Maatiu

26 Mɛɛ Chiisu chii sɔɔŋ muŋ kpou dimi, mbo dimul buɛiyaa nduaa aa: 2 “La sina maa o lo niŋ palɛi i ŋiiŋ le mi Bɔŋaŋ Hiouwɔɔ Choo Wo fuuluu,+ nduyɛ ma mal Po wanachioo waŋnda o ba, okoŋ ma dii ndu o yɔmndo choo.”+

3 Okoŋ kɔɔli, mi masaa wanaa soliaa lasalaa, a laŋgbaa kalla kɔ chuuŋgiaŋ o bɛɛ wana bɛndu wanaa soliaa lasalaa, diolaŋ aa Kayafaa.+ 4 Ma kɛɛsiaa+ le Chiisu biyɔɔ o nɛi chaa niŋ, ma dii ndu. 5 Kɛ a wa dimioo aa: “Ŋ tosaŋ ndi a teleŋ bɔŋaŋndo le, yɔŋii waŋnda mal sɔŋgɔɔ.”

6 Mɛɛ Chiisu wa Bɛtani o chiɛi Saimɔŋ ndo niŋ, o ndoo nɔ lɛlɔŋ ndo,+ 7 mi chua pilɛ huŋ a chuɛima chuŋ kɛndɛ kɛndiaŋ o sanioo niŋ. Baa pila maa nɔ ni. Mbo tala maŋ Chiisu o lebol, a teleŋ o wa nyɛdiaa dioo* wo. 8 Mɛɛ buɛiyaa nduaa che hei, mi suɛi nɛi nda. Ma dimi aa: “Le yɛɛnɛ o cho yɛ maŋ tɛɛmbuuwo? 9 Chuɛiyaŋ maŋ maa pisiŋ le kanii* bana bana, okoŋ mi wanaa ke wanaa bala fonduaa.” 10 Mɛɛ Chiisu sina hei, mbo dimul nda aa: “Le yɛɛnɛ nya cho yɛ chuaa hoo pɛɛsaa? Suɛi kɛndɛi pila o tosal la ni. 11 Wanaa bala fonduaa cho nya tɛɛŋ lɔɔlɔɔ.+ Kɛ ya, I ve niŋ a nya lɔɔlɔɔ le.+ 12 Chuɛima o tala ya maŋ lekɔɔ waŋ, dialuŋ nuŋ o cho pɔɔ bɛɛndiaa ni le kumbɔɔ nda cho ya hunɔɔ wo.+ 13 A tonya mi dimul nya, ba o ba yooŋgu kɛndɔɔ dimiŋ pɛ o chieeŋndo niŋ, waŋnda cho vɛlɛ dimi a nyɛ chuaa hoo tosa wo okɔɔ le loonɔŋndo a ndu.”+

14 Okoŋ kɔɔli, mi wana pilɛ o kiilaa nduaa 12 nda tɛɛŋ, o nda veelu aa Chuda Isikaliɔɔ wo+ kua o masaa wanaa soliaa lasalaa lo.+ 15 Mbo dimul nda aa: “Te I mal Chiisu nya o ba pɛ, yɛɛ nya cho yɛ ya ke?”+ Ma kɛɛsiaa le ndu kioo kaniŋ humboŋ 30.+ 16 Chɔŋ niŋ a boondii keŋ, mbo kandu nɛilaŋ nuuviaa le Chiisu pisioo.

17 Mɛɛ paale tasele nda toosiaa Beedii Nɔ Yiisii* Leniŋ te Wo le fuuluu,+ mi buɛiyaa Chiisu wa huŋ ma nyuna ndu aa: “Kuɛɛnɛ ŋ yeema yɛ miŋ kɔ bɛɛndiaa le ma de nyɛdiaa Bɔŋaŋ Hiouwɔɔ Choo Wo?”+ 18 Mbo muli aa: “La kɔ chiee mi la dimul po pilɛ loŋ aa, ‘Wana Pɛɛkaa dimi aa: “Boondii nii fuuluu. I cho Bɔŋaŋ Hiouwɔɔ Choo Wo biyɔɔ a buɛiyaa niaa o numndo chiɛiniŋ.”’” 19 Mi buɛiyaa nduaa tosa mɛɛ Chiisu dimul nda yɛ, nduyɛ ma bɛɛndiaa nyɛdiaa le Bɔŋaŋ Hiouwɔɔ Choo Wo.

