Chɔŋ

12 Mɛɛ palɛi lo i ŋɔmpum le mi Bɔŋaŋ Hiouwɔɔ Choo Wo fuuluu, mi Chiisu kua Bɛtani. Loŋ Lasalɔɔ+ o miŋgi yoomu wo wa ichali ni. 2 Okoŋ ma toosial ndu nyɛdiaa ichɔllo loŋ. Mata wa nda nyɛdiaa kioo.+ Nduyɛ, Lasalɔɔ wa waŋndo o pilɛ o wanaa wa nyɛdiaa dioo a ndu latulu wa tɛɛŋ. 3 Mi Meele chua chuɛima chuŋ kɛndiaŋ mapum diolaŋ aa naadi. Maa wa lusullo le paŋndo o pilɛ,* nduyɛ baa pila maa nɔ ni. Mbo tala maŋ Chiisu o ŋpelu. Okoŋ, mbo wɔɔsuu ndu peloŋ a yiiŋii nduɛi. Nduyɛ maa wa le litɛiyo tɛndaa tɛɛŋ. Mi chuŋ kɛndɔɔ tiu chiɛiniŋ silɔ.+ 4 Kɛ mi buɛiyaa Chiisu wa o pilɛ diolaŋ aa Chuda Isikaliɔɔ,+ o wa ndu hunɔɔ pisi wo dimi aa: 5 “Le yɛɛnɛ chuɛiyaŋ maŋ ma pisiŋ le dinaluɛiyoŋ 300* mi wana ndoo ke wanaa bala fonduaa kaniŋ* muŋ te?” 6 Nyɛ o dimi hoo wo, o cho nuaa maa ndoo buulaŋ a wanaa bala fonduaa le, kɛ viinɔɔ o wa ni. Ndu wa wana kɛsiaa kɔfu ŋkanioo ni, nduyɛ mi ndoo chiimbuu kaniŋ ndaa duau leniŋ ndoŋ. 7 Mi Chiisu dimi aa: “Mal chuaa hoo. Dialuŋ nuŋ o cho pɔɔ bɛɛndiaa ni le paale nda cho ya hunɔɔ kumbɔɔ leŋ.+ 8 Wanaa bala fonduaa cho nya tɛɛŋ lɔɔlɔɔ.+ Kɛ ya, I ve niŋ a nya lɔɔlɔɔ le.”+

9 A teleŋ koŋ, mi Chuuwaa bɔɔbɔɔ sina maa Chiisu cho Bɛtani. Okoŋ ma huŋ, o ve ko le Chiisu chɔɔ le, kɛ le ma che vɛlɛ Lasalɔɔ, po o miŋgi yoomu wo.+ 10 Mi masaa wanaa soliaa lasalaa kɛɛsiaa maa Lasalɔɔ bɛɛ, a cho ndu diyɔɔ, 11 kanifuule le ndu Chuuwaa bɔɔbɔɔ wa kɔlaŋ loŋ ni, ma wa laalaŋndo dɔwɔɔ o Chiisu niŋ.+

12 Diimandɔɔ, mi faŋga bɛndu hiŋ o bɔŋaŋndo wo tuɛi maa Chiisu cho hunɔɔ Chulusalɛm. 13 Ma bii siɔɔla waulaŋ o laba ma kua ndu demullo. Ma kandu dimioo choo choo kpeleŋ aa: “Mɛlɛka, piŋi ndu fɔ! Salaa cho le wana hiŋ hoo o diola Chɛhowa* laŋ niŋndo,+ Masaa le Isɔluɛi!”+ 14 Mɛɛ Chiisu saaluŋ sofɛlɛ fɔŋndɔɔ, mbo chal lechoo.+ Mi i yɔŋnuŋ a mɛɛ i cho i poonyiaa yɛ aa: 15 “Waŋnda Saayɔŋ, la yɔŋ isiooŋ te. La tofawɔ! Masa nyaa cho hunɔɔ o sofɛlɛ fɔŋndɔɔ choo.”+ 16 Buɛiyaa Chiisu wa bii sɔɔŋ muŋ bila o tasela ndɔ le. Kɛ mɛɛ Chiisu luɛi o biilu ndɔɔ niŋ,+ ma loonuŋ maa a ndu okɔɔ nda poonyiaa muŋ ni, nduyɛ maa mi waŋnda tosal ndu muŋ.+

