Nɛhimaya
2 O wɔsi 20+ Masaa Atasaasi+ wa o masaleŋ choo wo niŋ, a paŋgii Nisaŋ* nde, muɛiyaŋ ma wa masaa lachi, nduyɛ mi tala maŋ mi ke masaa maa paandu.+ Kɛ kani bɛɛ ndoo chi wɔ ya mi wa a kɔl tambɛiyo le. 2 Okoŋ mi masaa nyuna ya aa: “Le yɛɛnɛ ŋ cho yɛ a kɔl tambɛiyo nuaa nduyɛ a cho yɛ a naa le? Bahawɛiyo nɔ hunɔɔ a kɔl tambɛi waa nuaa ni.” Le hei, mi siooŋnde bii ya.
3 Okoŋ mi dimul masaa aa: “Maa viou naa choo fɔ! I cho a kɔl tambɛiyo kanifuule chiee nda kumbu finyaa niaa mamaa wo cho a bembelaŋ, nduyɛ diola kpakila ndɔlaŋ la cho la ŋualɛi chilikɔ.”+ 4 Mi masaa nyuna ya aa: “Yɛɛnɛ ŋ yeema yɛ?” O lepilɛ niŋ kpe, mi piɛi o Mɛlɛka cho choo choo wo lo.+ 5 Okoŋ mi dimul masaa aa: “Te o bɛnda pɛ a num fallo masaa nduyɛ mi wa wana sɔvɛ num o hɔl, mɛɛ a yandii chɛl la mi kuɛ Chuda, mi kɔ miŋgi chiee nda kumbu finyaa niaa mamaa wo taŋgul.”+ 6 A teleŋ koŋ, masaa wa ichali nda laa ndɔ. Okoŋ mbo nyuna ya aa: “Vɛɛ kpɛ ŋ cho yɛ palɛi chua le kɔlaŋ, nduyɛ teleŋ kuɛɛ ŋ cho yɛ miiŋgu?” Mi masaa chɛl le mi kuɛ.+ Nduyɛ, mi chɔm ndu teleŋ ya cho miiŋgu wo.+
7 Okoŋ kɔɔli, mi dimul masaa aa: “Te o bɛnda pɛ a num fallo masaa, mɛɛ a yandii ke ya yaulaŋ le mi kɔ ke masaa ŋbuŋgaa o Pee Bɛndoo Leeloo,*+ le halikpeŋ ma mal la mi hiou haaa mi fuuluu Chuda. 8 Nduyɛ ma ke ya vɛlɛ yauwo le Asafi, wana cho Bundɛ leMasaa mandaa wo, le halikpeŋ mbo ke ya yɔmnde le diola chiɛi nda taŋgul o Kala Kala+ o Chiɛi Mɛlɛkaa wo, diola kpaki chioo,+ a diola chiɛi ya cho wa wo.” Mi masaa ke ya yaulaŋ ndaŋ,+ kanifuule ba kɛndɛ Mɛlɛka nuu wa ya choo.+
9 Okoŋ, mi huŋ o masaa ibuŋgaa lo, a wa o Pee Bɛndoo Leeloo wa, nduyɛ mi ke nda yaula masaa ke ya laŋ. Mi masaa ke ya vɛlɛ masaa puaa chɔuwa a wanaa nyaanuŋ suaa wa le ma liila ya. 10 Mɛɛ Saŋbala+ Hɔlɔnaitiinɔɔ, a Tobaya+ wana bɛndu* Amɔnaitiiya+ tuei a ndi okɔɔ, ma tambu kɔllo tau tau le mɛɛ waŋndo hiŋ suɛi kɛndɛi tosaa le waŋnda Isɔluɛi yɛ.
11 Mi fuuluu niko Chulusalɛm yɔɔfɛɛ. Palɛi i yaa okoŋ kɔɔli, 12 mi chaŋ ichɔllo, nduyɛ mi chua puaa wa a ya latulu wa atiŋ. I dimul wana o wana nyɛ Mɛlɛka tonyaa dɔu ya o kɔl le tosaa le Chulusalɛm ndo le. I chue chɔlu cheleŋ te, mɛɛ o ya wa kɔlaŋ choo wo. 13 Ichɔl koŋ, mi keeku o Dio Kpaki Kpoloŋndo,+ mi fula mi keeku o Fondaŋ Mɛŋma Kɛu Bɛndoo hɔlndɔ, mi kua o Dio Kpaki Sal Lapullo.+ Mi tofa kpakioo Chulusalɛm nyɛkɛndɛi mɛɛ o piɔl lɛ, nduyɛ a mɛɛ diola kpakioo hoo la ŋuɛ yɛ.+ 14 Mi keeku o Dio Kpaki Mamɛŋndo+ a Mɛŋma Ibuŋgaŋ o Fondaŋ Masaa, kɛ fondaa wa sɔɔkɛnyɛɛ le mi chɔlu ya wa kɔlaŋ choo wo hiou. 15 Mi keeku a kpoloŋndo*+ ichɔl koŋ, mi hiau lachi a kpakioo mɛɛndaŋndo. Okoŋ kɔɔli, mi keeku a Dio Kpaki Kpoloŋndo, okoŋ mi miiŋguŋ.
16 Wanaa cho masaa ikɛiya+ sina naa ya kuɛ wa le, nduyɛ ndaa sina nyɛ ya wa tosaa wo le. Kanifuule Chuuwa, wanaa soliaa lasalaa, laŋgbaa kalla, wanaa cho masaa ikɛiya, a wanaa waliaa tuaa kpou, I dimul nda nyɛ o nyɛ le. 17 Mi dimul nda o mɛɛlulaŋ kpɔŋ aa: “La nuawɔ se kpundɛ bɛndu naŋ cho niŋndo. Chulusalɛm cho o tambɛiyo, nduyɛ diola kpakila ndɔlaŋ kpou la cho la ŋualɛi laŋ. La huŋ miŋ miŋgi kpakilaŋ Chulusalɛm taŋgul, le halikpeŋ mi siɔmbulaŋ ndaŋ la faŋaŋ naa choo.” 18 Okoŋ, mi dimul nda a mɛɛ ba kɛndɛ Mɛlɛka nuu wa ya kɔɔli yɛ,+ vɛlɛ a nyɛ masaa dimul la wo.+ Nduyɛ ma dimi aa: “La ŋ chɔŋnuŋ miŋ taŋgul kpaki chioo.” Mi nda kpou lueinaŋ yoomuaŋ* le wali kɛndɔɔ tosaa.+
19 Kɛ mɛɛ Saŋbala Hɔlɔnaitiinɔɔ, Tobaya+ wana bɛndu* Amɔnaitiiya,+ a Kiisiɛm Aluabuiinɔɔ+ tuei a ndi okɔɔ, ma kandu naa mamɔɔ,+ ma wa naa pɛɛsaa ma dimi aa: “Yɛɛ nya cho yɛ koŋ tosaa? Baa masaa nya yeema simullo ni?”+ 20 Okoŋ mi mulul nda aa: “Mɛlɛka cho choo choo wo cho tosa miŋ sɔla batiuwaa.+ Nduyɛ, naa buɛiyaa nduaa cho chɔnɔŋ miŋ taŋgul kpaki chioo hoo. Kɛ nya nya, la nɔ nyɛ o nyɛ nanuŋ te, la nɔ di le mi la sɔla nyɛ o nyɛ le, nduyɛ la tosa nyɛ o nyɛ Chulusalɛm nanuŋ, o wana loonuŋ a nya okɔɔ wo le.”+