kposoŋ te! La faŋaŋ ya nanuŋ, nya wanaa dɛnɛ wɔɔŋnda haa!’+

24 “Le hei, wana o wana tuei pɛ nyɛ ya dimi wo nduyɛ mbo tosa ndu, wana koŋ wa niŋ maa wana kɔl kalu pilɛ, o taŋgul chiɛi ndɔɔ o pouwo choo wo.+ 25 Mi piɔɔ bɛndoo sia, okoŋ mi mɛŋndaŋ ma huŋ tau tau. Nduyɛ mi hueiye hɔŋ hɔŋndo pila, mi i kuaŋ chiɛiyo hoo kɛ o komba le. Kanifuule, o wa o taŋgulaa o pouwo choo. 26 Kɛ wana o wana tuei pɛ nyɛ ya dimi wo nduyɛ mbo kɛɛ le ndu tosaa, wana koŋ cho wa maa diɔm taŋgul chiɛi ndɔɔ o siooŋnde choo wo.+ 27 Mi piɔɔ bɛndoo sia, okoŋ mi mɛŋndaŋ ma huŋ tau tau. Nduyɛ mi hueiye hɔŋ hɔŋndo pila,+ mi i kuaŋ chiɛiyo hoo, mbo komba wɔlɔwɔlɔ.”

28 Mɛɛ Chiisu chii sɔɔŋ muŋ dimi, mi kɔndɔfillo bii waŋnda a mɛɛ ndoo chaa pɛɛkoo yɛ,+ 29 kanifuule o ve pɛɛku maa wanaa ndaa pɛɛku waŋnda sawala Mɛlɛkalaŋ nda le, kɛ o wa pɛɛkoo maa wana ndoo sɔla kpaayaa wo.+