Maki

6 Mi Chiisu faŋaŋ o fondaŋ o wa wo, mbo kuaŋnuŋ o ndu lo,+ nduyɛ mi buɛiyaa nduaa tual ndu kɔɔli. 2 O Paale Pɛŋgiaaleŋ choo, mbo kandu waŋnda pɛɛkoo o chiɛi Chuuwa piɛi Mɛlɛka wo niŋ. Mi kɔndɔfillo bii wanaa bɔɔbɔɔ wa ndu nilaŋ yaŋɔɔ wa. Ma dimi aa: “Kuɛɛnɛ poo hoo pɛɛku yɛ sɔɔŋ muŋ?+ Wana maavɛɛ o cho yɛ le mbo sɔla taasi waa nuaa, a kpaayaa le walta kɔndɔfiltaŋ ndaŋ tosaa?+ 3 Kaapindɛinɔɔ* le o cho le?+ O cho kala ndɔ le cho Meele le?+ Pɔmbuaa nduaa le cho Chemisi,+ Choosɛ, Chuda, a Saimɔŋ te?+ O cho naa yemaa nduaa le cho nanuŋ te?” Le hei kpeekpei nda kɛɛ laalaŋndo o ndu niŋ ni. 4 Kɛ mi Chiisu dimul nda aa: “Mi waŋnda kpou ke wana suaa le Mɛlɛka wo bɛɛleŋ. Kɛ o ndu lo chiee a o yuŋgu ndɔɔ niŋ, a ke ndu lebɛɛ le.”+ 5 Le hei, Chiisu nɔla mbo tosa kaamaa cheleŋ loŋ te. Mɛɛ bala o handu wanaa lanaawa a tiŋ choo mbo siŋgi nda wa. 6 Mi kɔndɔfillo bii ndu le mɛɛ nda kɛɛ laalaŋndo dɔwɔɔ o ndu niŋ yɛ. Mbo balu waŋnda pɛɛkoo o sɔndɔkɔlta wa o buŋgɛi keŋ niŋndaŋ.+

7 Okoŋ, mbo chuuŋgiaa kiilaa 12, mbo kandu nda viomɔɔ a ŋiɔɔŋ ŋiɔɔŋ nda.+ Mbo ke nda kpaayaa nyinaa wɔɔŋnda choo.+ 8 Nduyɛ mbo dimul nda maa tindalaŋ kinɛi nda chua ni, kɛ a chua nyɛ o nyɛ cheleŋ te. A chua beedii* le, a chua bɔlɔ kelaa le, kɛlɛŋgaa ikani o layifɔ le kɔlaŋ te.+ 9 Kɔwɛilaŋ* koni nda wounuŋ ni, kɛ a wounuŋ domala tiɔɔŋ te. 10 Mbo chɔɔlu nda dimul aa: “Chiɛi o chiɛi nya luɛi pɛ, la lo loŋ haaa mi la faŋaŋ o fondaŋ koŋ.+ 11 Nduyɛ chiee o chiee nya kuɛ pɛ ma chɛl nya ɔɔ ma yeŋ nya lani le, te la wa faŋaŋndo loŋ pɛ, la koŋ chundu cho nya o ŋpelu wo, mbo wa seileŋ le nda.”+ 12 Okoŋ ma kua, ma wa waŋnda dimullo le ma wookuŋ.+ 13 Ma tuau nyinaa wɔɔŋaa bɔɔbɔɔ wa waŋnda kɔɔli wa.+ Ma suu wanaa lanaa bɔɔbɔɔ chuɛiyaŋ, nduyɛ ma siŋgi nda.

14 Mi Masaa Hɛlɔɔ tuɛi a hei okɔɔ, kanifuule mi tɔɔ Chiisu wo tiu silɔ. Waŋnda wa dimioo aa: “Chɔŋ Wana Yiŋaa miiŋgu yoomu ni. Lelaŋ o cho walta kɔndɔfiltaŋ tosaa ni.”+ 15 Kɛ apum wa dimioo aa: “Ilaicha ni.” Apum wa vɛlɛ dimioo aa: “Wana suaa le Mɛlɛka wo ni, maa haa o sindɔɔ niŋ.”+ 16 Kɛ mɛɛ Hɛlɔɔ tuei hei, mbo dimi aa: “Chɔŋ ya kelu bolleŋ ndo miiŋgu nuaa yoomu ni.” 17 Kanifuule, Hɛlɔɔ ndoo vem waŋnda ni ma bii Chɔŋ, ma duau ndu o yɔlɔŋ o chiɛi manyumndo niŋ le mɛɛ o chua Hɛloodiaa, lanɔɔ Filipi bɛ ndɔ o nɔɔ niŋ yɛ.+ 18 Kanifuule, Chɔŋ wa Hɛlɔɔ dimullo aa: “O bɛnda kposoŋ ma chua lanɔɔ bɛ num o nɔɔ niŋ te.”+ 19 Mi Hɛloodiaa mia kuu a Chɔŋ. Ndoo yeema mbo dii ndu, kɛ o tiuba le. 20 Hɛlɔɔ ndoo nɔ siooŋnde le Chɔŋ le mɛɛ o wa wana sakpo, nduyɛ mbo wa wana diandaa yɛ.+ Lelaŋ, mbo chiindiaa ndu. Teleŋ o teleŋ ndoo yaŋ pɛ Chɔŋ nilaŋ, mi kɔllo ndoo laasiaŋ ndu kpou. Kɛ a koŋ kpou, mi nyɔɔ ndoo hɛnaŋ ndu le Chɔŋ nilaŋ yaŋɔɔ.