20 Mɛɛ nyumndaŋ ma tol,+ mi Chiisu nda kiilaa nduaa 12 nda chal nyɛdiaa dioo o tibiiyo choo.+ 21 Mɛɛ nda wa nyɛdiaa dioo, mbo dimi aa: “A tonya mi dimul nya, wana pilɛ o nya tɛɛŋ cho ya hunɔɔ pisi.”+ 22 Mi mɔnɛi bii buɛiyaa nduaa tau, okoŋ ma kandu ndu nyunaa a pilɛŋ pilɛŋnda aa: “Masanɔɔ, o cho ya le, lende le?” 23 Mbo mulul nda aa: “Wana cho baa wouwo o hɛŋgɛiyo niŋ a ya latulu wo cho ya pisi ni.+ 24 A tonya, Po wanachioo nɔ le piɔmndo sɔlaa a mɛɛ i cho i poonyiaa a ndu okɔɔ yɛ. Kɛ, kpundɔɔ+ cho le wana cho ndu pisi wo!+ Ndoo bɛnda bɛɛ pɛŋ mi wana koŋ ndoo veluŋ kposoŋ te.”+ 25 Okoŋ mi Chuda, o wa ndu hunɔɔ pisi wo nyuna ndu aa: “Luabai, o cho ya le, lende le?” Mi Chiisu mulul ndu aa: “Numpila chii dimi.”

26 Mɛɛ nda wa nyɛdiaa dioo, mi Chiisu chua beediiyo. Mɛɛ o chii piɛileŋ, mbo yimi yimi,+ okoŋ mbo ke buɛiyaa nduaa. Mbo dimi aa: “La bii mi la de. Hoo sim le dialuŋ nuŋ ni.”+ 27 Mbo chua vɛlɛ taalaa a muɛiyaŋ leniŋ, mbo piɛi, mbo ke nda. Mbo dimi aa: “La kol, nya kpou.+ 28 Kanifuule, maŋ ma sim le ‘kooma niaŋ ni.+ A maŋ Mɛlɛka yii kpemaa+ a ŋwaŋnda chiee ni.’+ Maŋ ma cho talaŋ ni le mi wanaa faŋga faŋga sɔla malɔɔ hakioo.+ 29 Kɛ mi dimul nya, I cho lɛ muɛima kɛ kɛ kolɔɔ le haaa mi paale ya cho muɛima sɛnɛiyaŋ kolɔɔ a nya latulu o Masale Finya nuu niŋndeŋ le fuuluu.”+ 30 O mɛɛlulaŋ, mɛɛ nda chii chondoŋ soli, ma kua o Pembii Ɔlifii Ve.+

31 Mi Chiisu dimul nda aa: “Nya kpou cho ya malɔɔ* le nyɛ cho ya yɔŋnɔŋ chuɛllɛŋ ndo, kanifuule i cho i poonyiaa aa: ‘I cho wana mandaa lasaa diyɔɔ, okoŋ mi saa nduaa kpou a saŋnuŋ.’+ 32 Kɛ te I miiŋgu yoomu pɛ, I cho pɔɔ nya lakɔ lachi Kalili.”+ 33 Mi Pitɛ dimul ndu aa: “Mi che bɛɛ a tuaa kpou cho num malɔɔ le nyɛ cho num yɔŋnɔŋ ndo, kɛ ya ya, I mel num te.”+ 34 Mi Chiisu dimul ndu aa: “A tonya mi dimul num, chuɛllɛŋ, tuupa mi sɔɔ koowa, a cho viinɔŋ bɛmbɔɔ le yaa maa a sina ya le.”+ 35 Mi Pitɛ dimul ndu aa: “Ŋ wu mawuaa naa num, kɛ I viinuŋ maa I sina num te le.”+ Mi buɛiya a tuaa kpou bɛɛ dimi lende.

36 Okoŋ kɔɔli, mi Chiisu huŋ a buɛiyaa nduaa o fondaŋ pum diolaŋ aa Kɛsɛmani.+ Mbo dimul nda aa: “La chal nanuŋ. I cho lakɔ o nda mi kɔ piɛi.”+ 37 Mɛɛ o wa kɔlaŋ mbo chua Pitɛ a puaa ŋiɔɔŋaa Sɛbidi wa. Mi mɔnɛi kandu ndu biyɔɔ, nduyɛ mbo tambu kɔl tau.+ 38 Okoŋ mbo dimul nda aa: “Mɔnɛi cho o kɔl nuu niŋnde, i lo ko mi i dii ya. La lo pɔɔ nanuŋ nduyɛ mi la wa lahɔl a ya latulu.”+ 39 Mɛɛ o chɔɔlu lakɔ tiŋ lachi, mbo hini lɛŋ a hɔlla a kuumbaa kpu, mbo kandu piɛileŋ aa:+ “Finya nuu, te o bɛnda pɛ, mɛɛ faŋa ya taalaa hoo kuee.+ Kɛ nduyɛ, hɛnaŋ numndo ŋ tosa ni, o cho hɛnaŋ nuu le.”+

