Sɔɔŋ Chɔɔmaŋndoŋ
12 Okoŋ kɔɔli, mi cha suɛi kɔndɔfili bɛnduei o choo choo niŋ: Wana lanɔɔ+ wa o chuɛɛnaŋ a paaleŋ, nduyɛ paŋgei wa ndu o peloŋ bɛŋgu. Ndoo nɔ mɔsil lemasa nɔ looŋ 12 ndo o lebol. 2 O wa a folioo,* mbo wa chaŋndo kpeekpei a pulii vialɛi.
3 Mi cha vɛlɛ suɛi kɔndɔfili cheleŋ o choo choo niŋ. Mi cha tambalaka bɛndoo o siaŋa yɔɔ maa leyiŋ.+ Ndoo nɔ bolle i ŋɔmmɛu, a leelaŋ tɔ. Mɔsilta lemasalaŋ la wa ndu o bolii ŋɔmmɛu ve hei choo. 4 Looŋ o choo choo niŋ piɔuwo kundalaŋ la yaa,+ mi tambalakaa hoo koonda kundaa o pilɛ a puiile ndɔleŋ, mbo mɛli muŋ o lɛŋndeŋ choo.+ Mbo sim wana lanɔ+ ndoo nɔ le violɔɔ wo lachi. Okoŋ te ndoo velu ndɔɔ pɛ, o dii hɔɔ ndɔɔ.
5 Mi chuaa hoo vialu wana pɔnɔɔ.+ Poo hoo nɔ le kaalaŋ kpou mandaa a tinda ichiliŋndo ni.+ Mɛɛ o velu dɔɔ, ma kuaŋnuŋ a chɛlɛkpɛ kalaa o Mɛlɛka lo. O wa ichali o kpeŋgbei* lemasaa choo. 6 Okoŋ, mi chuaa ndu nyaanuŋ o pollo niŋ. Loŋ Mɛlɛka toosial ndu fondaa ni, nduyɛ ma wa ndu nyɛdiaa kioo le palɛi 1,260.+
7 Okoŋ, mi chɔuwo del o choo choo niŋ. Mi Maikɛɛ*+ a maalikɛiyaa nduaa chiŋalaŋ tambalakaa a chɔuwo. Mi tambalakaa a maalikɛiyaa nduaa bɛɛ sɔŋga a nda. 8 Kɛ ma yam tambalakaa a maalikɛiyaa nduaa. Fondaŋ chalaa ve lɛ le nda o choo choo niŋ te. 9 Ma viɔl tambalaka bɛndoo+ hoo o lɛŋndeŋ choo, kɛu paandu paandoo.+ Ndu nda veelu ni aa Setana+ a Nyina Wɔɔŋndo.+ Ndu cho waŋnda o chieeŋndo choo kpou huiyo ni.+ Ma viɔl ndu a maalikɛiyaa nduaa latulu o lɛŋndeŋ choo.+ 10 Mi tuɛi diomndo o choo choo niŋ kpeleŋ aa:
“Boondii Mɛlɛka piŋi niŋ waŋnda,+ mi masale ndɔleŋ le kanduŋ, nduyɛ mi ndu+ nda Kiliti chɔm kpaaya ndaa ve fuuluu. Kanifuule, a viɔl wana nyiinduu puaapiliaa naa choolaŋ choo wo o chieeŋndo choo. Idii a ichɔl, o cho nda choolaŋ nyiinduuwo choo Mɛlɛka naa o hɔl.+ 11 Ma yam ndu+ a kooma Saa Fɔŋndɔɔ,+ vɛlɛ a yooŋgu nda wa dimioo wo.+ Nduyɛ, a wa a bɛɛndiaŋ le piɔmndo sɔlaa, kanifuule ndaa kaala yoomula ndalaŋ te.+ 12 Le saboo hoo, la dɔɔnuŋ nyaale nya cho o choo choo niŋnda! Kɛ kpundɔɔ cho le lɛŋndeŋ a pee mɛŋma ihɛllo,+ kanifuule Setana* kuel nya. O cho a tumboo tau tau, kanifuule o sina maa teleŋ ndɔɔ lo lɛ o bɔɔ le.”+
13 Mɛɛ tambalakaa che maa a nyindu ndu o lɛŋndeŋ choo,+ mbo tisa wana lanɔ+ velu poombɔɔ wo kɔɔli. 14 Kɛ ma ke wana lanɔɔ kumbaŋnda kowɛ bɛndoo la tiɔɔŋ,+ le mbo chɛŋ choo choo, okoŋ mbo kuɛŋnuŋ o fondaŋ ndɔɔ o pollo niŋ. Loŋ nda cho ndu wa nyɛdiaa kioo ni le teleŋndo o pilɛ,+ a teleŋndaŋ la tiɔɔŋ, a teleŋndo tɛndaa tɛɛŋ,* mbo wa landaŋ a kɛuwo. +
15 Okoŋ mi kɛuwo hoo susul mɛŋndaŋ maa pee bɛndu, le halikpeŋ mi wana lanɔɔ hoo lo o maŋ niŋ. 16 Kɛ mi lɛŋndeŋ le mala wana lanɔɔ hoo. Mi le kumbi sondoo, okoŋ mi le sɔɔsiaa pee bɛndu tambalakaa hoo susul lo. 17 Mi tambalakaa duaunuŋ tumbe a wana lanɔɔ. Le hei, mbo mululaŋ chuauwaa nduaa apiliaa* a chɔuwo.+ Nda cho sawala Mɛlɛkalaŋ biyɔɔ ni, nduyɛ ma wa yooŋgoo dimioo a Chiisu okɔɔ.+