21 Kɛ mi fondaa sɔlaŋ mɛɛ Hɛlɔɔ wa paale ndɔle vialaŋ ndeŋ biiloo.+ Okoŋ, mbo toosiaa nyɛdiaa tau le laŋgbaa nduaa kalla, wanaa wa puaa chɔuwa bolleŋ nda, vɛlɛ a laŋgbaa kalla o lɛŋnde Kalili leŋ niŋ.+ 22 Mi chua Hɛloodiaa wo luɛi mbo ya yolaŋ pila. Nduyɛ mi Hɛlɔɔ, a wanaa wa nyɛdiaa dioo* wa kpou naŋ kɔl tau. Okoŋ mi masaa dimul chuaambɔɔ aa: “Nyɛ o nyɛ ŋ yeema pɛ, nyuna ya, I cho num ndu ke.” 23 Mbo mɛnaŋ aa: “Nyɛ o nyɛ ŋ nyuna ya pɛ, I nɔla mi ke num ndu. I nɔla mi piɔu masale nileŋ tɛɛŋ, mi ke num kumbuei i pilɛ.” 24 Okoŋ mi chuaambɔɔ fula mbo kɔ nyuna kala ndɔ aa: “Yɛɛnɛ ya nyuna yɛ le ndu?” Mbo dimul ndu aa: “Nyuna le bolle Chɔŋ Wana Yiŋaa.” 25 Mi chuaambɔɔ miiŋgu chɔ chɔ o masaa lo mbo kɔ dimul ndu aa: “I yeema ma ke ya bolle Chɔŋ Wana Yiŋaa o peetiiyo* niŋ suŋ suŋ.”+ 26 Mi che bɛɛ mi masaa tambu kɔllo tau, kɛ ndoo chii niŋ buŋgɛi chua mialaa nduaa* o hɔl, nduyɛ ndoo yeema mbo lo o lediom. 27 Mi masaa viam wanaa manda ndu wa o pilɛ chɔ chɔ le mbo kɔ huŋ a bolle Chɔŋ ndeŋ. Mbo kua o chiɛi manyumndo niŋ, mbo kɔ kiolu ndu bolleŋ kpali. 28 Mbo huŋ a leŋ o peetiiyo niŋ. Mi masaa ke chuaambɔɔ. Mi chuaambɔɔ bɛɛ yoo kala ndɔ. 29 Mɛɛ buɛiyaa Chɔŋ nda tuei a ndi okɔɔ, ma huŋ chua dialuŋ ndɔŋ ma kɔ kumbu muŋ o sɛiyo* niŋ.

30 Mi kiilaa chuuŋgiaŋ Chiisu ikɛi. Okoŋ nyɛ o nyɛ nda tosa, a nyɛ o nyɛ nda pɛɛku waŋnda, ma doonuŋ ndu kona.+ 31 Mbo dimul nda aa: “La ŋ kɔŋnuŋ o fondaŋ yololiɔɔ, mi la kɔ pɛŋgi nyɛ pɔmbɔ.”+ Kanifuule, wanaa faŋga faŋga wa kɔlaŋ a hunɔɔ, nduyɛ teleŋ bɛɛ ndaa nɔ le nyɛdiaa dioo le. 32 Okoŋ, ma luɛi o dɛndɔɔ niŋ le ma kuɛ o fondaŋ yololiɔɔ nda kpeele.+ 33 Kɛ mi waŋnda cha nda kɔlaŋ. Mɛɛ wanaa bɔɔbɔɔ sina a ndi okɔɔ, ma mal o chiooŋ, ma nyaanuŋ a ŋpelu ma fuuluu nda tase. 34 Mɛɛ o fula o dɛndɔɔ niŋ mbo cha waŋnda faŋga bɛndoo, mi nyiɛɛye bii ndu tau le nda.+ Kanifuule a wa ko maa saa nɔ wana mandaa le wa.+ Okoŋ, mbo kandu nda pɛɛkoo sɔɔŋ tau.+