40 Mɛɛ o miiŋgu naa buɛiyaa nduaa chua, mbo komal nda o luaŋ. Mbo nyuna Pitɛ aa: “Mɛɛ le hawɛiyo* o pilɛ bɛɛ la nɔla mi la wa lahɔl a ya latulu le?+ 41 La wa lahɔl,+ mi la hiou lachi a piɛileŋ,+ yɔŋii nya del o tɔɔndaŋndo niŋ.+ A tonya, yeemɛi cho nya le ndi tosaa, kɛ dialloŋ nya ŋ vilɛi pɛ.”+ 42 Mi Chiisu kua vɛlɛ kɔla diiŋ ndɔlaŋ, mbo piɛi aa: “Finya nuu, te o wa pɛ maa taalaa hoo feŋaŋ ya kuee le mɛɛ mi kol leniŋ, mɛɛ hɛnaŋ numndo yɔŋnuŋ.”+ 43 Mɛɛ o miiŋgu, mbo komal nda vɛlɛ o luaŋ. Ma wa nda o hɔl yiŋgi yiŋgi. 44 Mbo mɛi nda vɛlɛ, okoŋ mbo kɔ piɛi vɛlɛ le teleŋ yaa ndɔɔ a diomnda pilɛ laŋ kpe. 45 Okoŋ mbo miiŋgu o buɛiyaa nduaa lo. Mbo dimul nda aa: “A boondii waa nuaa nya choŋnuŋ lɔma nya ni, mi la wa pɛŋgioo? La nuawɔ! Boondei cho niŋ kpɛɛluŋ le ma pisi Po wanachioo wanaa yɔŋ wɔɔŋnda o ba. 46 La chɔŋ ŋ kɔŋnuŋ. Mi che wana cho ya pisioo wo hunɔɔ.” 47 Chiisu lo suɛi, mi Chuda, waŋndo o pilɛ o kiilaa nduaa 12 tɛɛŋ huŋ a waŋnda faŋga bɛndoo ndu kɔɔli. Mɔɔŋ a yɔmii biŋgiei wa nda o laba. Masaa wanaa soliaa lasalaa a laŋgbaa kalla vem nda ni.+

48 Mi wana wa ndu pisioo wo chɔm nda tamasioo aa: “Te ŋ kuɛ pɛ, wana ya cho kuuwo sɔsa wo, mɛɛ ndu ni. La bii ndu mi la kuɛ a ndu.” 49 Mɛɛ Chuda hiŋ, mbo kua sakpo naa Chiisu chua. Mbo dimi aa: “Isɛ, Luabai!” Okoŋ mbo sɔsa ndu kuuwo. 50 Kɛ mi Chiisu nyuna ndu aa: “Poo, yɛɛnɛ ŋ hiŋ yɛ tosa nanuŋ?”+ Okoŋ ma bii Chiisu ma kua a ndu. 51 Mi wanaa wa Chiisu kɔɔli wa o pilɛ naŋ muɛi nduɛi yau, mbo lɔwa nile buɛi wana bɛndu wanaa soliaa lasalaa, mbo kialu leŋ kpali.+ 52 Mi Chiisu dimul ndu aa: “Miŋgi muɛi numnde o boo ndɔɔ niŋ.+ Kanifuule, wanaa sɔŋga a muɛi ya, a muɛi nda dii nda ni.+ 53 A yiyaŋ maa I nɔla mi dimul Finya nuu a boondei hei le mbo yɔŋ ya maalikɛiya waalaŋ o waalaŋ niŋ* te?+ 54 Kɛ te i yɔŋnuŋ lende pɛ, vɛɛ nyɛ Yau Mɛlɛkaa dimi maa i cho yɔŋnɔŋ lende wo cho yɛ peelɔŋ?” 55 A boondii keŋ, mi Chiisu nyuna faŋgaa aa: “La vɛ hunɔɔ a mɔɔŋ a yɔmii biŋgiei le ya biyɔɔ mɛɛ nda yɔŋ ko aa viinɔɔ ya cho ni? Lepaa o lepaa I wa challe waŋnda pɛɛkoo o chiɛi Mɛlɛkaa niŋ,+ la bii ya teleŋ koŋ te.+ 56 Kɛ sɔɔŋ muŋ kpou yɔŋnuŋ le mi nyɛ Yau Mɛlɛkaa dimi wo peeluŋ.”+ Okoŋ, mi buɛiyaa nduaa kpou a mal ndu ma nyaanuŋ.+

57 Mi wanaa bii Chiisu wa kua a ndu o Kayafaa lo,+ wana bɛndu wanaa soliaa lasalaa, naa wanaa pɛɛku waŋnda sawala Mɛlɛkalaŋ nda a laŋgbaa kalla wa a chuuŋgiaŋ nda.+ 58 Mi Pitɛ tual Chiisu kɔɔli, kɛ o wa tiŋ landaŋ. O lo kɔlaŋ ndu kɔɔli haaa mbo fuuluu o bɛɛ wana bɛndu wanaa soliaa lasalaa. Mɛɛ o luɛi, mbo chal nda wanaa wa chiɛi masaa hɔlteŋ nda, mbo wa chumndo le nyɛ cho yɔŋnɔŋ ndo.+