17 Teleŋ Chiisu dimul Lasalɔɔ le mbo fula o sɛiyo* niŋ,+ nduyɛ mbo miŋgi ndu yoomu wo, mi wanaa wa o hɔlndɔ wa hiau lachi a seileŋ timbioo a ndi okɔɔ.+ 18 Lelaŋ pɛŋ faŋgaa kuɛ ndu demullo ni le mɛɛ nda tuei maa mbo tosa kaamaa hoo yɛ. 19 Mi Falisiiya dimulaŋ aa: “La che le! Hei hiou naa mayoomu. Chieeŋndo kpou tol ndu kɔɔli.”+

20 Kilikiiya apum wa wanaa ndaa hiŋ le Mɛlɛka piɛiyo o bɔŋaŋndo hoo wa tɛɛŋ. 21 Ma kua naa Filipi chua,+ o ndoo fula Bɛtisaida o Kalili niŋndo. Ma dimul ndu aa: “Fallo, ŋ yeema miŋ che Chiisu.” 22 Mi Filipi kɔ dimul Andulu. Mi Andulu nda Filipi kɔ dimul Chiisu.

23 Kɛ mi Chiisu dimul nda aa: “Teleŋndo fuuluu le mi Po wanachioo luɛi o naŋɔɔ ndɔɔ niŋ.+ 24 A tonya mi dimul nya, te o cho mi kulii ŋwitiiye del lɛŋ mi i vi le, i pilɛ kpe i wa ni. Kɛ te i vi pɛ,+ i kom kulloŋ tau. 25 Wana o wana kaala pɛ yoomu ndɔɔ, o cho ndu hiɔlɔŋ.* Kɛ wana o wana tul pɛ yoomu ndɔɔ leyɛ+ o chieeŋndo hoo niŋ, o cho ndu manda le yoomu fafɛɛŋndo.+ 26 Wana o wana yeema pɛ mbo wa buɛi nuu, mɛɛ o tol la kɔɔli. Nduyɛ naa ya cho wa, loŋ buɛi nuu bɛɛ nɔ ni mbo wa.+ Wana o wana yeema pɛ mbo wa buɛi nuu, Finya nuu cho ndu bɛɛleŋ ke. 27 Mɔnɛi cho ya o kɔllo niŋ suŋ suŋ.+ Yɛɛ kpeekpei ya dimi yɛ? Kɛkɛ, piŋi ya a boondei hei fɔ.+ Kɛ le saboo hoo ya hiŋ ni, le mi keeku o nyɛpalaa hoo niŋ. 28 Kɛkɛ, tosa mi waŋnda saŋgala diola numndaŋ.” Okoŋ mi diomndo+ suaa o choo choo niŋ aa: “I tosa ma saŋgala laŋ, nduyɛ I cho vɛlɛ tosa ma saŋgala laŋ.”+

29 Mi faŋga wa isisi loŋ ndo tuɛi diomndo hoo, okoŋ ma kandu dimioo maa taŋndeŋ le deŋi. Mi apum dimi aa: “Maalikɛinɔɔ soo naa ndu chua.” 30 Mi Chiisu dimi aa: “O cho le ya le diomndo hoo soo le, kɛ le nya. 31 Boondei hei Mɛlɛka cho chieeŋndo hoo yamɛi kilullo ni. Nduyɛ o cho hunɔɔ masa chieeŋndo hoo+ faŋa bau.+ 32 Kɛ te a heelu ya pɛ o yɔmndo choo,+ I cho tosa mi waŋnda suu o suu hiŋ naa ya chua.” 33 Le chɔmndo piɔm suu ndoo nɔ le hunɔɔ sɔlaa wo o dimi hei ni.+ 34 Okoŋ mi faŋgaa dimul ndu aa: “Sawaa* dimi maa Kiliti cho wa yoomu lefafɛɛŋ.+ Le yɛɛnɛ ŋ dimi yɛ niko maa a nɔ ma baŋ Po wanachioo o yɔmndo choo?+ Nɛɛnɛ cho yɛ Po wanachioo hoo?” 35 Mi Chiisu dimul nda aa: “Nyɛ teŋgaa cho wɔ nya wa tɛɛŋ le teleŋ biŋgi. La kela pɔɔ teleŋ nya nɔ nyɛ teŋgaa wo, yɔŋii nyumndaŋ ma bii nya. Wana o wana kela pɛ o nyumndaŋ niŋ, o sina naa o cho kɔlaŋ nda le.+ 36 Teleŋ nya nɔ nyɛ teŋgaa wo, la dɔu laalaŋndo o nyɛ teŋgaa niŋ, okoŋ mi la simnuŋ chuauwaa nyɛ teŋgaa.”+