35 Paaleŋ yɔŋgɔŋndo, mi buɛiyaa nduaa huŋ dimul ndu aa: “Fondaa hoo cho bɔɔ yololɛ, nduyɛ paaleŋ le cho niŋ le chuwɔɔ.+ 36 Lelaŋ, dimul waŋnda ma kuɛ o chieeŋ cho naa ikɛiyoŋ a o sɔndɔkɔltaŋ, ma kɔ piondu nyɛdiaa ma de.”+ 37 Mbo dimul nda aa: “La ke nda nyɛdiaa ma de.” Okoŋ ma nyuna ndu aa: “Baa ŋ kɔ piondu beediiyo* a dinaluɛiyoŋ* 200 miŋ ke nda ma de?”+ 38 Mbo nyuna nda aa: “Vɛɛnɛ nya nɔ yɛ beediiyo kpuŋgbaŋ? La kɔ tofawɔ!” Mɛɛ nda kɔ nua, ma dimul ndu aa: “Kpuŋgbaŋ ŋuɛɛnu a suuwa a ŋiɔɔŋ.”+ 39 Mbo dimul waŋnda kpou le ma chal o bil puiyaa choo a kundalaŋ.+ 40 Okoŋ ma chal. Kundalaŋ lapum ŋwaŋ 100, lapum ŋwaŋ 50. 41 Mbo chua beedii kpuŋgbaŋ ŋuɛɛnu koŋ a suwaa ŋiɔɔŋnda, mbo heelu hɔlla choo choo, mbo piɛi.+ Okoŋ mbo yimi yimi beediiyo, mbo ke buɛiyaa nduaa. Mi nda chua ma piɔu waŋnda, nduyɛ mbo piɔu waŋnda kpou suwaa ŋiɔɔŋ nda. 42 Mi nda kpou dia ma pum cha. 43 Ma chuuŋgiaa o biŋgi biŋgi nda dema wo, mbo pia kambɛilaŋ 12. Suuwa ve lechoo le.+ 44 Waŋ piaanduaa de beediiyo hoo wa, a wa 5,000.

45 O lepilɛ niŋ kpe, mbo dimul buɛiyaa nduaa le ma luɛi o dɛndɔɔ niŋ, ma taŋ pɔɔ ma kuɛ o kɔŋgɔɔ pilɔɔ Bɛtisaida ikɛi. Mi ndupila lo kɔɔli le mbo dimul waŋnda ma miiŋgu o la nda lo.+ 46 Mɛɛ o chii nda choŋgɔŋ, mbo hel o pembei choo le piɛileŋ.+ 47 A teleŋ fitilioo, dɛndɔɔ waŋnuŋ niŋ o mɛŋndaŋ tɛɛŋ, kɛ ndu wa wɔ o kɔŋgɔ.+ 48 Mbo cha nda fafalaa le kɔlaŋ a dɛndɔɔ, kanifuule hueiye wa hɔŋndo kpeekpei. A ditɛɛŋ paale siaa* kinɛi, mbo kandu kɔlaŋ o mɛŋndaŋ choo le kɔlaŋ naa nda wa wa. Kɛ mbo tosa maa hiounɔŋndo o wa ni. 49 Mɛɛ nda che ndu hunɔɔ o mɛŋndaŋ choo, ma mɛli yeelaŋ kpeleŋ aa: “Yɛɛnɛ cho yɛ hoo hunɔɔ?” 50 Mɛɛ nda kpou che ndu, mi kɔltaŋ la laasiaŋ nda. Kɛ o lepilɛ niŋ kpe, mbo dimul nda aa: “La bii kɔltaŋ! Ya ni, la yɔŋ isiooŋ te.”+ 51 Okoŋ mbo luɛi o dɛndɔɔ niŋ, mi hueiye pɛŋgi hɔŋndo. Mi kɔndɔfillo bii nda tau. 52 Kanifuule, ndaa bii kaamaa o tosa a beediiyo wo bila le. Kɔlta ndalaŋ laa kendu bɔɔ suɛi biyɔɔ bila.

53 Mɛɛ nda taŋ kɔŋgɔɔ leeloo, ma fuuluu Kɛnɛsaluɛi, okoŋ ma baa dɛndɔɔ loŋ.+ 54 Kɛ dimioo nuaa ma fula o dɛndɔɔ niŋ, mi waŋnda sina ndu. 55 Ma nyaanuŋ ma kua a dimulaŋndo o tanda koŋ niŋ kpou. Ma kandu hunɔɔ a wanaa wa a naalaŋ nda o mboomalaŋ niŋ naa nda tuei maa Chiisu cho wa. 56 Ba o ba ndoo kuɛ pɛ, o sɔndɔkɔltaŋ ni, o chiɔɔŋ niŋ ni, o chieeŋ bɛndoŋ niŋ ni, mi ndaa hiŋ a wanaa lanaawa o lɔɔlaŋ niŋ, nduyɛ ma nyɔɔlu ndu le ma pilaŋ bɔɔle doma ndɔɔ kinɛi.+ Nduyɛ wana o wana pilaŋ bɔɔle doma ndɔɔ, nda kpou ma siaŋgu.