59 Nduyɛ, masaa wanaa soliaa lasalaa a Laŋgbaa Kalaa Kialu Yamaŋ Nda kpou wa nɛilaŋ nuuviaa le Chiisu choolaŋ nyiinduuwo choo, le halikpeŋ ma dii ndu.+ 60 Kɛ a seeluŋ nyɛ o nyɛ le, mi che bɛɛ mi seiyaa lachoowaa bɔɔbɔɔ huŋ timbi seileŋ.+ Okoŋ kɔɔli, mi seiya a ŋiɔɔŋ huŋ. 61 Ma dimi aa: “Poo hoo dimi aa: ‘I nɔla mi pɛl chiɛi Mɛlɛkaa, nduyɛ mi miŋgi ndu taŋgul o palɛi i yaa bɛŋgu.’”+ 62 Okoŋ mi wana bɛndu wanaa soliaa lasalaa sim mbo nyuna ndu aa: “A nɔ nyɛ o nyɛ le dimi le? Mɛɛ a cho tueiyɔɔ nyɛ nda cho hoo dimioo a num okɔɔ wo le?”+ 63 Kɛ mi Chiisu meinuŋ kpili.+ Okoŋ, mi wana bɛndu wanaa soliaa lasalaa dimul ndu aa: “Mɛnaŋ o Mɛlɛka cho yoomu wo lo po, ma dimul naa tonyaa te num cho Kiliti ni, Po Mɛlɛkaa!”+ 64 Mi Chiisu dimul ndu aa: “Numpila chii dimi. Kɛ mi dimul nya, chɔŋ a boondei hei, la cho chɔ Po wanachioo+ ichali o ba kɛndɛ Mɛlɛka kpaaya bɛndoo choo,+ nduyɛ mbo wa hunɔɔ o yumbu yumboo niŋ choo choo.”+ 65 Okoŋ mi wana bɛndu wanaa soliaa lasalaa sɛɛsiaŋ domaa lekɔɔ, mbo dimi aa: “O tɛɛmbuu diola Mɛlɛkalaŋ! Seiyaa maavɛɛ naŋ yeema yɛ vɛlɛ? Nyapila chii tueiyɔɔ mɛɛ o tɛɛmbuu diola Mɛlɛkalaŋ yɛ. 66 Vɛɛ nya yiyaŋ yɛ?” Ma muli aa: “O nɔ mbo sɔla piɔmndo.”+ 67 Okoŋ ma tufu ndu lɔluaŋ o hɔl+ nduyɛ ma kuindi kuindi ndu a bɔtalaŋ.+ Mi apum luaa ndu kpaŋnde.+ 68 Ma dimi aa: “Num Kiliti, dimullɔ naa, nɛɛnɛ lɔɔ yɛ num?”

69 Pitɛ wa ichali o bɛɛ masaa, mi buɛi laandu pilɛ huŋ naa ndu chua mbo dimi aa: “Num bɛɛ a wa Chiisu fula hoo Kalili wo kɔɔli!”+ 70 Kɛ mbo viinuŋ nda o hɔl aa: “I sina bɛɛ pɛŋ nyɛ ŋ cho hoo dimioo wo le.” 71 Mɛɛ o kuɛ kpeŋgii dio bɛndoo, mi chuaambɔ cheleŋ cha ndu, mbo dimul wanaa wa loŋ nda aa: “Poo hoo bɛɛ wa Chiisu fula hoo Naasaluɛi yo kɔɔli.”+ 72 Kɛ mi Pitɛ viinuŋ vɛlɛ mbo mɛnaŋ. Mbo dimi aa: “Pesiŋ bɛɛ I sina poo hoo le!” 73 Mɛɛ teleŋndo hiou tiŋ, mi wanaa wa isisi loŋ nda huŋ naa Pitɛ chua ma dimi aa: “Tonya kpeekpei, num bɛɛ wa poo hoo balɔɔ kɔɔli, kanifuule wana tuei dɔɔ num suɛi pɛ, a sina.” 74 Okoŋ, mi Pitɛ mɛnaŋ vɛlɛ po. Mbo dimi aa: “Pesiŋ bɛɛ I sina poo hoo le!” O lepilɛ niŋ kpe, mi sɔɔ koowa. 75 Okoŋ, mi Pitɛ loonuŋ a nyɛ Chiisu dimi wo aa: “Tuupa sɔɔ koowa, a cho ya viinɔŋ bɛmbɔɔ le yaa maa a sina ya le.”+ Okoŋ mi Pitɛ fula o bɛɛ, mbo kɔ chaŋ chaŋndo pila.