Mɛɛ Chiisu chii sɔɔŋ muŋ dimi, mbo kɔ vioŋnuŋ nda. 37 Mi che bɛɛ mi Chiisu tosa kaamaala bɔɔbɔɔ nda o hɔl, kɛ a dou laalaŋndo o ndu niŋ te. 38 Mi hei peelu nyɛ Aisaya, wana ndoo suaa le Mɛlɛka wo dimi wo aa: “Chɛhowa,* nɛɛnɛ dɔu yɛ laalaŋndo o nyɛ o tuei naa dimioo wo niŋ?+ Nduyɛ nɛɛnɛ Chɛhowa* chɔm yɛ ba ndɔɔ?”+ 39 Mi Aisaya chɔm vɛlɛ sabu nda kɛɛ laalaŋndo wo. Mbo dimi aa: 40 “Mɛlɛka suumiaa nda, mbo kiindiaa nda kɔltaŋ, yɔŋii nda chɔ a hɔlta ndalaŋ, nduyɛ ma bii bila a kɔlta ndalaŋ, okoŋ ma siŋga kaala ndalaŋ, mi siŋgi nda.”+ 41 Le mɛɛ Aisaya che naŋɔɔ ndɔɔ yɛ o dimi sɔɔŋ muŋ a ndu okɔɔ ni.+ 42 Kɛ nduyɛ, mi wanaa bɔɔbɔɔ a masaa waa duau laalaŋndo o ndu niŋ.+ Kɛ a sɔlɔlaŋ waŋnda o hɔl kpendekele le, kanifuule a wa siooŋnde le Falisiiya yɔŋii nda soli nda o chiɛi Chuuwa piɛi Mɛlɛka wo niŋ.+ 43 Ndaa yeema mi waŋnda chieeya saŋgala nda mbo hiau Mɛlɛka nda saŋgalaa.+

44 Mi Chiisu dimi choo choo aa: “Wana o wana dɔu pɛ laalaŋndo o ya niŋ, mɛɛ o cho ko o ya niŋ te o dɔu laalaŋndo le, kɛ o dɔu vɛlɛ ndu o wana vem ya wo niŋ.+ 45 Nduyɛ wana o wana che ya pɛ, mɛɛ wana vem ya wo o che koŋ ni.+ 46 I hiŋ o chieeŋndo niŋ maa nyɛ teŋgaa.+ Nduyɛ wana o wana dɔu pɛ laalaŋndo o ya niŋ, o ve o manyum niŋ te.+ 47 Kɛ wana o wana tuei pɛ nyɛ ya dimi wo mbo kɛɛ le ndu tosaa, I kilul ndu iyama le. Kanifuule I hiŋ le chieeŋndo iyama kilul te, kɛ le mi baŋa ndu ya hiŋ ni.+ 48 Wana o wana pɛɛsa ya pɛ mbo kɛɛ nyɛ ya dimi wo tosaa, nyɛ cho o cho ndu yamɛi kilul lo. Diomnda ya dimi laŋ, laŋ la cho ndu hunɔɔ yamɛi kilul o paale mɛɛlaaleŋ choo ni. 49 Kanifuule sɔɔŋ ya dimi woŋ, o cho yapila o ba le ŋ fula le, kɛ Finya ni vem ya wo, ndu ke ya nyɛ ya nɔ mi dimi nduyɛ mi pɛɛku wo ni.+ 50 Nduyɛ, I sina maa sawala ndɔlaŋ la tosa miŋ wa yoomu lefafɛɛŋ.+ Lelaŋ, nyɛ o nyɛ ya dimi pɛ, mɛɛ Finya nuu dimul la yɛ, lende ya dimi ni.”+