Chemisi

1 Ya Chemisi,+ ya cho hoo buɛi Mɛlɛkaa nda Masanɔɔ Chiisu Kiliti wo cho yauwo hoo poonyiaa o kaayii 12 cho i saŋnaŋ ba o ba fee ve lo ni:

I yil nya lapi.

2 Puaapiliaa niaa, te tɔɔndaŋnda yɛ yɛlaŋ la wa nya pɛ choo, la naŋ kɔl tau.+ 3 La sina maa te laalaŋ nyaa sɔla pɛ tɔɔndaŋ waa nuaa, o cho nya mala mi la sɔla yoomuaŋ le biuwɔŋndo.+ 4 Nduyɛ te la hiou pɛ lachi a biuwɔŋndo, la cho nyapila kindi poŋ. Hei cho tosa mi la bɛnda o nyɛ o nyɛ niŋ, nduyɛ tɔɔyaŋ o tɔɔyaŋ ve nya choo le.+

5 Lelaŋ, te wana o wana yeema pɛ taasioo, o lambaŋ Mɛlɛka nyunaa le mbo ke ndu.+ O cho sɔla, kanifuule Mɛlɛka cho wana ikɛndɛ o wana o wana lo,+ nduyɛ o yɔŋgu wana a ŋɔɔchiaŋ te.+ 6 Wana koŋ nɔ mbo lambaŋ nyunaa a laalaŋndo maa o cho sɔla.+ O nɔ mbo kiisaŋ kposoŋ te,+ kanifuule wana kiisaŋndo cho ko mɛɛ hueiye muuluu nuaa mɛŋndaŋ yɛ. 7 Waŋndo hoo, o nɔ o kɔl kposoŋ maa o cho nyɛ sɔla Chɛhowa* o ba le. 8 O cho wana sim o pelii pilɛ choo le.+ Teleŋ o teleŋ o cho siŋgaŋndo.

9 Puaapilɛnɔ pelnuŋ ladio le wo, o naŋ kɔl le mɛɛ o sɔla heeloo yɛ.+ 10 Okoŋ mi wana sulaa naŋ kɔl le mɛɛ o sɔla tusioo yɛ.+ Kanifuule, mɛɛ bil lapeeŋgoo nyamala nuaa yɛ, lende wana sulaa keleŋa wu ni. 11 Te paaleŋ le fula pɛ mi haŋgul ndɔ koŋ lɔɔ tɔlɔɔ, tɔlɔɔ koŋ nyamala, peeŋgela ndɔlaŋ la deli, okoŋ naŋɔɔ ndɔɔ chuu. Lende koni wana sulaa lo sullo kiltaŋ kɔɔli ni mbo lo pɛ.+

12 Kɔl kɛndɔɔ cho le wana biunuŋ tɔɔndaŋndo wo.+ Kanifuule, te o yem pɛ tɔɔndaŋ koŋ, o cho hunɔɔ mɔsil yoomoo sɔla.+ Fandaa hoo Chɛhowa* mɛi lediom le wanaa cho hiouwɔɔ lachi a ndu kaalaa wa kioo ni.+ 13 Te waŋndo wa pɛ o tɔɔndaŋndo bɛŋgu, o dimi nuaa aa: “Mɛlɛka cho ya tɔɔndaŋndo ni” le. Kanifuule, wana tɔɔndaŋ Mɛlɛka a sɔɔŋ wɔɔŋndoŋ te. Nduyɛ, Mɛlɛka bɛɛ tɔɔndaŋ wana a muŋ te. 14 Kɛ wana o wana, nyɛ vɛɛlu ndu mbo yɛɛ ndu o tɔɔndaŋndo niŋndo cho yeemaŋ ndɔŋ ni.+ 15 Te yeemaŋ muŋ ŋ kendu pɛ, ŋ kom hakioo. Te waŋndo tosa yɛ pɛ hakioo, o sɔla piɔmndo.+

16 Puaapiliaa niaa kaalaa, la chɛl mi nyɛ o nyɛ hui nya le. 17 Nyɛ o nyɛ kɛndɛ naŋ sɔla, Mɛlɛka ke naa ndu ni.+ Ndu toosiaa nyɛm yɔŋgu paŋgeloo o choo choo niŋndoŋ ni,+ nduyɛ o siŋgaŋ maa lewundu le.+ 18 Mɛlɛka pila kɛɛsiaa ni le mbo siiŋguu naa wanaa ndɔ sanaa a yooŋgu tonyaa hoo.+ O tosa hei le miŋ simnuŋ wanaa tasiaa o nyɛm o toosiaa woŋ tɛɛŋ.+

19 La sina hei puaapiliaa niaa kaalaa: La wa chɔ chɔ le suɛi tueiyɔɔ, kɛ la keleŋa isɔɔ le.+ Nduyɛ la keleŋa tumbe dɔɔnɔŋ te.+ 20 Te wanachioo dɔɔnuŋ pɛ tumbe, o ve o nɛi Mɛlɛkaa choo le.+ 21 Lelaŋ, nyɛ o nyɛ cho nyɛ nɔɔlɛi a nyɛ dɛnɛ wɔɔŋ,+ la faŋaŋ ndu kɔɔli feu feu. Nduyɛ, la tusiŋ mi la chɛl diom Mɛlɛka tɔl nya o lakɔl lo, kanifuule diom koŋ nɔla mbo piŋi nya.

22 La wa ko diom Mɛlɛkaa tueiyɔɔ kinɛi le, kɛ la nɔ mi la tosa nyɛ o dimi wo.+ Te o cho koŋ te, la cho nyapila hui a yiyaŋnda wɔɔŋndaŋ. 23 Te waŋndo lo pɛ o diom Mɛlɛkaa tueiyɔɔ kinɛi, kɛ mbo tosa nyɛ o dimi wo le,+ wana koŋ cho ko maa wana nuaŋnuŋ* o tofaŋndo niŋndo. 24 Mɛɛ o nuaŋnuŋ, mbo kuaŋnuŋ. Okoŋ, mbo puɛɛŋ bɛɛ mɛɛ o cheŋnuŋ o tofaŋndo niŋ yɛ. 25 Te waŋndo tofa pɛ sawa walaŋ+ baŋa hoo waŋnda wo nyɛkɛndɛ kɛndɛi, nduyɛ mbo wa nyɛ o dimi wo tosaa, mɛɛ wana koŋ o tui ko mbo puɛɛnuŋ te, kɛ o tosa nyɛ o tueiyo. Nduyɛ o cho wa a nyaale o hei tosaa niŋ.+

26 Te waŋndo yiyaŋ pɛ maa o cho Mɛlɛka piɛiyo, kɛ mbo bumba diɔɔmule ndɔleŋ dɔwɔɔ o mandaa bɛŋgu,+ mɛɛ ndupila o cho koŋ huiyo ni. Nduyɛ nyɛ fondoo fuu piɛile ndɔleŋ le cho ni. 27 Piɛile Mɛlɛka Finya naa che maa le cho le diandaa, nduyɛ maa le nɔ sɔŋ o sɔŋ te leŋ le cho leŋ ni: wanaa vii finyaa a kalla wa,+ a waŋ laanduaa vii piaanduaa+ wa malaa o bahawɛila ndalaŋ niŋ.+ Okoŋ kɔɔli, miŋ fafaŋ kaala nɔɔlɛilaŋ kpou o chieeŋndo hoo niŋ, ŋ nɔ sɔŋ o sɔŋ te.+